以西結書 第 16 章

1

(THR) Iâ-hô-hoa ê ōe koh lîm-kàu góa kóng,

(BCL) 耶和華的話閣臨到我講：

2

(THR) Jîn-chú ah, lí tio̍h hō͘ Iâ-lō͘-sat-léng chai i hiah ê khó-ò͘ⁿ ê sū,

(BCL) 「人子啊，你著互耶路撒冷知伊許個可惡的事，

3

(THR) kóng, Chú Iâ-hô-hoa tùi Iâ-lō͘-sat-léng án-ni kóng, Lí ê pún-gôan, lí ê chhut-sì, sī tī Ka-lâm tōe; A-mô͘-lī lâng sī lí ê lāu-pē, lí ê lāu-bú sī Hek-lâng.

(BCL) 講主耶和華對耶路撒冷按呢講：你的本源，你的出世，是佇迦南地；亞摩利人是你的老父，你的老母是赫人。

4

(THR) Lūn-kàu lí chhut-sì ê kéng-hóng, tng lí chhut-sì ê jı̍t bô kā lí tńg-châi; iā bô ēng chúi kā lí sóe hō͘ lí chheng-khì; lóng bô kā lí sám iâm, ia̍h bô ēng pò͘ kā lí pau.

(BCL) 論到你出世的景況，當你出世的日無給你轉臍，也無用水給你洗，互你清氣，攏無給你摻鹽，亦無用布給你包。

5

(THR) Bô lâng khòaⁿ-kò͘ lí, kā lí chòe chiah ê sū, lîn-bín lí; lí chhut-sì ê jı̍t hiat tī chhân-iá, sī in-ūi lí hō͘ lâng iàm-ò͘ⁿ.

(BCL) 無人看顧你，給你做諸個事，憐憫你；你出世的日佇田野，是因為你互人厭惡。

6

(THR) Góa tùi lí hia kè, khòaⁿ-kìⁿ lí kō tī lí ê huih-lāi, chiū tùi lí kóng, Lí sui-jiân tī lí ê huih-tiong, iáu-kú thang o̍ah; Góa sı̍t-chāi tùi lí kóng, Lí sui-jiân tī lí ê huih-tiong, iáu-kú thang o̍ah.

(BCL) 「我對你遐過，看見你翱佇你的血內，就對你講：你雖然佇你的血中，猶久通活；我實在對你講：你雖然佇你的血中，猶久通活。

7

(THR) Góa hō͘ lí tióng-sêng, chhin-chhiūⁿ chhân--nih só͘ hoat-siⁿ--ê, koh lí chiām-chiām chiâⁿ-chòe tōa-lâng, bīn-māu chheng-siù, lin phòng, thâu-mn̂g tn̂g; chóng-sī lí iû-gôan chhiah-sin lō͘-thé.

(BCL) 我互你長成親像田裡所發生的，閣你漸漸成做大人，面貌清秀，奶，頭毛長，總是你猶原赤身露體。

8

(THR) Góa tùi lí hia kè, khòaⁿ-kìⁿ lí; khòaⁿ ah, hit-sî sī lí heng-khí ài-chêng ê sî; Góa chiū ēng saⁿ-á-ku khàm lí, jia lí ê thǹg-theh-theh; koh tùi lí chiù-chōa, kap lí kiat-iok; lí chiū sio̍k tī Góa; che sī Chú Iâ-hô-hoa kóng--ê.

(BCL) 「我對你遐過，看見你，看啊，彼時是你興起愛情的時，我就用衫仔裾蓋你，遮你的褪裼裼；閣對你咒誓，及你結約，你就屬佇我。這是主耶和華講的。

9

(THR) Hit-sî Góa ēng chúi sóe lí, sóe chheng-khì lí sin-thé ê huih, koh ēng iû boah lí.

(BCL) 彼時我用水洗你，洗清氣你身體的血，閣用油抹你。

10

(THR) Góa hō͘ lí chhēng siù-hoe ê saⁿ, ia̍h hō͘ lí chhēng hái-káu phê ê ôe, ia̍h ēng iù-tōe-pò͘ hō͘ lí hâ-io; koh ēng tiû-tōan chòe-saⁿ hō͘ lí moa.

(BCL) 我互你穿　花的衫，亦互你穿海狗皮的鞋，亦用幼苧布互你縖腰，閣用綢緞做衫互你，

11

(THR) Góa ēng chng-thāⁿ ê mı̍h chng-thāⁿ lí; ēng chhiú-khôan kòa tī lí ê chhiú, ēng kim-liān-á kòa tī lí ê ām-kún.

(BCL) 我用妝飾的物妝飾你，用手環掛佇你的手，用金鍊仔掛佇你的頷頸。

12

(THR) Góa ia̍h ēng khôan khòa tī lí ê phīⁿ; ēng hī-kau kòa tī lí ê hī-á, ēng súi ê bō tì tī lí ê thâu-khak.

(BCL) 我亦用環靠佇你的鼻，用耳掛佇你的耳仔，用娞的帽戴佇你的頭殼。

13

(THR) Án-ni, lí chiū ū kim-gûn ê chng-thāⁿ; só͘ chhēng--ê sī iù-tōe-pò͘, kap tiû-tōan, kap siù-hoe ê saⁿ; só͘ chia̍h-ê sī iù-iù ê mī, phang ê bı̍t, kap iû; lí ia̍h ke̍k-kî súi, hoat-ta̍t kàu ông-hō͘ ê chun-kùi.

(BCL) 按呢，你就有金銀的妝飾，所穿的是幼苧布及綢緞，及　花的衫；所食的是幼幼的麵、蜂的蜜，及油。你亦極其娞，發達到王后的尊貴。

14

(THR) Lí súi ê miâ-siaⁿ thôan tī lia̍t-kok-tiong; sī tùi lí ê súi ôan-chôan, in-ūi Góa ū ēng Góa ê êng-kng hō͘ lí; che sī Chú Iâ-hô-hoa kóng--ê.

(BCL) 你娞的名聲傳佇列國中，是對你的娞完全，因為我有用我的榮光互你。這是主耶和華講的。

15

(THR) To̍k-to̍k lí óa-khò ka-kī ê súi, koh in-ūi lí ê miâ-siaⁿ, chiū kiâⁿ îm-lōan; lí hòng-chhiòng îm-io̍k, hō͘ kè-lō͘ lâng chhut-chāi i ê ì-sù lâi kiâⁿ.

(BCL) 「獨獨你倚靠家己的娞，閣因為你的名聲就行淫亂。你放縱淫慾，互過路人出在伊的意思來行。

16

(THR) Koh ēng lí ê saⁿ, chng-thāⁿ kôaiⁿ ê só͘-chāi, ngó͘-sek lóng chiâu-pī; tī hit téng-bīn kiâⁿ îm-lōan; chit hō sū bô beh lâi, ia̍h bô koh ū.

(BCL) 閣用你的衫妝飾高的所在，五色攏齊備，佇彼頂面行淫亂。此號事無欲來，亦無閣有。

17

(THR) Lí ia̍h chhú Góa só͘ hō͘ lí kim-gûn súi ê pó-khì; ūi-tio̍h ka-kī chòe lâng ê siōng, kap i kiâⁿ-îm.

(BCL) 你亦取我所互你金銀、娞的寶器為著家己做人的像，及伊行淫；

18

(THR) Koh ēng lí siù-hoe ê saⁿ kā i moa, ia̍h ēng Góa ê ko-iû, Góa ê hiuⁿ-liāu, pâi tī i ê bīn-chêng.

(BCL) 閣用你　花的衫給伊，亦用我的膏油我的香料排佇伊的面前；

19

(THR) Koh Góa só͘ siúⁿ-sù lí ê chia̍h-mı̍h, iù-mī, kap iû kap bı̍t, Góa só͘ ēng lâi iúⁿ-chhī lí--ê, lí chiū ēng--i, pâi tī in ê bīn-chêng, lâi chòe phang-bī, sı̍t-chāi ū án-ni; che sī Chú Iâ-hô-hoa kóng--ê.

(BCL) 閣我所賞賜你的食物，幼麵、及油，及蜜，我所用來養飼你的，你就用伊排佇的面前來做芳味，實在有按呢。這是主耶和華講的。

20

(THR) Koh lí ēng lí ê kiáⁿ , lí ê cha-bó͘-kiáⁿ, chiū-sī lí só͘ kā Góa siⁿ--ê, lâi hiàn hō͘ in chia̍h; lí kiâⁿ chiah ê îm-lōan, kiám sī sió-khóa sū?

(BCL) 閣你用你的子、你的查某子就是你所給我生者來獻互食。你行諸個淫亂豈是小可事？

21

(THR) lí kéng-jiân koh thâi-sí Góa chiah ê kiáⁿ lâi kau-hù i, hō͘ in keng-kè hé lâi kui tī i?

(BCL) 你竟然閣死我諸個子來交付伊，互經過火來歸佇伊？

22

(THR) Lí kiâⁿ chiah-ê it-chhè khó-ò͘ⁿ kap îm-lōan ê sū lóng bô siūⁿ-tio̍h lí sòe-hàn chhiah-sin lō͘-thé, kō tī lí huih-tiong ê jı̍t.

(BCL) 你行諸個一切可惡及淫亂的事，攏無想著你細漢赤身露體翱佇你血中的日。」

23

(THR) Chú Iâ-hô-hoa kóng, Lí ū chai-ē ah, ū chai-ē ah;

(BCL) 「（主耶和華講：你有災禍啊！有災禍啊！）

24

(THR) lí kiâⁿ che it-chhè pháiⁿ-tāi í-āu, koh ūi ka-kī khí hoe-lâu, tī ta̍k tiâu koe-lō͘ khí kôaiⁿ-tâi.

(BCL) 你行這一切歹代以後，閣為家己起花樓，佇逐條街路起高台。

25

(THR) Lí tī it-chhè koe-lō͘-kháu khí kôaiⁿ-tâi, hō͘ lí ê súi piàn chòe khó-ò͘ⁿ--ê; koh kap it-chhè kè-lō͘--ê chōe-chōe kiâⁿ îm-lōan.

(BCL) 你佇一切街路口起高台，互你的娞變做可惡者，閣及一切過路者多多行淫亂。

26

(THR) Lí ia̍h kap lí keh-piah kok, hòng-chhiòng chêng-io̍k ê Ai-kı̍p lâng kiâⁿ-îm, ke-thiⁿ lí ê îm-lōan, jiá Góa siū-khì.

(BCL) 你亦及你隔壁國放縱情慾的埃及人行淫，加添你的淫亂，惹我受氣。

27

(THR) Khòaⁿ ah, Góa chhun-chhut Góa ê chhiú kong-kek lí; kiám-chió lí èng-iōng ê mı̍h; koh chiong lí kau hō͘ òan-hūn lí ê Hui-lī-sū hiah ê cha-bó͘-gín-á, hō͘ in chhut-chāi ì-sù khóan-thāi lí; in khòaⁿ-kìⁿ lí kiâⁿ pháiⁿ, lâi kiàn-siàu.

(BCL) 看啊，我伸出我的手攻擊你，減少你應用的物，閣將你交互怨恨你的非利士許個查某囝仔，互出在意思款待你。看見你行歹，來見誚。

28

(THR) Lí in-ūi hò͘ⁿ-sek put-ti-chiok, koh kap A-su̍t lâng kiâⁿ-îm; kap in kiâⁿ-îm liáu-āu, iû-gôan bô móa-ì.

(BCL) 你因為好色不知足，閣及亞述人行淫，及行淫了後，猶原無滿意，

29

(THR) Lí koh tī Ka-lâm tōe kàu Ka-le̍k-tí kiâⁿ chōe-chōe îm-lōan, iáu-kú bô móa-ì.

(BCL) 你閣佇迦南地到迦勒底，行多多淫亂，猶久無滿意。

30

(THR) Chú Iâ-hô-hoa kóng, Lí kiâⁿ che it-chhè ê sū, sī pà-sèng îm-hū ê só͘ kiâⁿ, khó-kiàn lí ê sim sī jōa lóan-jio̍k.

(BCL) 主耶和華講：你行這一切的事，是霸性淫婦的所行，可見你的心是偌軟弱！

31

(THR) In-ūi lí tī it-chhè koe-lō͘-kháu khí hoe-lâu, tī ta̍k tiâu koe-lō͘ khí kôaiⁿ-tâi; in-ūi lí bô chhin-chhiūⁿ pa̍t ê chhiong-ki, m̄-tı̍h chîⁿ.

(BCL) 因為你佇一切街路口起花樓，佇逐條街路起高台，因為你無親像別個娼妓，呣揲錢。

32

(THR) Gōa! Lí chit ê kiâⁿ-îm ê bó͘ ah, beh tı̍h pa̍t-lâng lâi thòe tiōng-hu!

(BCL) 哇！你此個行淫的某啊，欲揲別人，來替丈夫。

33

(THR) Lâng sī ēng mı̍h sàng chhiong-ki, lí hóan-tńg ēng mı̍h sàng lí siong-hó ê lâng, chhiáⁿ in tùi sì-ûi lâi kap lí kiâⁿ-îm.

(BCL) 人是用物送娼妓，你反轉用物送你相好的人，請對四圍來及你行淫。

34

(THR) Lí ê kiâⁿ-îm kap pa̍t ê hū-jîn-lâng tùi-hóan; in-ūi m̄-sī lâng chhē lí kiâⁿ-îm, sī lí ēng mı̍h sàng lâng, m̄-sī lâng sàng lí; só͘-í lí kap pa̍t-ê hū-jîn-lâng tùi-hóan.

(BCL) 你的行淫及別個婦仁人對反，因為呣是人尋你行淫；是你用物送人，呣是人送你；所以你及別個婦仁人對反。」

35

(THR) In-ūi án-ni, lí chit ê chhiong-ki ah, tio̍h thiaⁿ Iâ-hô-hoa ê ōe;

(BCL) 「因為按呢，你此個娼妓啊，著聽耶和華的話。

36

(THR) Chú Iâ-hô-hoa án-ni kóng, In-ūi lí piàⁿ-chhut lí ê ù-òe; lí kap lí só͘ siong-hó--ê thǹg-theh-theh kiâⁿ-îm; koh in-ūi lí só͘ pài it-chhè khó-ò͘ⁿ ê ngó͘-siōng, koh ūi-tio̍h só͘ lâu lí chiah ê kiáⁿ ê huih, chiū-sī lí só͘ hiàn hō͘ in--ê;

(BCL) 主耶和華按呢講：因為你傾出你的污穢，你及你所相好者褪裼裼行淫，閣因為你所拜一切可惡的偶像，閣為著所流你諸個子的血，就是你所獻互者，

37

(THR) khòaⁿ ah, in-ūi án-ni, Góa beh chū-chı̍p lí it-chhè siong-hó--ê, chiū-sī lí bat kap i iàn-lo̍k--ê, kap lí it-chhè só͘ thiàⁿ--ê, lí it-chhè só͘ òan-hūn-ê, Góa beh tùi sì-ûi chū-chı̍p lâi kong-kek lí, ia̍h beh tùi in lō͘-chhut lí ê thǹg-theh, hō͘ in khòaⁿ lí ê thǹg-theh.

(BCL) 看啊，因為按呢，我欲聚集你一切相好者就是你曾及伊宴樂者，及你一切所疼者，你一切所怨恨者，我欲對四圍聚集來攻擊你；亦欲對露出你的褪裼，互看你的褪裼。

38

(THR) Góa ia̍h beh sím-phòaⁿ lí, chhin-chhiūⁿ sím-phòaⁿ kiâⁿ-îm kap thâi-lâng ê hū-jîn-lâng chı̍t-iūⁿ; Góa beh ēng tōa siū-khì tò͘-khī, hō͘ lí lâu-huih.

(BCL) 我亦欲審判你，親像審判行淫及人的婦仁人一樣。我欲用大受氣妒忌，互你流血。

39

(THR) Góa koh beh chiong lí kau tī in ê chhiú, in beh thiah-húi lí ê hoe-lâu, húi-hōai lí ê kôaiⁿ-tâi, thǹg lí ê saⁿ, chhiúⁿ lí súi ê pó-khì; lâu lí chhiah-sin lō͘-thé.

(BCL) 我閣欲將你交佇的手；欲拆毀你的花樓，毀壞你的高台，褪你的衫，搶你娞的寶器，留你赤身露體。

40

(THR) In iā beh chhōa chōe-chōe lâng khí--lâi kong-kek lí, ēng chio̍h-thâu tìm-sí lí, ēng to-kiàm chha̍k-thàu lí.

(BCL) 也欲導多多人起來攻擊你，用石頭擲死你，用刀劍鑿透你，

41

(THR) Ēng hé sio lí ê chhù-the̍h, tī chōe-chōe hū-jîn-lâng ê bīn-chêng sím-phòaⁿ lí; Góa tek-khak hō͘ lí bô koh kiâⁿ-îm, ia̍h bô koh sàng lâng mı̍h.

(BCL) 用火燒你的厝宅，佇多多婦仁人的面前審判你。我的確互你無閣行淫，亦無閣送人物。

42

(THR) Án-ni, Góa ǹg lí ê tōa siū-khì beh soah, Góa ê tò͘-khī ia̍h beh lī-khui lí; Góa beh an-chēng bô koh siū-khì.

(BCL) 按呢，我向你的大受氣欲息，我的妒忌亦欲離開你，我欲安靜無閣受氣。

43

(THR) In-ūi lí bōe-kì-tit lí sòe-hàn ê jı̍t, tī che it-chhè ê sū lâi kek Góa; só͘-í Góa beh chiàu lí só͘ kiâⁿ--ê, pò-èng tī lí ê thâu-khak-téng; hō͘ lí bô koh kiâⁿ-îm, ke-thiⁿ tī lí it-chhè khó-ò͘ⁿ ê sū; che sī Chú Iâ-hô-hoa kóng--ê.

(BCL) 因為你記得你細漢的日，佇這一切的事來激我，所以我欲照你所行的報應佇你的頭殼頂，互你無閣行淫，加添佇你一切可惡的事。這是主耶和華講的。」

44

(THR) Khòaⁿ ah, kìⁿ-nā kóng sio̍k-gú--ê, beh ēng sio̍k-gú thóe-thak lí, kóng, Lāu-bú án-ni, cha-bó͘-kiáⁿ iā sī án-ni.

(BCL) 「看啊，見若講俗語者欲用俗語挑剔你，講：『老母按呢，查某子也是按呢。』

45

(THR) Lí chin-chiàⁿ sī lín lāu-bú ê cha-bó͘-kiáⁿ, iàm-chiān i ê tiōng-hu kap kiáⁿ-jî; lí chin-chiàⁿ sī lín chí-bē ê chí-bē, iàm-chiān in ê tiōng-hu kap kiáⁿ-jî; lín lāu-bú sī Hek lâng, lín lāu-pē sī A-mô͘-lī lâng.

(BCL) 你真正是恁老母的查某子，厭賤伊的丈夫及子兒；你真正是恁姊妹的姊妹，厭賤的丈夫及子兒。恁老母是赫人，恁老父是亞摩利人。

46

(THR) Lí ê tōa-chí sī Sat-má-lī-a, i kap i ê chèng cha-bó͘-kiáⁿ tiàm tī lí ê tò-pêng; lí ê sió-bē sī Só͘-to-má, i kap i ê chèng cha-bó͘-kiáⁿ tiàm tī lí ê chiàⁿ-pêng.

(BCL) 你的大姊是撒瑪利亞，伊及伊的眾查某子踮佇你的倒旁；你的小妹是所多瑪，伊及伊的眾查某子踮佇你的正旁。

47

(THR) Lí bô o̍h in ê só͘-kiâⁿ, ia̍h bô chiàu in khó-ò͘ⁿ ê sū khì chòe; lí lia̍h chòe sió-khóa sū, lí it-chhè só͘-kiâⁿ-ê, pí in khah-chhàu.

(BCL) 你無學的所行，亦無照可惡的事去做，你掠做小可事，你一切所行的比卡臭。

48

(THR) Chú Iâ-hô-hoa kóng, Góa kí Góa ê éng-o̍ah lâi chiù-chōa; lí ê sió-bē Só͘-to-má, kap i chèng cha-bó͘-kiáⁿ, bē ū kiâⁿ lí kap lí chèng cha-bó͘-kiáⁿ só͘ kiâⁿ ê sū.

(BCL) 主耶和華講：我指我的永活來咒誓，你的小妹所多瑪及伊眾查某子未有行你及你眾查某子所行的事。

49

(THR) Khòaⁿ ah, lí ê sió-bē Só͘-to-má ê chōe sī chit-khóan; i kap i ê chèng cha-bó͘-kiáⁿ, sim-chì kiau-ngō͘, bí-niû pá-chiok, hióng-siū an-ia̍t; lóng bô hû-chō͘ khùn-khó͘ kap sòng-hiong lâng ê chhiú.

(BCL) 看啊，你的小妹所多瑪的罪是此款：伊及伊的眾查某子心志驕傲，米糧飽足，享受安逸，攏無扶助困苦及喪鄉人的手。

50

(THR) In chū-ko, tī Góa ê bīn-chêng kiâⁿ khó-ò͘ⁿ ê sū, Góa khòaⁿ-liáu chiū chiong in tû--khì.

(BCL) 自高，佇我的面前行可惡的事，我看了就將除去。

51

(THR) Sat-má-lī-a só͘ hōan ê chōe bô lí ê chı̍t-pòaⁿ; lí ke-thiⁿ khó-ò͘ⁿ ê sū pí in khah-chōe, koh tùi lí só͘ kiâⁿ it-chhè khó-ò͘ⁿ ê sū, hō͘ lí ê chí-bē hián-bêng sī gī.

(BCL) 撒瑪利亞所犯的罪無你的一半，你加添可惡的事比卡多，閣對你所行一切可惡的事，互你的姊妹顯明是義。

52

(THR) Lí kì-jiân tòan-tēng lí ê chí-bē chòe-gī, chiū tio̍h tam-tng lí ka-kī ê lêng-jio̍k; in-ūi lí só͘ hōan ê chōe pí in khah khó-ò͘ⁿ, in chiū pí lí khah gī; lí í-keng hō͘ lí ê chí-bē hián-bêng sī gī, lí chiū tio̍h kiàn-siàu, tam-tng ka-kī ê lêng-jio̍k.

(BCL) 你既然斷定你的姊妹做義，就著擔當你家己的凌辱；因為你所犯的罪比卡可惡，就比你卡義；你已經互你的姊妹顯明是義，你就著見誚擔當家己的凌辱。」

53

(THR) Góa beh hō͘ in siū-lia̍h-ê tò-tńg--lâi; chiū-sī hō͘ Só͘-to-má kap i ê chèng cha-bó͘-kiáⁿ siū-lia̍h-ê, Sat-má-lī-a kap i ê chèng cha-bó͘-kiáⁿ siū-lia̍h--ê, í-kı̍p in tiong-kan lín siū-lia̍h--ê, lóng tò-tńg--lâi.

(BCL) 「我欲互受掠的倒轉來，就是互所多瑪及伊的眾查某子受掠的，撒瑪利亞及伊的眾查某子受掠者，以及中間恁受掠者，攏倒轉來，

54

(THR) Thang hō͘ lí tam-tng ka-kī ê lêng-jio̍k, koh tùi lí it-chhè só͘ kiâⁿ hō͘ in tit-tio̍h an-ùi--ê, lâi kiàn-siàu.

(BCL) 通互你擔當家己的凌辱，閣對你一切所行互得著安慰的，來見誚。

55

(THR) Lí ê chí-bē Só͘-to-má, kap i ê chèng cha-bó͘-kiáⁿ, beh tò-lâi gôan-ūi; Sat-má-lī-a, kap i ê chèng chá-bó͘-kiáⁿ, beh tò-lâi gôan-ūi; lí, kap lí ê chèng cha-bó͘-kiáⁿ , ia̍h beh tò-lâi gôan-ūi.

(BCL) 你的姊妹所多瑪及伊的眾查某子欲倒來原位；撒瑪利亞及伊的眾查某子，欲倒來原位；你及你的眾查某子，亦欲倒來原位。

56

(THR) Tng lí kiau-ngō͘ ê jı̍t, lí ê chhùi bô kóng-khí lí ê sió-bē Só͘-to-má,

(BCL) 當你驕傲的日，你的嘴無講起你的小妹所多瑪。

57

(THR) hit-sî lí ê pháiⁿ iáu-bē hoat-hiān, A-lân chiah ê cha-bó͘-kiáⁿ, liân i sì-ûi ê lâng, iáu-bē lêng-jio̍k lí; Hui-lī-sū chiah 5 cha-bó͘-kiáⁿ, pêng-sò͘ tī sì-ûi biáu-sī lí--ê, i iā bē ū lêng-jio̍k lí.

(BCL) 彼時你的歹猶未發現，亞蘭諸個查某子連伊四圍的人猶未凌辱你；非利士諸個查某子平素佇四圍藐視你者，伊也未有凌辱你。

58

(THR) Iâ-hô-hoa kóng, Lí hò͘ⁿ-îm kap khó-ò͘ⁿ ê sū, lí í-keng tam-tng lah.

(BCL) 耶和華講：你好淫及可惡的事，你已經擔當啦。」

59

(THR) In-ūi Chú Iâ-hô-hoa án-ni kóng, Lí pōe-iok khòaⁿ-khin chiù-chōa, Góa beh chiàu lí só͘ kiâⁿ lâi khóan-thāi lí.

(BCL) 「因為主耶和華按呢講：你背約看輕咒誓，我欲照你所行來款待你。

60

(THR) Chóng-sī Góa beh tui-liām Góa tī lí siàu-liân ê sî, kap lí só͘ lı̍p ê iok; ia̍h beh kap lí siat-lı̍p éng-óan ê iok.

(BCL) 總是我欲追念我佇你少年的時及你所立的約，亦欲及你設立永遠的約。

61

(THR) Tng lí chiap-la̍p lí ê chí-bē, chiū-sī lí ê tōa-chí kap lí ê sió-bē ê sî, lí beh kì-tit lí só͘ kiâⁿ--ê lâi kiàn-siàu; Góa ia̍h beh chiong in hō͘ lí chòe cha-bó͘-kiáⁿ, to̍k-to̍k m̄-sī tùi lí ê iok.

(BCL) 當你接納你的姊妹就是你的大姊及你的小妹的時，你欲記得你所行的來見誚；我亦欲將互你做查某子，獨獨呣是對你的約。

62

(THR) Góa beh kap lí siat-lı̍p Góa ê iok, lí chiū chai Góa sī Iâ-hô-hoa;

(BCL) 我欲及你設立我的約（你就知我是耶和華），

63

(THR) kàu Góa sià-bián lí it-chhè só͘ chòe ê sî, lí kì-tit chiū kiàn-siàu; koh in-ūi lí ê lêng-jio̍k, chiū bô koh khui-chhùi; che sī Chú Iâ-hô-hoa kóng--ê.

(BCL) 到我赦免你一切所做的時，你記得就見誚，閣因為你的凌辱，就無閣開嘴。這是主耶和華講的。」

Bible Color Mark

• 台語漢字羅馬本
• 巴克禮全羅