創世記 第 1 章

1

(THR) Gôan-khí-thâu Siōng-tè chhòng-chō thiⁿ kap tōe.

(BCL) 源起頭，上帝創造天及地。

2

(THR) Tōe sī khang-khang hūn-tūn; chhim-ian ê bīn-chiūⁿ o͘-àm; Siōng-tè ê Sîn ūn-tōng tī chúi-bīn.

(BCL) 地是空空混沌，深淵的面上黑暗；上帝的神運動佇水面。

3

(THR) Siōng-tè kóng, Tio̍h ū kng, chiū ū kng.

(BCL) 上帝講：「著有光」，就有光。

4

(THR) Siōng-tè khòaⁿ kng, sī hó; Siōng-tè chiong kng àm pun-khui.

(BCL) 上帝看光是好，上帝將光暗分開。

5

(THR) Siōng-tè kiò hit ê kng chòe Jı̍t, kiò àm chòe Mî. Ū ê-hng ū chá-khí, sī thâu chı̍t-jı̍t.

(BCL) 上帝叫彼個光做「日」，叫暗做「暝」。有下昏，有早起，是頭一日。

6

(THR) Siōng-tè kóng, Chiah ê chúi ê tiong-kan tio̍h ū kiong-chhong, chiong chúi kap chúi pun-khui.

(BCL) 上帝講：「諸個水的中間著有穹蒼，將水及水分開。」

7

(THR) Siōng-tè chiū chō kiong-chhong, lâi hun-khui kiong-chhong-ē ê chúi kap kiong-chhong-téng ê chúi; chiū ū án-ni.

(BCL) 上帝就造穹蒼，來分開穹蒼下的水，及穹蒼頂的水。就有按呢。

8

(THR) Siōng-tè kiò kiong-chhong chòe Thiⁿ. Ū ê-hng ū chá-khí, sī tē-jī jı̍t.

(BCL) 上帝叫穹蒼做「天」。有下昏，有早起，是第二日。

9

(THR) Siōng-tè kóng, Thiⁿ-ē chiah ê chúi tio̍h chū-chı̍p kàu chı̍t só͘-chāi, ta-tōe tio̍h chhut-hiān; chiū ū án-ni.

(BCL) 上帝講：「天下諸個水著聚集到一所在，乾地著出現。」就有按呢。

10

(THR) Siōng-tè kiò ta-tōe chòe Tōe; kiò chū-chı̍p ê chúi chòe Hái; Siōng-tè khòaⁿ-i sī hó.

(BCL) 上帝叫乾地做「地」，叫聚集的水做「海」。上帝看伊是好。

11

(THR) Siōng-tè kóng, Tōe tio̍h hoat-chháu, í-kı̍p kiat-chí ê chhài-soe, kap chiàu-lūi siⁿ ké-chí ê chhiū, hit lāi-bīn ū i ê chí, tī tōe-chiūⁿ; chiū ū án-ni.

(BCL) 上帝講：「地著發草以及結子的菜蔬，及照類生果子的樹，彼內面有伊的子佇地上。」就有按呢。

12

(THR) Tōe chiū hoat-chháu, kap chiàu-lūi kiat-chí ê chhài-soe, kap chiàu-lūi siⁿ ké-chí ê chhiū, lāi-bīn ū i ê chí; Siōng-tè khòaⁿ-i sī hó.

(BCL) 地就發草及照類結子的菜蔬，及照類生果子的樹；內面有伊的子。上帝看伊是好。

13

(THR) Ū ê-hng ū chá-khí, sī tē-saⁿ jı̍t.

(BCL) 有下昏，有早起，是第三日。

14

(THR) Siōng-tè kóng, Thiⁿ-nı̍h ê kiong-chhong tio̍h ū hoat-kng ê thé, lâi hun-piat jı̍t-mî; iā thang chòe tiāu-thâu, sù-kùi, jı̍t, nî;

(BCL) 上帝講：「天裡的穹蒼著有發光的體，來分別日暝，亦通做兆頭，四季、日、年，

15

(THR) ia̍h hō͘ in chòe kng-thé tī thiⁿ ê kiong-chhong, chiò-kng tī tōe-chiūⁿ; chiū ū án-ni.

(BCL) 亦互做光體佇天的穹蒼，照光佇地上。」就有按呢。

16

(THR) Siōng-tè chiū chō tōa ê kng-thé nn̄g-ê; tōa ê kng-thé lâi kóan jı̍t-sî, sòe ê kng-thé lâi kóan mî-sî; iā chō chhiⁿ-sîn.

(BCL) 上帝就造大的光體二個，大的光體來管日時，細的光體來管暝時，也造星辰。

17

(THR) Siōng-tè hē in tī thiⁿ-nı̍h ê kiong-chhong, hō͘ in chiò kng tī tōe-nı̍h;

(BCL) 上帝下佇天裡的穹蒼，互照光佇地裡，

18

(THR) iā beh kóan ū jı̍t mî, hun-piat kng àm. Siōng-tè khòaⁿ-i sī hó.

(BCL) 也欲管有日暝，分別光暗。上帝看伊是好。

19

(THR) Ū ê-hng ū chá-khí, sī tē-sì jı̍t.

(BCL) 有下昏，有早起，是第四日。

20

(THR) Siōng-tè kóng, Chúi tio̍h siⁿ-thòaⁿ chōe-chōe ū o̍ah-miā ê tōng-bu̍t; chiáu pe tī tōe ê téng-bīn, thiⁿ-nı̍h ê kiong-chhong.

(BCL) 上帝講：「水著生湠多多有活命的動物；鳥飛佇地的頂面，天裡的穹蒼。」

21

(THR) Siōng-tè chiū chhòng-chō hái-nı̍h ê tōa-hî, í-kı̍p chúi só͘ siⁿ chōe-chōe ū o̍ah-miā ê tōng-bu̍t, kok chiàu i ê lūi, koh chhòng-chō ta̍k-iūⁿ ê pe-chiáu, chiàu i ê lūi; Siōng-tè khòaⁿ-i sī hó.

(BCL) 上帝就創造海裡的大魚以及水所生多多有活命的動物，各照伊的類；閣創造逐樣的飛鳥，照伊的類。上帝看伊是好。

22

(THR) Siōng-tè sù-hok in, kóng, Tio̍h siⁿ-thòaⁿ ke-thiⁿ chin-chōe, chhiong-móa tī hái-nı̍h ê chúi, iā hō͘ chiáu-chiah siⁿ-thòaⁿ chōe-chōe tī tōe-nı̍h.

(BCL) 上帝賜福，講：「著生湠加添真多，充滿佇海裡的水；也互鳥隻生湠多多佇地裡。」

23

(THR) Ū ê-hng ū chá-khí, sī tē-gō͘ jı̍t.

(BCL) 有下昏，有早起，是第五日。

24

(THR) Siōng-tè kóng, Tōe tio̍h siⁿ ū o̍ah-miā ê tōng-bu̍t, chiàu i ê lūi, cheng-siⁿ, thâng-thōa, tōe-chiūⁿ ê cháu-siù, chiàu i ê lūi; chiū ū án-ni.

(BCL) 上帝講：「地著生有活命的動物，照伊的類；精牲、蟲、地上的走獸，照伊的類。」就有按呢。

25

(THR) Siōng-tè chiū chō tōe-chiūⁿ ê cháu-siù chiàu i ê lūi, cheng-siⁿ chiàu i ê lūi, tōe-chiūⁿ it-chhè ê thâng-thōa chiàu i ê lūi; Siōng-tè khòaⁿ-i sī hó.

(BCL) 上帝就造地上的走獸，照伊的類；精牲，照伊的類；地上一切的蟲，照伊的類。上帝看伊是好。

26

(THR) Siōng-tè kóng, Lán tio̍h chō lâng chhin-chhiūⁿ lán ê siōng, chiàu lán ê khóan; hō͘ in kóan-lí hái-nı̍h ê hî, thiⁿ-nı̍h ê chiáu, kap cheng-siⁿ, kap chôan-tōe, í-kı̍p tōe-chiūⁿ teh sô ê thâng-thōa.

(BCL) 上帝講：「咱著造人親像咱的像、照咱的款，互管理海裡的魚、天裡的鳥、及精牲，及全地，以及地上趖的蟲。」

27

(THR) Siōng-tè chiū chhòng-chō lâng chhin-chhiūⁿ I ka-kī ê siōng, chiàu Siōng-tè ê siōng chhòng-chō i; chhòng-chō in lâm-ê lú-ê.

(BCL) 上帝就創造人親像伊家己的像，照上帝的像創造伊，創造男者女者。

28

(THR) Siōng-tè sù-hok in; Siōng-tè koh tùi in kóng, Tio̍h siⁿ-thòaⁿ chin-chōe, chhiong-móa tī tōe-chiūⁿ, lâi khah-iâⁿ i; iā tio̍h tī-lí hái-nı̍h ê hî, thiⁿ-nı̍h ê chiáu, kap tōe-chiūⁿ it-chhè só͘ tín-tāng ê o̍ah-mı̍h.

(BCL) 上帝賜福，上帝閣對講：「著生湠真多，充滿佇地上，來卡贏伊，也著治理海裡的魚、天裡的鳥，及地上一切所振動的活物。」

29

(THR) Siōng-tè kóng, Góa ū hō͘ lín piàn tōe-chiūⁿ it-chhè kiat-chí ê chhài-soe, koh it-chhè ê chhiū, kî-tiong ū kiat-chí ê chhiū ê ké-chí; lóng hō͘ lín chòe chia̍h-mı̍h.

(BCL) 上帝講：「我有互恁遍地上一切結子的菜蔬閣一切的樹，其中有結子的樹的果子攏互恁做食物。

30

(THR) Lūn-kàu tōe-chiūⁿ it-chhè ê cháu-siù, thiⁿ-tiong it-chhè ê chiáu, kap tōe-chiūⁿ it-chhè ōe tín-tāng ū o̍ah-miā ê mı̍h, Góa chiong it-chhè chhiⁿ-chháu hō͘ in chòe chia̍h-mı̍h; chiū ū án-ni.

(BCL) 論到地上一切的走獸天中一切的鳥，及地上一切會振動有活命的物，我將一切青草互做食物。」就有按呢。

31

(THR) Siōng-tè khòaⁿ I it-chhè só͘ chō-ê, khòaⁿ ah, chin-hó. Ū ê-hng ū chá-khí, sī tē-la̍k jı̍t.

(BCL) 上帝看伊一切所造的，看啊！真好。有下昏，有早起，是第六日。

Bible Color Mark

• 台語漢字羅馬本
• 巴克禮全羅