以斯帖記 第 9 章

1

(THR) Cha̍p-jī ge̍h, chiū-sī A-ta̍t ge̍h, cha̍p-saⁿ jı̍t ông ê bēng-lēng kap jū-chí tit-beh kú-hêng, chiū-sī Iû-tāi lâng ê tùi-te̍k ǹg-bāng tit-tio̍h kóan-hat in ê jı̍t, chóng-sī tāi-chì tùi-hóan, hóan-tńg hō͘ Iû-tāi lâng kóan-hat kìⁿ-nā òan-hūn in ê lâng.

(BCL) 十二月，就是亞達月十三日，王的命令及諭旨得欲舉行，就是猶大人的對敵向望得著管轄的日，總是代誌對反，反轉互猶大人管轄見若怨恨的人。

2

(THR) hit-jı̍t tī A-hap-sûi-ló͘ ông ê ta̍k-séng, Iû-tāi lâng lóng chū-chı̍p tī in ê siâⁿ, hē chhiú kong-kek hiah ê beh hāi in ê lâng, bô lâng ōe tí-tng in, in-ūi chèng peh-sìⁿ lóng kiaⁿ in.

(BCL) 彼日佇亞哈隨魯王的逐省猶大人攏聚集佇的城，下手攻擊許個欲害的人。無人會抵當，因為眾百姓攏驚。

3

(THR) Ta̍k-séng ê siú-léng, tāi-sîn, chóng-tok, kap pān-lí ông ê sū ê lâng, lóng lâi pang-chān Iû-tāi lâng, in-ūi kiaⁿ Bo̍k-tí-kái.

(BCL) 逐省的首領、大臣、總督，及辦理王的事的人，攏來幫助猶大人，因為驚末底改。

4

(THR) In-ūi Bo̍k-tí-kái tī tiâu-têng chun-tōa, miâ-siaⁿ piàn-thôan ta̍k-séng; chit ê Bo̍k-tí-kái ná-seng ná-tōa.

(BCL) 因為末底改佇朝廷尊大，名聲遍傳逐省，此個末底改愈升愈大。

5

(THR) Iû-tāi lâng ēng to phah in it-chhè ê tùi-te̍k, thâi-sí in, châu-bia̍t in, chhut-chāi ì-sù kiâⁿ tī òan-hūn in ê lâng;

(BCL) 猶大人用刀拍一切的對敵，死剿滅出在意思行佇怨恨的人。

6

(THR) tī Su-san siâⁿ, Iû-tāi lâng thâi-bia̍t gō͘-pah lâng;

(BCL) 佇書珊城，猶大人滅五百人；

7

(THR) koh thâi-sí Pa-san-tāi-tha, Ta̍t-hun, A-su-phàⁿ-tha,

(BCL) 閣死巴珊大他、達分、亞斯帕他、

8

(THR) Phò-la̍h-tha, A-tāi-lī-ngá, A-lī-tāi-tha,

(BCL) 破拉他、亞大利雅、亞利大他、

9

(THR) Phàⁿ-má-su-tha, A-lī-sài, A-lī-tāi, Óa-iâ-sat-tha;

(BCL) 帕瑪斯他、亞利賽、亞利大、瓦耶撒他；

10

(THR) chí(**chit) cha̍p-lâng lóng sī Hap-bí-tāi-tha ê sun, Iû-tāi lâng ê tùi-te̍k Hap-bān ê kiáⁿ; chóng-sī bô chhiúⁿ in ê châi-bu̍t.

(BCL) 此十人攏是哈米大他的孫、猶大人的對敵哈曼的子。總是無搶的財物。

11

(THR) Tng hit-jı̍t chiong Su-san siâⁿ siū-thâi ê lâng-gia̍h thêng-pò tī ông ê bīn-chêng.

(BCL) 當彼日，將書珊城受的人額呈報佇王的面前。

12

(THR) Ông kā ông-hō͘ Í-su-thiap kóng, Iû-tāi lâng tī Su-san siâⁿ thâi-sí tùi-te̍k gō͘-pah lâng, koh thâi-sí Hap-bān cha̍p ê kiáⁿ; tī ông kî-û ê ta̍k-séng m̄-chai chòe cháiⁿ-iūⁿ; taⁿ lí só͘ chhéng sī sím-mı̍h? beh hō͘ lí; lí só͘ kiû sī sím-mı̍h? iā beh chòe-chiâⁿ i.

(BCL) 王給王后以斯帖講：「猶大人佇書珊城死對敵五百人，閣死哈曼十個子，佇王其餘的逐省呣知做怎樣？今你所請是甚麼，欲互你；你所求是甚麼，也欲做成伊。」

13

(THR) Í-su-thiap chiū kóng, Ông nā lia̍h-chòe hó, kiû lí chún Su-san ê Iû-tāi lâng, bîn-á-jı̍t iā chiàu kin-á-jı̍t ê jū-chí lâi kiâⁿ, iā chiong Hap-bān cha̍p ê kiáⁿ tiàu tī chhâ-kè--nih.

(BCL) 以斯帖就講：「王若掠做好，求你准書珊的猶大人，明仔日也照今仔日的諭旨來行，也將哈曼十個子吊佇柴架裡。」

14

(THR) Ông chiū bēng-lēng chiàu án-ni kiâⁿ; hit ê jū-chí thôan tī Su-san, lâng chiū chiong Hap-bān cha̍p ê kiáⁿ tiàu--khí-lâi.

(BCL) 王就命令照按呢行。彼個諭旨傳佇書珊，人就將哈曼十個子吊起來。

15

(THR) A-ta̍t ge̍h cha̍p-sì jı̍t, Su-san ê Iû-tāi lâng koh chū-chı̍p tī Su-san. thâi-sí saⁿ-pah lâng; chóng-sī bô chhiúⁿ in ê châi-bu̍t.

(BCL) 亞達月十四日，書珊的猶大人閣聚集佇書珊，死三百人，總是無搶的財物。

16

(THR) Tī ông ta̍k-séng kî-ū ê Iû-tāi lâng iā lóng chū-chı̍p, khí-lâi pó-hō͘ ka-kī ê sìⁿ-miā, thoat-lī tùi-te̍k, hióng-siū pêng-an, thâi-sí òan-hūn in ê lâng chhit-bān gō͘-chheng, chóng-sī bô chhiúⁿ in ê châi-bu̍t.

(BCL) 佇王逐省其餘的猶大人也攏聚集起來保護家己的生命，脫離對敵，享受平安。死怨恨的人七萬五千，總是無搶的財物。

17

(THR) A-ta̍t ge̍h cha̍p-saⁿ jı̍t kiâⁿ chit ê sū, cha̍p-sì jı̍t an-hioh, ēng chit-jı̍t siat iân-sia̍h chòe hoaⁿ-hí ê jı̍t.

(BCL) 亞達月十三日，行此個事；十四日安息，用此日設筵席做歡喜的日。

18

(THR) Chóng-sī Su-san ê Iû-tāi lâng chí cha̍p-saⁿ cha̍p-sì jı̍t chū-chı̍p; cha̍p-gō͘ jı̍t an-hioh, ēng chit-jı̍t chòe siat iân-sia̍h hoaⁿ-hí ê jı̍t;

(BCL) 總是書珊的猶大人，此十三、十四日聚集；十五日安息，用此日做設筵席歡喜的日。

19

(THR) só͘-í tiàm tī hiuⁿ-siā ê Iû-tāi lâng, khiā-khí tī bô siâⁿ-chhiûⁿ ê po͘-thâu, taⁿ lóng ēng A-ta̍t ge̍h cha̍p-sì jı̍t chòe siat iân-sia̍h hoaⁿ-hí ê jı̍t, chòe hó ê jı̍t, ēng lé-mı̍h saⁿ-sàng.

(BCL) 所以踮佇鄉社的猶大人，徛起佇無城牆的埠頭，今攏用亞達月十四日做設筵席歡喜的日，做好的日，用禮物相送。

20

(THR) Bo̍k-tí-kái kì-chài hiah ê sū, koh siá-phoe hō͘ A-hap-sûi-ló͘ ông ta̍k-séng hn̄g-kūn só͘ ū ê Iû-tāi lâng,

(BCL) 末底改記載許個事，閣寫批互亞哈隨魯王逐省遠近所有的猶大人，

21

(THR) tiāⁿ-tio̍h in ta̍k-nî tio̍h siú A-ta̍t ge̍h cha̍p-sì cha̍p-gō͘ nn̄g jı̍t;

(BCL) 定著逐年著守亞達月十四、十五二日，

22

(THR) chí(**chit)nn̄g jı̍t sī Iû-tāi lâng thoat-lī tùi-te̍k tit-tio̍h pêng-an ê jı̍t; hit-ge̍h sī iu-būn piàn-chòe hoaⁿ-hí, pi-ai piàn-chòe hó ê jı̍t; iā tio̍h siú chí(**chit)nn̄g-jı̍t chòe siat iân-sia̍h hoaⁿ-hí, tāi-ke ēng lé-mı̍h saⁿ-sàng, chín-chè sòng-hiong lâng ê jı̍t.

(BCL) 此二日是猶大人脫離對敵得著平安的日，彼月是憂悶變做歡喜，悲哀變做好的日。也著守此二日做設筵席歡喜，大家用禮物相送，賑濟喪鄉人的日。

23

(THR) Tùi án-ni Iû-tāi lâng, chiàu Bo̍k-tí-kái só͘ siá hō͘ in ê phoe, sêng-jīn beh chiàu in khí-thâu kiâⁿ-ê lâi siú i;

(BCL) 對按呢，猶大人照末底改所寫互的批，承認欲照起頭行的來守伊；

24

(THR) in-ūi Iû-tāi lâng ê tùi-te̍k, A-kah cho̍k Hap-bí-tāi-tha ê kiáⁿ Hap-bān, siat kè-bô͘ kong-kek Iû-tāi lâng beh bia̍t in, po̍ah phó͘-jíⁿ, chiū-sī thiu-chhiam, ūi-tio̍h beh pāi-hōai in, châu-bia̍t in;

(BCL) 因為猶大人的對敵亞甲族哈米大他的子哈曼設計謀攻擊猶大人欲滅，博普珥，就是抽籤，為著欲敗壞，剿滅；

25

(THR) chóng-sī chit ê tāi-chì kàu ông ê bīn-chêng, ông chiū kàng jū-chí hō͘ Hap-bān kè-bô͘ hāi Iû-tāi lâng ê pháiⁿ kè-bô͘ kui tī i ka-kī ê thâu-khak, koh tiàu i kap i hiah ê kiáⁿ tī chhâ-kè-téng.

(BCL) 總是此個代誌到王的面前，王就降諭旨互哈曼計謀害猶大人的歹計謀歸佇伊家己的頭殼，閣吊伊及伊許個子佇柴架頂。

26

(THR) Tùi án-ni in chiàu phó͘-jíⁿ ê miâ chiū kiò hiah ê jı̍t chòe phó͘-jíⁿ-jı̍t. In in-ūi chit tiuⁿ phoe lóng-chóng ê ōe, í-kı̍p in tī chit ê sū só͘ chhin-ba̍k khòaⁿ-kìⁿ chhin-sin tú-tio̍h ê sū,

(BCL) 對按呢照普珥的名，就叫許個日做「普珥日」。因為此張批攏總的話，以及佇此個事所親目看見親身抵著的事，

27

(THR) Iû-tāi lâng chiū koat-ì sêng-jīn in kap in ê hō͘-è, í-kı̍p kìⁿ-nā kui-óa in ê lâng, nî-nî beh chiàu só͘ kì-chài, só͘ tiāⁿ-tio̍h ê kî, siú chí(**chit)nn̄g jı̍t, hō͘ i bô hòe-bô;

(BCL) 猶大人就決意承認及的後裔，以及見若歸倚的人，年年欲照所記載所定著的期守此二日，互伊無廢無。

28

(THR) koh beh kì-liām lâi siú hiah ê jı̍t, tī ta̍k-tāi, ta̍k-ke, ta̍k-séng, ta̍k-siâⁿ, hō͘ phó͘-jíⁿ ê jı̍t tī Iû-tāi lâng ê tiong-kan bô hòe-bô; tī in ê hō͘-è kì-liām bô soah.

(BCL) 閣欲紀念來守許個日，佇逐代、逐家、逐省、逐城，互普珥的日佇猶大人的中間無廢無，佇的後裔紀念無息。

29

(THR) Hit-sî A-pí-hâi ê cha-bó͘-kiáⁿ ông-hō͘ Í-su-thiap kap Iû-tāi lâng Bo̍k-tí-kái, ēng choan(**chôan)-kôan siá lâi kian-kò͘ phó͘-jíⁿ ê tē-jī tiuⁿ phoe;

(BCL) 彼時亞比孩的查某子──王后以斯帖及猶大人末底改，用全權寫來堅固普珥的第二張批，

30

(THR) koh ēng hô-pêng sêng-sı̍t ê ōe, siá phoe hō͘ A-hap-sûi-ló͘ ông kok-lāi chı̍t-pah jī-cha̍p-chhit séng só͘ ū ê Iû-tāi lâng,

(BCL) 閣用和平誠實的話，寫批互亞哈隨魯王國內一百二十七省所有的猶大人，

31

(THR) beh kian-kò͘ chit ê phó͘-jíⁿ ê jı̍t tī in só͘ tiāⁿ-tio̍h ê kî, chiàu Iû-tāi lâng Bo̍k-tí-kái kap ông-hō͘ Í-su-thiap só͘ bēng-lēng in ê, iā chiàu Iû-tāi lâng ūi ka-kī kap in ê hō͘-è só͘ tiāⁿ-tio̍h ê, kìm-chia̍h thî-khàu.

(BCL) 欲堅固此個「普珥的日」，佇所定著的期，照猶大人末底改及王后以斯帖所命令的，也照猶大人為家己及的後裔所定著的，禁食啼哭。

32

(THR) Í-su-thiap ê chiàu-bēng kian-kò͘ phó͘-jíⁿ ê sū, iā ū kì tī chheh--nih.

(BCL) 以斯帖的詔命堅固「普珥」的事，也有記佇冊裡。

Bible Color Mark

• 台語漢字羅馬本
• 巴克禮全羅