創世記 第 12 章

1

(THR) Iâ-hô-hoa tùi A-pek-lân kóng, Lí tio̍h lī-khui pún-tōe, pún-cho̍k, lāu-pē ê ke, khì Góa só͘ beh chí-sī lí ê tōe.

(BCL) 耶和華對亞伯蘭講：「你著離開本地、本族、老父的家，去我所欲指示你的地。

2

(THR) Góa beh hō͘ lí chiâⁿ-chòe tōa-kok, Góa beh sù-hok lí, hō͘ lí ê miâ chòe tōa, lí ia̍h beh hō͘ lâng tit-tio̍h hok-khì;

(BCL) 我欲互你成做大國。我欲賜福你，互你的名做大；你亦欲互人得著福氣。

3

(THR) chiok-hok lí-ê, Góa beh sù-hok hō͘ in; chiù-chó͘ lí-ê, Góa beh chek-ho̍at i; tōe-chiūⁿ bān-cho̍k beh in-ūi lí tit-tio̍h hok-khì.

(BCL) 祝福你的，我欲賜福互；咒詛你的，我欲責罰伊。地上萬族欲因為你得著福氣。」

4

(THR) A-pek-lân chiàu Iâ-hô-hoa hoan-hù ê ōe, chiū khì; Lô-tek ia̍h kap i khì. A-pek-lân chhut Hap-lân ê sî chhit-cha̍p-gō͘ hè.

(BCL) 亞伯蘭照耶和華吩咐的話就去；羅得亦及伊去。亞伯蘭出哈蘭的時七十五歲。

5

(THR) A-pek-lân tòa i ê bó͘ Sat-lāi, kap i ê tı̍t-á Lô-tek; í-kı̍p in tī Hap-lân só͘ chek-chū ê châi-bu̍t, só͘ tit-tio̍h ê lâng-gia̍h; in chiū chhut-khì, beh khì Ka-lâm tōe; in chiū kàu Ka-lâm tōe.

(BCL) 亞伯蘭帶伊的某撒萊及伊的姪仔羅得，以及佇哈蘭所積聚的財物、所得著的人額，就出去欲去迦南地。就到迦南地。

6

(THR) A-pek-lân keng-kè hit ê tōe, kàu tī Sī-kiàm ê só͘-chāi, kàu Mô͘-lí ê siōng-chhiū; hit-sî Ka-lâm cho̍k iáu teh tòa.

(BCL) 亞伯蘭經過彼個地，到佇示劍的所在、到摩利的橡樹。彼時迦南族猶住。

7

(THR) Iâ-hô-hoa tùi A-pek-lân chhut-hiān kóng, Góa beh chiong chit ê tōe-hng siúⁿ-sù lí ê hō͘-è; i chiū tī-hia ūi-tio̍h tùi i chhut-hiān ê Iâ-hô-hoa khí chı̍t chō tôaⁿ.

(BCL) 耶和華對亞伯蘭出現講：「我欲將此個地方賞賜你的後裔。」伊就佇遐為著對伊出現的耶和華起一座壇。

8

(THR) Tùi hia i sóa kàu Pek-te̍k-lī tang-sì ê soaⁿ, tah pò͘-pîⁿ; sai-sì sī Pek-te̍k-lī, tang-sì sī Ai; tī-hia ūi-tio̍h Iâ-hô-hoa khí chı̍t chō tôaⁿ, kiû-kiò Iâ-hô-hoa ê miâ.

(BCL) 對遐伊徙到伯特利東勢的山，搭布棚；西勢是伯特利，東勢是艾。佇遐為著耶和華起一座壇，求叫耶和華的名。

9

(THR) A-pek-lân chiām-chiām sóa-khì lâm-sì ê tōe.

(BCL) 亞伯蘭漸漸徙去南勢的地。

10

(THR) Hit ê tōe tú-tio̍h ki-hng, A-pek-lân lo̍h-khì Ai-kı̍p, beh tī-hia chiām-sî khiā-khí; in-ūi hit ê tōe ki-hng chin tōa.

(BCL) 彼個地抵著飢荒。亞伯蘭落去埃及，欲佇遐暫時徛起，因為彼個地飢荒真大。

11

(THR) Chiong-kūn jı̍p Ai-kı̍p, chiū tùi i ê bó͘ Sat-lāi kóng, Góa chai lí sī bīn-māu hó-khòaⁿ ê hū-jîn-lâng;

(BCL) 將近入埃及，就對伊的某撒萊講：「我知你是面貌好看的婦仁人。

12

(THR) Ai-kı̍p lâng khòaⁿ-kìⁿ lí ê sî beh kóng, Chit-ê sī i ê bó͘, in beh thâi-sí góa, lâi lâu lí o̍ah-teh.

(BCL) 埃及人看見你的時欲講：『此個是伊的某』，欲死我，來留你活。

13

(THR) Kiû lí tio̍h kóng, lí sī góa ê sió-bē, hō͘ góa in-ūi lí tit-tio̍h pêng-an; góa ê sìⁿ-miā ia̍h tùi lí lâi tit-tio̍h o̍ah.

(BCL) 求你著講，你是我的小妹，互我因為你得著平安；我的生命亦對你來得著活。」

14

(THR) A-pek-lân kàu Ai-kı̍p ê sî, Ai-kı̍p lâng khòaⁿ-kìⁿ hit ê hū-jîn-lâng ke̍k-kî súi.

(BCL) 亞伯蘭到埃及的時，埃及人看見彼個婦仁人極其娞。

15

(THR) Hoat-ló ê jîn-sîn khòaⁿ-kìⁿ i, chiū tùi Hoat-ló o-ló i; hit ê hū-jîn-lâng chiū hō͘ lâng tòa i jı̍p Hoat-ló ê ông-kiong.

(BCL) 法老的人臣看見伊，就對法老謳咾伊。彼個婦仁人就互人帶伊入法老的王宮。

16

(THR) Hoat-ló in-ūi chit ê hū-jîn-lâng chiū hó khóan-thāi A-pek-lân; A-pek-lân chiū tit-tio̍h iûⁿ, gû, kang ê lû, lô͘-po̍k, lú-pī, bú ê lû, í-kı̍p lo̍k-tô.

(BCL) 法老因為此個婦仁人就好款待亞伯蘭，亞伯蘭就得著羊、牛、公的驢、奴僕、女婢、母的驢、以及駱駝。

17

(THR) Iâ-hô-hoa in-ūi A-pek-lân ê bó͘ Sat-lāi ê iân-kò͘, kàng tōa chai-ē tī Hoat-ló kap i chôan-ke.

(BCL) 耶和華因為亞伯蘭的某撒萊的緣故，降大災禍佇法老及伊全家。

18

(THR) Hoat-ló chiū kiò A-pek-lân lâi kóng, Lí tùi góa só͘-chòe-ê sī sím-mı̍h sū? siáⁿ-sū bô kā góa kóng i sī lí ê bó͘?

(BCL) 法老就叫亞伯蘭來，講：「你對我所做的是甚麼事？啥事無給我講伊是你的某？

19

(THR) Siáⁿ-sū chheng i chòe sió-bē? tì-kàu góa chiong i chhōa lâi chòe góa ê bó͘; taⁿ lí ê bó͘ tī-chia, thang chhōa i, chòe lí khí.

(BCL) 啥事稱伊做小妹，致到我將伊娶來做我的某？今你的某佇遮，通導伊做你去。」

20

(THR) Tùi hit-tia̍p Hoat-ló ūi-tio̍h i lâi hoan-hù lâng; in chiū chiong i kap i ê bó͘ kap i só͘-ū-ê, lóng sàng i khì.

(BCL) 對彼霎法老為著伊來吩咐人，就將伊及伊的某及伊所有的，攏送伊去。

Bible Color Mark

• 台語漢字羅馬本
• 巴克禮全羅