以西結書 第 42 章

1

(THR) I chhōa góa chhut-lâi kàu gōa-īⁿ; koh chhōa góa jı̍p lēng-gōa keh-khui ê tōe saⁿ-tùi-bīn ê pâng; hit keng pâng ǹg-pak, tī chhù-the̍h ê tùi-bīn.

(BCL) 伊導我出來到外院，閣導我入另外隔開的地相對面的房；彼間房向北佇厝宅的對面。

2

(THR) Tī chı̍t-pah tiú tn̂g, gō͘-cha̍p tiú khoah ê thâu-chêng, ū pak-mn̂g.

(BCL) 佇一百肘長，五十肘闊的頭前，有北門。

3

(THR) Sio̍k lāi-īⁿ jī-cha̍p tiú ê tùi-bīn, koh sio̍k gōa-īⁿ pho͘-chio̍h-tōe ê tùi-bīn, ū lâu ê lông tùi lâu ê lông, saⁿ-chàn.

(BCL) 屬內院二十肘的對面，閣屬外院舖石地的對面，有樓的廊對樓的廊三層。

4

(THR) Tī hiah ê pâng ê thâu-chêng ū chı̍t-tiâu lō͘, khoah cha̍p tiú, ǹg lāi-bīn chı̍t-pah tiú ê lō͘; in ê mn̂g lóng ǹg-pak.

(BCL) 佇許個房的頭前有一條路，闊十肘，向內面一百肘的路。的門攏向北。

5

(THR) Téng-chàn ê pâng khah o̍eh, in-ūi hō͘ lâu ê lông chiàm i ê tōe; pí tiong-chàn, ē-chàn, chiàm khah-chōe.

(BCL) 頂層的房卡狹，因為互樓的廊佔伊的地，比中層下層佔卡多。

6

(THR) In-ūi i ū saⁿ-chàn, chóng-sī bô thiāu, chhin-chhiūⁿ hiah ê īⁿ ê thiāu; só͘-í i ê téng-chàn pí tōe-pîⁿ ê ē-chàn tiong-chàn khah o̍eh.

(BCL) 因為伊有三層，總是無柱，親像許個院的柱；所以伊的頂層比地平的下層中層卡狹。

7

(THR) Koh tī gōa-bīn ê pâng ê piⁿ-thâu, ǹg hit ê pâng ê thâu-chêng ê gōa-īⁿ, tn̂g gō͘-cha̍p tiú.

(BCL) 閣佇外面的房的邊頭，向彼個房的頭前的外院，長五十肘。

8

(THR) In-ūi gōa-īⁿ chiah ê pâng, tn̂g gō͘-cha̍p tiú; khòaⁿ ah, tiān ê thâu-chêng ū chı̍t-pah tiú.

(BCL) 因為外院諸個房長五十肘。看啊，殿的頭前有一百肘。

9

(THR) Tī pâng ê ē-bīn, tùi tang-pêng ū jı̍p-khì ê só͘-chāi; chiū-sī lâng tùi gōa-īⁿ ōe jı̍p-khì hia.

(BCL) 佇房的下面，對東旁有入去的所在，就是人對外院會入去遐。

10

(THR) Ǹg-lâm tī īⁿ ê chhiûⁿ ê khoah, tī keh-khui ê só͘-chāi tùi-bīn, iā tī chhù-the̍h ê tùi-bīn, ū hiah ê pâng;

(BCL) 向南佇院的牆的闊，佇隔開的所在對面，也佇厝宅的對面有許個房。

11

(THR) i ê thâu-chêng ū lō͘, in chhin-chhiūⁿ ǹg-pak ê pâng ê khóan-sit; tn̂g khoah lóng saⁿ-tâng; chhut-jı̍p ê só͘-chāi, lóng chiàu in ê khóan-sit, iā chiàu in ê mn̂g.

(BCL) 伊的頭前有路，親像向北的房的款式，長闊攏相同；出入的所在攏照的款式，也照的門。

12

(THR) Chiàu ǹg-lâm hiah ê pâng ê mn̂g, tī lō͘ ê thâu ū mn̂g, chiū-sī tang--sì ê chhiûⁿ bīn-chêng ê lō͘, tī jı̍p-khì ê só͘-chāi.

(BCL) 照向南許個房的門，佇路的頭有門，就是東勢的牆面前的路，佇入去的所在。

13

(THR) I kā góa kóng, Keh-khui ê só͘-chāi ê thâu-chêng, chiah ê pak--sì ê pâng, lâm--sì ê pâng, lóng sī sèng ê pâng; chhin-kūn Iâ-hô-hoa ê chè-si beh tī-hia chia̍h chì-sèng ê mı̍h; iā ēng chì-sèng ê mı̍h, chiū-sī sò͘-chè, sio̍k-chōe-chè, pó͘-kè-sit ê chè, hē tī hit só͘-chāi, in-ūi chit só͘-chāi sī sèng.

(BCL) 伊給我講：「隔開的所在的頭前諸個北勢的房，南勢的房，攏是聖的房；親近耶和華的祭司欲佇遐食至聖的物，也用至聖的物，就是素祭、贖罪祭、補過失的祭，下佇彼所在，因為此所在是聖。

14

(THR) Chè-si jı̍p-khì ê sî, chiū m̄-thang tùi sèng-só͘ chhut-lâi kàu gōa-īⁿ; tio̍h tī-hia pàng-hē in kiâⁿ chit-hūn ê sî só͘ chhēng ê saⁿ; in-ūi he sī sèng; tio̍h ōaⁿ in ê saⁿ, chiah thang kàu sio̍k tī peh-sìⁿ--ê.

(BCL) 祭司入去的時，就呣通對聖所出來到外院，著佇遐放下行職份的時所穿的衫，因為彼是聖；著換的衫才通到屬佇百姓的。」

15

(THR) I niû lāi-chhù bêng-pe̍k, chiū chhōa góa chhut ǹg-tang ê mn̂g, niû i ê sì-ûi.

(BCL) 伊量內厝明白，就導我出向東的門，量伊的四圍。

16

(THR) I ēng ko-chhioh niû tang-hng, chiū-sī ēng ko-chhioh niû i ê sì-ûi, gō͘-pah ko-chhioh.

(BCL) 伊用竿尺量東方就是用竿尺量伊的四圍，五百竿尺，

17

(THR) I ēng ko-chhioh niû pak-hng, niû i ê sì-ûi, gō͘-pah ko-chhioh.

(BCL) 伊用竿尺量北方，量伊的四圍五百竿尺，

18

(THR) I ēng ko-chhioh niû lâm-hng gō͘-pah ko-chhioh.

(BCL) 伊用竿尺量南方五百竿尺，

19

(THR) I o̍at kàu sai-hng ēng ko-chhioh niû--i, gō͘-pah ko-chhioh.

(BCL) 伊越到西方，用竿尺量伊五百竿尺。

20

(THR) I niû i ê sì-hng, sì-ûi ū chhiûⁿ, tn̂g gō͘-pah, khoah gō͘-pah, lâi hun-piat sèng--ê kap pêng-siông--ê.

(BCL) 伊量伊的四方，四圍有牆，長五百，闊五百，來分別聖者及平常者。

Bible Color Mark

• 台語漢字羅馬本
• 巴克禮全羅