以西結書 第 37 章

1

(THR) Iâ-hô-hoa ê chhiú hē tī góa ê sin-chiūⁿ, Iâ-hô-hoa ēng I ê sîn chhōa góa chhut-khì, hē góa tī soaⁿ-kok-tiong; hit ê soaⁿ-kok ū kut-thâu móa-móa.

(BCL) 耶和華的手下佇我的身上。耶和華用伊的神導我出去，下我佇山谷中；彼個山谷有骨頭滿滿。

2

(THR) I hō͘ góa tùi kut-thâu ê sì-ûi keng-kè; khòaⁿ ah, tī soaⁿ-kok ê bīn-chiūⁿ ū kut-thâu chin-chōe, khòaⁿ ah, in chin ko͘-tâ.

(BCL) 伊互我對骨頭的四圍經過，看啊，佇山谷的面上有骨頭真多，看啊，真枯焦。

3

(THR) I tùi góa kóng, Jîn-chú ah, chiah ê kut ōe o̍ah bōe? Góa ìn kóng, Chú Iâ-hô-hoa ah, Lí chai--i.

(BCL) 伊對我講：「人子啊，諸個骨會活？」我應講：「主耶和華啊，你知伊。」

4

(THR) I koh tùi góa kóng, Lí tio̍h tùi chiah ê kut soan-thôan, lâi kā in kóng, Lín ko͘-tâ ê kut ah, tio̍h thiaⁿ Iâ-hô-hoa ê ōe.

(BCL) 伊閣對我講：「你著對諸個骨宣傳來給講：恁枯焦的骨啊，著聽耶和華的話。

5

(THR) Chú Iâ-hô-hoa kā chiah ê kut án-ni kóng, Khòaⁿ ah, Góa beh hō͘ o̍ah-khì jı̍p lín ê lāi-bīn, lín chiū beh o̍ah.

(BCL) 主耶和華給諸個骨按呢講：『看啊，我欲互活氣入恁的內面，恁就欲活。

6

(THR) Góa beh hō͘ lín ê téng-bīn ū kun, koh hō͘ lín ū bah, koh ēng phê kā lín pau, ēng o̍ah-khì jı̍p tī lín, lín chiū ōe o̍ah; lín chiū chai Góa sī Iâ-hô-hoa.

(BCL) 我欲互恁的頂面有筋，閣互恁有肉，閣用皮給恁包，用活氣入佇恁，恁就會活；恁就知我是耶和華。』」

7

(THR) Tùi án-ni, góa thàn bēng-lēng lâi soan-thôan; tng góa teh soan-thôan ê sî, ū siaⁿ, hut-jiân tōe-tāng, chiah ê kut saⁿ liân-ha̍p, ta̍k-ki kui i ê pún-ūi.

(BCL) 對按呢，我趁命令來宣傳。當我宣傳的時，有聲，忽然地動；諸個骨相連合，逐支歸伊的本位。

8

(THR) Góa khòaⁿ i, khòaⁿ-kìⁿ kut ê téng-bīn ū kun, iā ū bah, koh ū phê pau tī i ê téng-bīn; chóng-sī lāi-bīn bô o̍ah-khì.

(BCL) 我看伊，看見骨的頂面有筋，也有肉，閣有皮包佇伊的頂面，總是內面無活氣。

9

(THR) I chiū tùi góa kóng, Lí tio̍h ǹg hong lâi soan-thôan; jîn-chú ah, tio̍h soan-thôan, lâi tùi hong kóng, Chú Iâ-hô-hoa án-ni kóng, O̍ah-khì ah, tùi hiah ê hong lâi, pûn tī chiah ê siū-thâi--ê, hō͘ in ōe o̍ah.

(BCL) 伊就對我講：「你著向風來宣傳，人子啊，著宣傳來對風講，主耶和華按呢講：活氣啊，對許個風來，歕佇諸個受者，互會活。」

10

(THR) Tùi án-ni, góa chiàu I só͘ bēng-lēng góa--ê lâi soan-thôan; o̍ah-khì chiū lâi, jı̍p tī in; in chiū o̍ah, khí--lâi khiā, chiâⁿ-chòe ke̍k-tōa ê kun-tūi.

(BCL) 對按呢，我照伊所命令我的來宣傳，活氣就來入佇，就活，起來徛，成做極大的軍隊。

11

(THR) I chiū kā góa kóng, Jîn-chú ah, chiah ê kut chiū-sī Í-sek-lia̍t ê chôan-ke; khòaⁿ ah, in kóng, Góan ê kut lóng ko͘-tâ, góan ê ǹg-bāng lóng sit-lo̍h; góan it-chīn châu-bia̍t.

(BCL) 伊就給我講：「人子啊，諸個骨就是以色列的全家。看啊，講：『阮的骨攏枯焦，阮的向望攏失落，阮一盡剿滅。』

12

(THR) Só͘-í lí tio̍h soan-thôan, lâi tùi in kóng, Chú Iâ-hô-hoa án-ni kóng, Góa ê peh-sìⁿ ah, khòaⁿ ah, Góa beh khui lín ê bōng, hō͘ lín tùi lín ê bōng khí--lâi, chhōa lín jı̍p Í-sek-lia̍t tōe.

(BCL) 所以你著宣傳來對講，主耶和華按呢講：『我的百姓啊，看啊，我欲開恁的墓，互恁對恁的墓起來，導恁入以色列地。

13

(THR) Góa ê peh-sìⁿ ah, Góa khui lín ê bōng, hō͘ lín tùi lín ê bōng khí--lâi, lín chiū chai Góa sī Iâ-hô-hoa.

(BCL) 我的百姓啊，我開恁的墓，互恁對恁的墓起來，恁就知我是耶和華。

14

(THR) Góa beh chiong Góa ê sîn hē tī lín ê lāi-bīn, lín chiū beh o̍ah; Góa an-tì lín tī pún só͘-chāi, lín chiū chai Góa Iâ-hô-hoa án-ni kóng, iā án-ni chiâⁿ; che sī Iâ-hô-hoa kóng--ê.

(BCL) 我欲將我的神下佇恁的內面，恁就欲活。我安置恁佇本所在，恁就知我─耶和華按呢講，也按呢成。這是耶和華講的。』」

15

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

16

(THR) Jîn-chú ah, lí tio̍h the̍h chı̍t-tè chhâ-pán, tī i ê téng-bīn siá, Ūi Iû-tāi kap i ê tâng-phōaⁿ Í-sek-lia̍t cho̍k; koh the̍h chı̍t tè chhâ-pán, tī i ê téng-bīn siá, Ūi-tio̍h Iok-sek, Í-hoat-liân, kap i ê tâng-phōaⁿ Í-sek-lia̍t chôan-ke ê chhâ-pán.

(BCL) 「人子啊，你著提一塊柴板，佇伊的頂面寫『為猶大及伊的同伴以色列族』；閣提一塊柴板，佇伊的頂面寫『為著約瑟、以法蓮，及伊的同伴以色列全家』的柴板。

17

(THR) Lí tio̍h hō͘ in saⁿ-óa, liân chòe chı̍t-tè chhâ-pán; chiū tī lí ê chhiú-tiong beh chiâⁿ-chòe chı̍t-tè.

(BCL) 你著互相倚連做一塊柴板，就佇你的手中欲成做一塊。

18

(THR) Siat-sú lí ê peh-sìⁿ mn̄g lí kóng, Lí chòe chit-ê sím-mı̍h ì-sù, lí m̄ chí-sī góan mah?

(BCL) 設使你的百姓問你講：『你做此個甚麼意思？你呣指示阮嗎？』

19

(THR) lí chiū tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh the̍h Í-hoat-liân ê chhiú só͘ kia̍h Iok-sek ê chhâ-pán, kap i ê tâng-phōaⁿ Í-sek-lia̍t chiah ê chi-phài; Góa beh hē--i óa tī Iû-tāi ê chhâ-pán, hō͘ i chiâⁿ-chòe chı̍t-tè ê chhâ-pán, chiū i beh chiâⁿ-chòe chı̍t-tè tī Góa ê chhiú.

(BCL) 你就著對講：『主耶和華按呢講：看啊，我欲提以法蓮的手所抬約瑟的柴板，及伊的同伴以色列諸個支派，我欲下伊倚佇猶大的柴板，互伊成做一塊的柴板，就伊欲成做一塊佇我的手。』

20

(THR) Lí só͘ siá hí nn̄g tè chhâ-pán, tio̍h tī in ê ba̍k-chiu-chêng, kia̍h tī lí ê chhiú.

(BCL) 你所寫彼二塊柴板，著佇的目睭前抬佇你的手。

21

(THR) Lí tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh chhú Í-sek-lia̍t cho̍k tùi in só͘ kàu ê ta̍k-kok chhut--lâi; koh tùi sì-ûi chū-chı̍p in, chhōa in tò-lâi pún só͘-chāi.

(BCL) 你著對講，主耶和華按呢講：看啊，我欲取以色列族對所到的逐國出來，閣對四圍聚集，導倒來本所在。

22

(THR) Góa beh hō͘ in tī hit ê tōe, tī Í-sek-lia̍t ê soaⁿ, ha̍p-chòe chı̍t peh-sìⁿ; ū chı̍t ê ông chòe in chèng-lâng ê ông; in bô koh chòe nn̄g-pêng ê peh-sìⁿ, iā bô koh pun-chòe nn̄g-kok.

(BCL) 我欲互佇彼個地，佇以色列的山合做一百姓，有一個王做眾人的王。無閣做二旁的百姓，也無閣分做二國；

23

(THR) Iâ bô koh in-ūi ngó͘-siōng, kap khó-ò͘ⁿ ê mı̍h, í-kı̍p it-chhè ê chōe-kòa, phah lâ-sâm pún-sin; Góa beh kiù in chhut in it-chhè khiā-khí ê só͘-chāi, chiū-sī in hōan-chōe hia; Góa beh chheng-khì in; án-ni, in beh chòe Góa ê peh-sìⁿ; Góa beh chòe in ê Siōng-tè.

(BCL) 也無閣因為偶像及可惡的物，以及一切的罪過拍垃墋本身。我欲救出一切徛起的所在，就是犯罪遐；我欲清氣，按呢，欲做我的百姓，我欲做的上帝。

24

(THR) Góa ê lô͘-po̍k Tāi-pı̍t beh chòe in ê ông; in lóng beh kui tī chı̍t ê bo̍k-chiá; in beh sūn-thàn Góa ê hoat-tō͘, siú Góa ê lu̍t-lē lâi kiâⁿ.

(BCL) 「我的奴僕大衛欲做的王；攏欲歸佇一個牧者。欲順趁我的法度，守我的律例來行。

25

(THR) In beh khiā-khí tī Góa siúⁿ-sù Góa ê lô͘-po̍k Ngá-kok ê tōe; chiū-sī lín ê lia̍t-chó͘ só͘ khiā-khí--ê; in kap in ê kiáⁿ-sun, í-kı̍p kiáⁿ-kiáⁿ sun-sun, lóng éng-óan khiā-khí tī-hia. Góa ê lô͘-po̍k Tāi-pı̍t beh chòe in ê jîn-kun, tı̍t-kàu éng-óan.

(BCL) 欲徛起佇我賞賜我的奴僕雅各的地，就是恁的列祖所徛起的。及的子孫，以及子子孫孫，攏永遠徛起佇遐。我的奴僕大衛欲做的人君，直到永遠。

26

(THR) Koh Góa beh kap in lı̍p pêng-an ê iok, kap in chòe éng-óan ê iok; Góa iā beh kiàn-siat in, hō͘ in ê lâng-gia̍h ke-thiⁿ, koh tī in ê tiong-kan siat-lı̍p Góa ê sèng-só͘ tı̍t-kàu éng-óan.

(BCL) 閣我欲及立平安的約，及做永遠的約。我也欲建設，互的人額加添，閣佇的中間設立我的聖所，直到永遠。

27

(THR) Góa khiā-khí ê só͘-chāi beh tī in tiong-kan; Góa beh chòe in ê Siōng-tè, in beh chòe Góa ê peh-sìⁿ.

(BCL) 我徛起的所在欲佇中間；我欲做的上帝，欲做我的百姓。

28

(THR) Góa ê sèng-só͘ tī in tiong-kan, tı̍t-kàu éng-óan; gōa-pang-lâng chiū beh chai Góa sī Iâ-hô-hoa, hō͘ Í-sek-lia̍t chiâⁿ-chòe sèng-ê.

(BCL) 我的聖所佇中間直到永遠，外邦人就欲知我是耶和華，互以色列成做聖的。」

Bible Color Mark

• 台語漢字羅馬本
• 巴克禮全羅