以斯帖記 第 5 章

1

(THR) Tē-saⁿ jı̍t, Í-su-thiap chhēng ông-hō͘ ê lé-ho̍k, khiā tī ông-kiong ê lāi-īⁿ, tī ông-kiong ê tùi-bīn; hit-sî ông tī ông-kiong-lāi chē i ê ông-ūi, tī ông-kiong ê mn̂g ê tùi-bīn.

(BCL) 第三日，以斯帖穿王后的禮服，徛佇王宮的內院，佇王宮的對面。彼時王佇王宮內坐伊的王位，佇王宮的門的對面。

2

(THR) Ông khòaⁿ-kìⁿ ông-hō͘ Í-su-thiap khiā tī īⁿ-lāi, i chiū tit-tio̍h un-tián tī ông ê ba̍k-chiu-chêng; ông kia̍h-khí chhiú-tiong só͘ kia̍h ê kim kóaiⁿ-á ǹg Í-su-thiap. Í-su-thiap chiū chìn-chêng, bong i kóaiⁿ-á ê bé-liu.

(BCL) 王看見王后以斯帖徛佇院內，伊就得著恩典佇王的目睭前，王抬起手中所抬的金枴仔向以斯帖；以斯帖就進前摸伊枴仔的尾溜。

3

(THR) Ông tùi i kóng, Ông-hō͘ Í-su-thiap ah, lí beh tı̍h sím-mı̍h, beh kiû sím-mı̍h? chiū nā kok ê chı̍t-pòaⁿ, iā beh hō͘ lí.

(BCL) 王對伊講：「王后以斯帖啊，你欲揲甚麼？欲求甚麼，就若國的一半也欲互你。」

4

(THR) Í-su-thiap kóng, Ông nā lia̍h-chòe hó, chiū chhiáⁿ ông kap Hap-bān kin-á-jı̍t lâi hù góa ūi-tio̍h i só͘ siat ê iân-sia̍h.

(BCL) 以斯帖講：「王若掠做好，就請王及哈曼今仔日來赴我為著伊所設的筵席。」

5

(THR) Ông chiū kóng, Bēng-lēng Hap-bān kín-kín lâi, thang chiàu Í-su-thiap só͘-kóng-ê khì kiâⁿ. Ông kap Hap-bān chiū khì hù Í-su-thiap só͘ siat ê iân-sia̍h.

(BCL) 王就講：「命令哈曼緊緊來通照以斯帖所講的去行。」王及哈曼就去赴以斯帖所設的筵席。

6

(THR) Tī chiú-iân ê tiong-kan, ông koh kā Í-su-thiap kóng, Lí só͘ chhéng sī sím-mı̍h? beh hō͘ lí; lí só͘ kiû sī sím-mı̍h? chiū nā kok ê chı̍t-pòaⁿ, iā beh chòe-chiâⁿ i.

(BCL) 佇酒筵的中間，王閣給以斯帖講：「你所請是甚麼，欲互你；你所求是甚麼，就若國的一半也欲做成伊。」

7

(THR) Í-su-thiap ìn kóng, Góa só͘ chhéng só͘ kiû ê sī án-ni;

(BCL) 以斯帖應講：「我所請，所求的是按呢。

8

(THR) góa nā tit-tio̍h un-tián tī ông ê ba̍k-chiu-chêng, ông nā hoaⁿ-hí ún-chún góa só͘ chhéng, kiâⁿ góa só͘ kiû ê, chiū chhiáⁿ ông kap Hap-bān lâi hù góa só͘ beh thòe in siat ê iân-sia̍h; góa bîn-á-jı̍t beh chiàu ông só͘ kóng ê lâi kiâⁿ.

(BCL) 我若得著恩典佇王的目睭前，王若歡喜允准我所請，行我所求的，就請王及哈曼來赴我所欲替設的筵席。我明仔日欲照王所講的來行。」

9

(THR) Hit-jı̍t Hap-bān hoaⁿ-hí, sim-lāi khòai-lo̍k, chiū chhut-lâi; chóng-sī Hap-bān khòaⁿ-kìⁿ Bo̍k-tí-kái tī ông ê mn̂g bô khí-lâi, iā bô ūi-tio̍h i lâi tín-tāng, chiū móa-sim siū-khì Bo̍k-tí-kái.

(BCL) 彼日哈曼歡喜，心內快樂就出來；總是哈曼看見末底改佇王的門無起來，也無為著伊來振動，就滿心受氣末底改。

10

(THR) Chóng-sī Hap-bān ka-kī bián-kióng lún--teh, tò-khì in chhù; chiū chhe lâng kiò i ê pêng-iú kap i ê bó͘ Sè-lī-su.

(BCL) 總是哈曼家己勉強惴倒去厝，就差人叫伊的朋友及伊的某細利斯。

11

(THR) Hap-bān chiū chiong i pù-ū ê êng-kng, kap kiáⁿ-jî ê chōe, kap ông ko-seng i, kú-khí i pôaⁿ-kè ông hiah ê siú-léng jîn-sîn ê téng-bīn, lóng kóng hō͘ in thiaⁿ.

(BCL) 哈曼就將伊富有的榮光，及子兒的多，及王高升伊舉起伊過王許個首領人臣的頂面，攏講互聽。

12

(THR) Hap-bān koh kóng, Ông-hō͘ Í-su-thiap, tû-khì góa í-gōa, m̄-chún sím-mı̍h lâng kap ông hù i só͘ siat ê iân-sia̍h; bîn-á-jı̍t góa iū-koh kap ông hō͘ i chhiáⁿ;

(BCL) 哈曼閣講：「王后以斯帖，除去我以外呣准甚麼人及王赴伊所設的筵席。明仔日我又閣及王互伊請；

13

(THR) chóng-sī góa khòaⁿ-kìⁿ Iû-tāi lâng Bo̍k-tí-kái chē tī ông ê mn̂g, chiū chit-ê lóng bô lī-ek tī góa.

(BCL) 總是我看見猶大人末底改坐佇王的門，就此個攏無利益佇我。」

14

(THR) I ê bó͘ Sè-lī-su kap i ê chèng pêng-iú kā i kóng, Tio̍h khiā chı̍t ê chhâ-kè kôaiⁿ gō͘-cha̍p tiú, bîn-á-chá-khí kiû ông tiàu Bo̍k-tí-kái tī hí téng-bīn: jiân-āu lí thang hoaⁿ-hoaⁿ hí-hí kap ông khì hù iân-sia̍h. Hap-bān o-ló i ê ōe hó, chiū kah lâng khiā chhâ-kè.

(BCL) 伊的某細利斯及伊的眾朋友給伊講：「著　一個柴架高五十肘，明仔早起求王吊末底改佇彼頂面，然後你通歡歡喜喜及王去赴筵席。」哈曼謳咾伊的話好，就教人　柴架。

Bible Color Mark

• 台語漢字羅馬本
• 巴克禮全羅