加拉太書 第 5 章

1

(THR) Ki-tok tháu-pàng lán chòe chū-iû, só͘-í lín tio̍h khiā-chāi, bo̍h-tit koh kòa-tio̍h hit ê chòe lô͘-po̍k ê taⁿ.

(BCL) 基督解放咱做自由，所以恁著徛在，莫得閣掛著彼個做奴僕的軛。

2

(THR) . Góa Pó-lô kā lín kóng, lín nā siū kat-lé, chiū Ki-tok bô lī-ek tī lín.

(BCL) 我──保羅給恁講，恁若受割禮，就基督無利益佇恁。

3

(THR) . Góa koh-chài tùi ta̍k ê siū kat-lé ê lâng chèng-bêng, i tio̍h kiâⁿ chiâu-chn̂g ê lu̍t-hoat, chhin-chhiūⁿ khiàm-chè tio̍h hêng.

(BCL) 我閣再對逐個受割禮的人證明，伊著行齊全的律法親像欠債著還。

4

(THR) . Lín ài tùi lu̍t-hoat chheng-chòe-gī ê, sī í-keng kap Ki-tok cho̍at-tn̄g, í-keng tùi un-tián ê ūi lut-lo̍h-khì.

(BCL) 恁愛對律法稱做義的，是已經及基督絕斷，已經對恩典的位　落去。

5

(THR) . In-ūi lán óa-khò Sîn, tùi sìn teh thèng-hāu só͘ ǹg-bāng ê gī.

(BCL) 因為咱倚靠神，對信聽候所向望的義。

6

(THR) . In-ūi tiàm-tī Ki-tok Iâ-so͘ siū kat-lé, á bô siū kat-lé, lóng bô kong-hāu, to̍k-to̍k sìn, tùi jîn-ài lâi kiâⁿ ê, chiah ū kong-hāu.

(BCL) 因為佇基督耶穌，受割禮抑無受割禮攏無功效，獨獨信對仁愛來行的才有功效。

7

(THR) . Lín chêng sī gâu cháu; chī-chūi chó͘-tòng lín tì-kàu lín bô thàn chin-lí ah?

(BCL) 恁前是走，是誰阻擋恁，致到恁無趁真理啊？

8

(THR) . Hit hō ê khó͘-khǹg m̄ sī tùi tiàu lín ê chhut.

(BCL) 彼號的苦勸呣是對召恁的出。

9

(THR) . Tām-po̍h ê kàⁿ ōe hoat kui-sn̂g.

(BCL) 淡薄的酵會發歸甑。

10

(THR) . Góa tiàm-tī Chú chhim sìn, lín put-tì ū pa̍t iūⁿ ê sim-chì; to̍k-to̍k kiáu-jiáu lín ê, bô lūn sī sím-mı̍h lâng, i beh siū gí chōe.

(BCL) 我佇主深信恁不致有別樣的心志；獨獨攪擾恁的，無論是甚麼人，伊欲受擬罪。

11

(THR) . Hiaⁿ-tī ah, góa nā iáu teh thôan kat-lé, siáⁿ-sū iáu-kú siū khún-tio̍k ah? Án-ni sı̍p-jī-kè ê chòe that-gāi, í-keng hòe-bô ah.

(BCL) 兄弟啊，我若猶傳割禮，啥事猶久受窘逐啊？按呢，十字架的做塞礙已經廢無啊。

12

(THR) . Gōan hiah ê phah-lōan lín ê chiong ka-kī koah-tn̄g.

(BCL) 願許個拍亂恁的將家己割斷。

13

(THR) . Hiaⁿ-tī ah, lín siū tiàu sī lâi tit-tio̍h chū-iû; to̍k-to̍k bo̍h-tit ēng chū-iû chòe jio̍k-thé ê ki-koan, sī tio̍h tùi jîn-ài saⁿ ho̍k-sāi.

(BCL) 兄弟啊，恁受召是來得著自由，獨獨莫得用自由做肉體的機關，是著對仁愛相服事。

14

(THR) . In-ūi chôan lu̍t-hoat pau-hâm tī chı̍t kù, chiū-sī kóng, Thiàⁿ chhù-piⁿ chhin-chhiūⁿ ka-kī.

(BCL) 因為全律法包含佇一句，就是講「疼厝邊親像家己」。

15

(THR) . Siat-sú lín saⁿ thun-kā, kiaⁿ-liáu ōe saⁿ bia̍t-bô; lín tio̍h kín-sīn.

(BCL) 設使恁相吞咬，驚了會相滅無，恁著謹慎。

16

(THR) . Taⁿ góa kóng, lín tio̍h chiàu Sîn lâi kiâⁿ, chiū bô chiâⁿ jio̍k-thé ê su-io̍k.

(BCL) 今我講，恁著照神來行，就無成肉體的私慾。

17

(THR) . In-ūi jio̍k-thé ài kong-kek Sîn, Sîn ài kong-kek jio̍k-thé; nn̄g-ê saⁿ tùi-te̍k, hō͘ lín bô kiâⁿ só͘ ài kiâⁿ ê.

(BCL) 因為肉體愛攻擊神，神愛攻擊肉體，二個相對敵，互恁無行所愛行的。

18

(THR) . To̍k-to̍k lín nā hō͘ Sèng Sîn só͘ ín-chhōa, chiū bô tī lu̍t-hoat-ē.

(BCL) 獨獨恁若互聖神所引導，就無佇律法下。

19

(THR) . Taⁿ jio̍k-thé ê phín-hēng ū lō͘-hiān, chhin-chhiūⁿ kan-îm, ù-òe, siâ-phiah,

(BCL) 今肉體的品行有露現，親像姦淫、污穢、邪僻、

20

(THR) . pài ngó͘-siōng, siâ-su̍t, kiat oan-siû, saⁿ-chiⁿ, òan-hūn, siū-khì, kiat-tóng, hun-pêng, īⁿ-toan,

(BCL) 拜偶像、邪術、結冤讎、相爭、怨恨、受氣、結黨、分旁、異端、

21

(THR) . òan-tò͘, chiú chùi, hòng-tōng, í-kı̍p chhin-chhiūⁿ chit hō ê; góa chêng bat tāi-seng kóng, taⁿ iā tāi-seng kā lín kóng, kìⁿ-nā siông-siông kiâⁿ án-ni ê, chiong-lâi bô sêng-chiap Siōng-tè ê kok.

(BCL) 怨妒、酒醉、放蕩，以及親像此號的。我前曾代先講，今也代先給恁講，見若常常行按呢的將來無承接上帝的國。

22

(THR) . Nā-sī Sèng Sîn ê ké-chí chiū-sī jîn-ài, hoaⁿ-hí, hô-pêng,

(BCL) 若是聖神的果子，就是仁愛、歡喜、和平、

23

(THR) . thun-lún, chû-pi, siān-liông, tiong-sìn, un-jiû, chún-chat; chhin-chhiūⁿ chit hō, bô ū lu̍t-hoat kìm i.

(BCL) 吞、慈悲、善良、忠信、溫柔、撙節。親像此號無有律法禁伊。

24

(THR) . Koh sio̍k Ki-tok Iâ-so͘ ê lâng bat chiong jio̍k-thé, kap i ê chêng i ê io̍k, tèng tī sı̍p-jī-kè.

(BCL) 閣屬基督耶穌的人，曾將肉體及伊的情，伊的慾釘佇十字架。

25

(THR) . Lán nā chiàu Sîn lâi o̍ah, tio̍h chiàu Sîn lâi kiâⁿ.

(BCL) 咱若照神來活，著照神來行。

26

(THR) . Bo̍h-tit tùi-tiōng khang-khang ê êng-kng, saⁿ kek-khì, saⁿ òan-tò͘.

(BCL) 莫得對重空空的榮光，相激氣，相怨妒。

Bible Color Mark

• 台語漢字羅馬本
• 巴克禮全羅