以西結書 第 14 章

1

(THR) Ū kúi-nā ê Í-sek-lia̍t ê tióng-ló lâi góa chia, chē tī góa ê bīn-chêng.

(BCL) 有幾若個以色列的長老來我遮，坐佇我的面前。

2

(THR) Iâ-hô-hoa ê ōe chiū lîm-kàu góa kóng,

(BCL) 耶和華的話就臨到我講：

3

(THR) Jîn-chú ah, chiah ê lâng í-keng chiong in ê ngó͘-siōng chiap-la̍p tī in ê sim, koh hē tì-kàu hōan-chōe ê that-gāi tī ka-kī ê bīn-chêng. Góa kiám beh hō͘ i mn̄g mah?

(BCL) 「人子啊，諸個人已經將的偶像接納佇的心，閣下致到犯罪的塞礙佇家己的面前，我豈欲互伊問嗎？

4

(THR) Só͘-í lí tio̍h tùi in kóng, Chú Iâ-hô-hoa án-ni kóng, Í-sek-lia̍t-ke ê tiong-kan kìⁿ-nā chiap-la̍p i ê ngó͘-siōng tī i ê sim-lāi ê lâng, koh hē tì-kàu hōan-chōe that-gāi tī i ka-kī ê bīn-chêng, koh lâi chiū-kūn sian-ti--ê, Góa Iâ-hô-hoa tī i só͘ kiû ê sū, beh chiàu i ê chōe-chōe ngó͘-siōng lâi ìn-tap i;

(BCL) 所以你著對講：『主耶和華按呢講：以色列家的中間，見若接納伊的偶像佇伊的心內的人，閣下致到犯罪塞礙佇伊家己的面前，閣來就近先知者，我──耶和華佇伊所求的事，欲照伊的多多偶像來應答伊，

5

(THR) tì-kàu Góa thang hō͘ Í-sek-lia̍t-ke sim-lāi ka-kī chek-pī, in-ūi in lóng ūi-tio̍h in ê ngó͘-siōng kap Góa chhiⁿ-so͘.

(BCL) 致到我通互以色列家心內家己責備，因為攏為著的偶像及我生疏。』

6

(THR) Só͘-í lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Tio̍h hôe-thâu, o̍at-tńg lī-khui lín ê ngó͘-siōng, o̍at-tńg bīn, bo̍h-tit thàn lín it chhè khó-ò͘ⁿ ê sū.

(BCL) 「所以你著給以色列家講：『主耶和華按呢講：著回頭！越轉離開恁的偶像，越轉面莫得趁恁一切可惡的事。』

7

(THR) In-ūi Í-sek-lia̍t-ke ê lâng, á-sī tī Í-sek-lia̍t tiong kià-kha ê chhut-gōa lâng, kìⁿ-nā kap Góa keh-tn̄g, chiap-la̍p i ê ngó͘-siōng tī i ê sim-lāi, koh hē tì-kàu hōan-chōe ê that-gāi tī i ka-kī ê bīn-chêng, koh lâi chiū-kūn sian-ti, beh ūi ka-kī ê sū lâi mn̄g Góa--ê, Góa Iâ-hô-hoa beh pún-sin ìn-tap i.

(BCL) 因為以色列家的人，抑是佇以色列中寄腳的出外人，見若及我隔斷，接納伊的偶像佇伊的心內，閣下致到犯罪的塞礙佇伊家己的面前，閣來就近先知，欲為家己的事來問我者，我──耶和華欲本身應答伊。

8

(THR) Góa beh ǹg hit-hō lâng pìⁿ-bīn, hō͘ i chòe lâng ê kàm-kài, chòe ōe-pìⁿ, hō͘ lâng gông-ngia̍h; ia̍h beh tùi Góa ê peh-sìⁿ-tiong chián-tû i; lín chiū chai Góa sī Iâ-hô-hoa.

(BCL) 我欲向彼號人變面，互伊做人的鑑戒，做話柄，互人卬愕，亦欲對我的百姓中剪除伊；恁就知我是耶和華。

9

(THR) Sian-ti nā bê-he̍k lâi kóng chı̍t kù ōe, chiū-sī Góa Iâ-hô-hoa bê-he̍k hit ê sian-ti; Góa ia̍h beh chhun-chhiú kong-kek i; chiong i tùi Góa ê peh-sìⁿ Í-sek-lia̍t-tiong tû-bia̍t.

(BCL) 先知若迷惑來講一句話，就是我──耶和華迷惑彼個先知，我亦欲伸手攻擊伊，將伊對我的百姓以色列中除滅。

10

(THR) In beh tam-tng ka-kī ê chōe-kòa, sian-ti ê chōe-kòa, kap kiû-mn̄g i ê lâng ê chōe-kòa, lóng sī chı̍t-iūⁿ.

(BCL) 欲擔當家己的罪過。先知的罪過及求問伊的人的罪過攏是一樣，

11

(THR) Thang hō͘ Í-sek-lia̍t-ke bô koh kiâⁿ bê-lō͘ lī-khui Góa, bô koh in-ūi ta̍k-iūⁿ ê chōe-kòa phah lâ-sâm ka-kī; to̍k-to̍k beh chòe Góa ê peh-sìⁿ, Góa chòe in ê Siōng-tè; che sī Chú Iâ-hô-hoa kóng--ê.

(BCL) 通互以色列家無閣行迷路離開我，無閣因為逐樣的罪過拍垃墋家己，獨獨欲做我的百姓，我做的上帝。這是主耶和華講的。」

12

(THR) Iâ-hô-hoa ê ōe lîm-kàu góa kóng,

(BCL) 耶和華的話臨到我講：

13

(THR) Jîn-chú ah, nā ū kok tùi in ê pōe-ge̍k lâi tek-chōe Góa, Góa ia̍h chhun-chhiú kong-kek i, tōan-cho̍at i só͘ óa-khò ê bí-niû, hō͘ ki-hng lîm-kàu i, tùi in tiong-kan chián-tû lâng kap cheng-siⁿ,

(BCL) 「人子啊，若有國對的悖逆來得罪我，我亦伸手攻擊伊，斷絕伊所倚靠的米糧，互飢荒臨到伊，對中間剪除人及精牲；

14

(THR) kî-tiong sui-jiân ū Ná-a, Tān-í-lí, Iok-pek, chí saⁿ-lâng; in chí-ū ōe in-ūi in ê gī lâi kiù ka-kī ê sìⁿ-miā nā-tiāⁿ; che sī Chú Iâ-hô-hoa kóng--ê.

(BCL) 其中雖然有挪亞、但以理、約伯此三人，只有會因為的義來救家己的生命若定。這是主耶和華講的。

15

(THR) Góa nā hō͘ ok-siù keng-kè hit ê tōe lâi sún-hōai, hō͘ hit só͘-chāi hong-hòe; in-ūi chiah ê siù ê iân-kò͘, tì-kàu bô lâng tùi hia keng-kè,

(BCL) 我若互惡獸經過彼個地來損壞，互彼所在荒廢，因為諸個獸的緣故，致到無人對遐經過；

16

(THR) sui-jiân ū chí saⁿ-lâng tī in tiong-kan, Chú Iâ-hô-hoa kóng, Góa kí Góa ê éng-o̍ah lâi chiù-chōa, in bōe kiù in ê kiáⁿ cha-bó͘-kiáⁿ, chí-ū in pún-sin tit-tio̍h kiù nā-tiāⁿ, tōe-hng iû-gôan hong-hòe.

(BCL) 雖然有此三人佇中間，主耶和華講：我指我的永活來咒誓，救的子查某子，只有本身得著救若定，地方猶原荒廢。

17

(THR) Á-sī Góa hō͘ to-kiàm lîm-kàu hit ê tōe-hng kóng, To-kiàm ah, lí tio̍h keng-kè hit ê tōe-hng, tì-kàu Góa tùi in tiong-kan chián-tû lâng kap cheng-siⁿ,

(BCL) 抑是我互刀劍臨到彼個地方，講：刀劍啊，你著經過彼個地方，致到我對中間剪除人及精牲；

18

(THR) sui-jiân ū chí saⁿ-lâng tī in tiong-kan, Chú Iâ-hô-hoa kóng, Góa kí Góa ê éng-o̍ah lâi chiù-chōa, in bōe kiù in ê kiáⁿ cha-bó͘-kiáⁿ, chí-ū in pún-sin tit-tio̍h kiù nā-tiāⁿ.

(BCL) 雖然有此三人佇中間，主耶和華講：我指我的永活來咒誓，救的子查某子，只有本身得著救若定。

19

(THR) Á-sī Góa hō͘ un-e̍k liû-hêng hit ê tōe-hng, hō͘ Góa piàⁿ-chhut bia̍t miā ê tōa siū-khì tī in ê téng-bīn, thang tùi in tiong-kan chián-tû lâng kap cheng-siⁿ,

(BCL) 抑是我互瘟疫流行彼個地方，互我傾出滅命的大受氣佇的頂面，通對中間剪除人及精牲；

20

(THR) sui-jiân ū Ná-a, Tān-í-lí, Iok-pek tī in tiong-kan, Chú Iâ-hô-hoa kóng, Góa chí Góa ê éng-o̍ah lâi chiù-chōa, in bōe kiù in ê kiáⁿ cha-bó͘-kiáⁿ, chí-ū ōe in-ūi in ê gī lâi kiù ka-kī ê sìⁿ-miā nā-tiāⁿ.

(BCL) 雖然有挪亞、但以理、約伯佇中間，主耶和華講：我指我的永活來咒誓，救的子查某子，只有會因為的義來救家己的生命若定。」

21

(THR) Chú Iâ-hô-hoa án-ni kóng, Hô-hòng Góa chiong Góa sì-hāng ê tōa chai-ē, chiū-sī to-kiàm, ki-hng, ok-siù, un-e̍k, kàng-lo̍h tī Iâ-lō͘-sat-léng, tùi hit tiong-kan chián-tû lâng kap cheng-siⁿ, kiám-m̄-sī koh-khah bōe kiù--tit mah?

(BCL) 主耶和華按呢講：「何況我將我四項的大災禍──就是刀劍、飢荒、惡獸、瘟疫降落佇耶路撒冷，對彼中間剪除人及精牲，豈呣是閣卡救得嗎？

22

(THR) Khòaⁿ ah, beh ū só͘ chhun ê lâng lâu-teh, chiū-sī siū lia̍h--chhut-lâi ê kiáⁿ cha-bó͘-kiáⁿ, khòaⁿ ah, in beh chhut-lâi kàu lín chia, lín beh khòaⁿ in ê só͘ kiâⁿ só͘ chòe, chiū lín lūn-kàu Góa só͘ kàng-lo̍h tī Iâ-lō͘-sat-léng ê chai-ē, chiū-sī Góa it-chhè kàng-lo̍h tī in téng-bīn ê, beh tit-tio̍h an-ùi.

(BCL) 看啊，欲有所剩的人留，就是受掠出來的子查某子，看啊，欲出來到恁遮，恁欲看的所行所做，就恁論到我所降落佇耶路撒冷的災禍，就是我一切降落佇頂面的，欲得著安慰。

23

(THR) Lín khòaⁿ in só͘ kiâⁿ só͘ chòe--ê, beh siū an-ùi; chiū chai Góa tī Iâ-lō͘-sat-léng só͘ kiâⁿ--ê, m̄-sī bô iân-kò͘; che sī Chú Iâ-hô-hoa kóng--ê.

(BCL) 恁看所行所做的，欲受安慰，就知我佇耶路撒冷所行的呣是無緣故。這是主耶和華講的。」

Bible Color Mark

• 台語漢字羅馬本
• 巴克禮全羅