以西結書 第 24 章

1

(THR) Tē káu-nî cha̍p-ge̍h chhoe-cha̍p jı̍t, Iâ-hô-hoa ê ōe koh lîm-kàu góa, kóng,

(BCL) 第九年十月初十日，耶和華的話閣臨到我講：

2

(THR) Jîn-chú ah, kin-á-jı̍t tú-tú sī Pa-pí-lûn ông chiū-kūn Iâ-lō͘-sat-léng ê jı̍t, lí tio̍h chiong kin-á-jı̍t kì i ê miâ.

(BCL) 「人子啊，今仔日抵抵是巴比倫王就近耶路撒冷的日，你著將今仔日記伊的名，

3

(THR) Tio̍h tùi chit ê pōe-ge̍k ê ke siat phì-jū, kóng, Chú Iâ-hô-hoa án-ni kóng, Chiong tiáⁿ chhāi tī hé--nih; í-keng chhāi hó, chiū piàⁿ chúi tī lāi-bīn,

(BCL) 著對此個悖逆的家設譬喻講，主耶和華按呢講：將鼎祀佇火裡，已經祀好，就傾水佇內面；

4

(THR) chiong bah-tè, chiū-sī it-chhè pûi-súi ê bah-tè, chêng-thúi āu-thúi, lóng khioh hē tī lāi-bīn; kéng hó ê kut thia̍p hō͘ i móa.

(BCL) 將肉塊，就是一切肥娞的肉塊、前腿後腿，攏拾下佇內面，揀好的骨疊互伊滿；

5

(THR) Chhú iûⁿ-kûn-tiong tē-it hó--ê, chiong chhâ thia̍p tī tiáⁿ-ē, hō͘ tiáⁿ kún chhiâng-chhiâng, thang chiong kut kûn tī hí lāi-bīn.

(BCL) 取羊群中第一好的，將柴疊佇鼎下，互鼎滾沖沖，通將骨　佇彼內面。

6

(THR) Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, chiū-sī siⁿ sian ê tiáⁿ, i ê sian iáu-bē tû--khì, tio̍h chiong bah-tè tùi hit tiong-kan chı̍t-tè chı̍t-tè the̍h-chhut-lâi; bô kā i liam-khau.

(BCL) 「主耶和華按呢講：有災禍啊！此個互人流血的城，就是生銹的鼎。伊的銹猶未除去，著將肉塊對彼中間一塊一塊提出來，無給伊拈鬮。

7

(THR) Siâⁿ-tiong ū siū-thâi ê lâng ê huih, piàⁿ tī kng-kng ê chio̍h-pôaⁿ-téng, bô piàⁿ tī tōe--nih, thang ēng thô͘ khàm.

(BCL) 城中有受的人的血，傾佇光光的石磐頂，無傾佇地裡，通用土蓋。

8

(THR) Chit ê siâⁿ-lāi só͘ lâu ê huih, piàⁿ tī kng-kng ê chio̍h-pôaⁿ-téng, bô thang jia-khàm, sī Góa hō͘ i án-ni; ūi-tio̍h beh kek tōa siū-khì, kiâⁿ pò-èng.

(BCL) 此個城內所流的血，傾佇光光的石磐頂，無通遮蓋，是我互伊按呢，為著欲激大受氣行報應。

9

(THR) Só͘-í Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, Góa ia̍h beh thia̍p tōa-tui ê hé-chhâ.

(BCL) 所以主耶和華按呢講：有災禍啊！此個互人流血的城，我亦欲疊大堆的火柴，

10

(THR) Thiⁿ-chhâ hō͘ hé chin iām, chiong bah kûn nōa, chiong thng ngâu khó, hō͘ kut hu-lu--khì.

(BCL) 添柴互火真炎，將肉炤爛，將湯熬洘，互骨灰嚕去；

11

(THR) Chiong tiáⁿ, piàⁿ khang, chhāi tī teh to̍h ê thòaⁿ-téng, hō͘ tiáⁿ pek-jia̍t, hō͘ tâng sio âng, iûⁿ kî-tiong ê ù-òe, tû hit téng-bīn ê sian.

(BCL) 將鼎傾空祀佇的炭頂，互鼎熱互銅燒紅，鎔其中的污穢，除彼頂面的銹。

12

(THR) I tio̍h-bôa ià-siān, chóng-sī só͘ siⁿ tōa-tōa ê sian, iû-gôan bô lak; i ê sian chiū nā tī hé--nih, ia̍h bōe tû-khì.

(BCL) 伊著磨厭倦，總是所生大大的銹猶原無落；伊的銹就若佇火裡亦除去。

13

(THR) Tī lí ê ù-òe tiong ū îm-hēng, Góa bat chheng-khì lí, lí iáu-kú bô chheng-khì; só͘-í lí ê ù-òe bōe koh tit-tio̍h chheng-khì, kàu Góa tùi lí hoat-chhut ê tōa siū-khì soah.

(BCL) 佇你的污穢中有淫行，我曾清氣你，你猶久無清氣。所以你的污穢閣得著清氣，到我對你發出的大受氣息。

14

(THR) Góa Iâ-hô-hoa bat kóng--i; hit ê sū tek-khak chiâⁿ, Góa iā beh kiâⁿ--i, tek-khak bô hóan-hok, tek-khak bô lîn-bín, ia̍h bô thè-hóe; lâng beh chiàu lí ê kú-tōng, chiàu lí ê kiâⁿ-chòe sím-phòaⁿ lí; che sī Chú Iâ-hô-hoa kóng--ê.

(BCL) 我──耶和華曾講伊，彼個事的確成，我也欲行伊，的確無反覆，的確無憐憫，亦無退悔。人欲照你的抬動照你的行做審判你。這是主耶和華講的。」

15

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

16

(THR) Jîn-chú ah, khòaⁿ ah, Góa beh chiong lí ê ba̍k-chiu só͘ ì-ài--ê hut-jiân chhú--khì; chóng-sī lí m̄-thang pi-ai thî-khàu, ia̍h m̄-thang lâu ba̍k-sái.

(BCL) 「人子啊，看啊，我欲將你的目睭所意愛者忽然取去，總是你呣通悲哀啼哭，亦呣通流目屎，

17

(THR) To̍k-to̍k thang àm-chīⁿ thó͘-khùi, m̄-thang chhut-siaⁿ, m̄-thang pān-lí song-sū, thâu-khak iû-gôan tio̍h pau thâu-kun, kha iû-gôan tio̍h chhēng-ôe, m̄-thang ng lí ê chhùi-tûn, iā m̄-thang chia̍h tiàu-song ê piáⁿ.

(BCL) 獨獨通暗靜吐氣，呣通出聲，呣通辦理喪事；頭殼猶原著包頭巾，腳猶原著穿鞋，呣通掩你的嘴唇，也呣通食弔喪的餅。」

18

(THR) Tùi án-ni, góa chiong chit ê sū chá-khí-sî kā peh-sìⁿ kóng; ê-hng góa ê bó͘ chiū sí; keh chá-khí, góa chiū thàn bēng-lēng lâi kiâⁿ.

(BCL) 對按呢我將此個事早起時給百姓講，下昏我的某就死。隔早起我就趁命令來行。

19

(THR) Peh-sìⁿ mn̄g góa kóng, Lí án-ni chòe, kap góan ū sím-mı̍h kan-sia̍p? lí thái-thó bô kā góan kóng?

(BCL) 百姓問我講：「你按呢做及阮有甚麼干涉，你豈可無給阮講？」

20

(THR) Góa ìn in kóng, Iâ-hô-hoa ê ōe lîm-kàu góa kóng,

(BCL) 我應講：「耶和華的話臨到我講：

21

(THR) Lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Khòaⁿ ah, Góa beh phah lâ-sâm Góa ê sèng-só͘, chiū-sī lín ê sè-le̍k só͘ khoa-kháu, lín ê ba̍k-chiu só͘ ì-ài, lín ê sim só͘ thiàⁿ-sioh--ê; koh lín só͘ lâu tī-hia ê kiáⁿ cha-bó͘-kiáⁿ beh tó tī to-ē.

(BCL) 『你著給以西結家講，主耶和華按呢講：看啊，我欲拍垃墋我的聖所，就是恁的勢力所誇口，恁的目睭所意愛，恁的心所疼惜者，閣恁所留佇遐的子查某子欲倒佇刀下。

22

(THR) Hit-sî, lín beh chiàu góa só͘ kiâⁿ--ê lâi kiâⁿ, bô ng lín ê chhùi-tûn, ia̍h bô chia̍h tiàu-song ê piáⁿ.

(BCL) 彼時，恁欲照我所行的來行，無掩恁的嘴唇，亦無食弔喪的餅。

23

(THR) Lín ê thâu-khak iû-gôan pau thâu-kun, kha beh chhēng ôe, bô pi-ai, bô thî-khàu; lín beh tī lín ê chōe-ok tiong siau-bia̍t, saⁿ tùi-bīn thó͘-khùi.

(BCL) 恁的頭殼猶原包頭巾，腳欲穿鞋；無悲哀無啼哭。恁欲佇恁的罪惡中消滅，相對面吐氣。

24

(THR) Í-se-kiat beh án-ni chòe lín ê tiāu-thâu, hōan-nā i só͘ kiâⁿ--ê, lín ia̍h beh án-ni kiâⁿ, chit ê tāi-chì nā kàu, lín chiū chai Góa sī Iâ-hô-hoa.

(BCL) 以西結欲按呢做恁的兆頭；凡若伊所行的，恁亦欲按呢行。此個代誌若到，恁就知我是耶和華。』

25

(THR) Jîn-chú ah, tng Góa tû-khì in só͘ óa-khò ê, kap in só͘ hoaⁿ-hí ê êng-kng, in ê ba̍k-chiu só͘ ì-ài--ê, in ê sim só͘ thiàⁿ-sioh--ê, chiū-sī in ê kiáⁿ-jî,

(BCL) 「人子啊，當我除去所倚靠的，及所歡喜的榮光，的目睭所意愛者，的心所疼惜者就是的子兒。

26

(THR) hit-jı̍t tit-tio̍h thoat-lī ê lâng kiám bô lâi lí chia, hō͘ lí chhin-hī thiaⁿ-kìⁿ chit ê sū mah?

(BCL) 彼日得著脫離的人豈無來你遮，互你親耳聽見此個事嗎？

27

(THR) Tng hit-jı̍t, lí ê chhùi chiū khui, lí chiū kap tit-tio̍h thoat-lī ê lâng kóng-ōe, bô koh é-káu; lí beh án-ni chòe in ê tiāu-thâu; in chiū chai Góa sī Iâ-hô-hoa.

(BCL) 當彼日，你的嘴就開，你就及得著脫離的人講話，無閣啞口。你欲按呢做的兆頭，就知我是耶和華。」

Bible Color Mark

• 台語漢字羅馬本
• 巴克禮全羅