傳道書 第 10 章

1

(THR) Sí ê hô͘-sîn hō͘ chòe hiuⁿ-liāu--ê ê iû hoat-chhut chhàu-bī; án-ni chı̍t-tiám-á ê gû-gōng iā ōe pāi-hōai tōa tì-hūi kap chun-kùi.

(BCL) 死的蝴蠅互做香料者的油發出臭味；按呢，一點仔的愚戇也會敗壞大智慧及尊貴。

2

(THR) Tì-hūi ê lâng ê sim sī tī i ê chiàⁿ-chhiú pêng, gû-gōng ê lâng ê sim sī tī i ê tò-chhiú pêng.

(BCL) 智慧的人的心是佇伊的正手旁；愚戇的人的心是佇伊的倒手旁。

3

(THR) Koh gōng-lâng kiâⁿ tī lō͘--nih, khiàm-kheh tì-hūi, tùi chèng-lâng kóng i sī gōng-lâng.

(BCL) 閣戇人行佇路裡欠缺智慧，對眾人講，伊是戇人。

4

(THR) Chiáng-kôan--ê ê sim-sîn siūⁿ beh kong-kek lí, m̄-thang lī-khui lí ê pún-ūi, in-ūi un-hô ōe bián-tit tōa ê kè-sit.

(BCL) 掌權者的心神想欲攻擊你，呣通離開你的本位，因為溫和會免得大的過失。

5

(THR) Góa khòaⁿ-kìⁿ jı̍t-kng ê ē-bīn, ū chı̍t hāng m̄-hó, chhin-chhiūⁿ chhut tī chiáng-kôan--ê ê chhò-gō͘;

(BCL) 我看見日光的下面有一項呣好，親像出佇掌權者的錯誤，

6

(THR) chiū-sī an-tì gōng-lâng tī kôaiⁿ-ūi, hó-gia̍h lâng chē tī kē-ūi.

(BCL) 就是安置戇人佇高位；好額人坐佇低位。

7

(THR) góa khòaⁿ-kìⁿ lô͘-po̍k khiâ bé, kùi-cho̍k chhin-chhiūⁿ lô͘-po̍k kiâⁿ tī tōe--nih.

(BCL) 我看見奴僕騎馬，貴族親像奴僕行佇地裡。

8

(THR) Ku̍t hām-khiⁿ-ê beh ka-kī po̍ah tī hí(**hit) lāi-bīn; thiah-chhiûⁿ-ê beh hō͘ chôa kā--tio̍h.

(BCL) 掘陷坑的，欲家己跋佇彼內面；拆牆的，欲互蛇咬著。

9

(THR) Phah-chio̍h-ê ōe siū chio̍h siong, phòa-chhâ-ê ōe tùi án-ni tú-tio̍h gûi-hiám.

(BCL) 拍石的，會受石傷；破柴的，會對按呢抵著危險。

10

(THR) Thih-khì í-keng tun, nā bô bôa-lāi i ê chhùi, chiū tio̍h ke-chhut chōe-chōe la̍t; to̍k-to̍k tit-tio̍h tì-hūi ê kà-sī, chiū ū lī-ek.

(BCL) 鐵器已經鈍，若無磨利伊的嘴，就著加出多多力；獨獨得著智慧的教示，就有利益。

11

(THR) Bē liām-chiù ê sî, chôa nā kā--tio̍h lâng, liām-chiù ê lâng chiū bô lī-ek.

(BCL) 未念咒的時，蛇若咬著人，念咒的人就無利益。

12

(THR) tì-hūi ê lâng ê só͘ kóng sī un-hūi ê ōe; gû-gōng ê chhùi thun-bia̍t ka-kī.

(BCL) 智慧的人的所講是恩惠的話；愚戇的嘴吞滅家己。

13

(THR) I ê chhùi só͘ kóng ê ōe khí-thâu sī gû-gōng; i ê ōe ê lō͘-bé sī hāi lâng ê tian-kông.

(BCL) 伊的嘴所講的話起頭是愚戇；伊的話的路尾是害人的癲狂。

14

(THR) Gōng-lâng chōe-chōe ōe; to̍k-to̍k lâng m̄-chai chiong-lâi cháiⁿ-iūⁿ; i sin-āu só͘ beh ū ê sū chī-chūi ōe kā i kóng ah?

(BCL) 戇人多多話，獨獨人呣知將來怎樣；伊身後所欲有的事是誰會給伊講啊？

15

(THR) Gōng-lâng ê lô-lo̍k tì-kàu hō͘ in ià-siān, in-ūi jı̍p siâⁿ ê lō͘ i iā m̄-chai.

(BCL) 戇人的勞碌致到互厭倦，因為入城的路，伊也呣知。

16

(THR) Pang-kok ah, lí ê ông nā sī gín-ná, lí ê kùi-cho̍k chá-khí-sî iàn-lo̍k, lí chiū ū chai-ē.

(BCL) 邦國啊，你的王若是囝仔，你的貴族早起時宴樂，你就有災禍！

17

(THR) Pang-kok ah, lí ê ông nā sī chun-kùi ê lâng ê kiáⁿ, lí ê kùi-cho̍k chiàu-sî lim-chia̍h, ūi-tio̍h beh pó͘ in ê la̍t, m̄-sī in-ūi hò͘ⁿ lim, lí chiū ū hok-khì.

(BCL) 邦國啊，你的王若是尊貴的人的子，你的貴族照時飲食，為著欲補的力，呣是因為好飲，你就有福氣！

18

(THR) In-ūi pîn-tōaⁿ chhù-kòa lap--lo̍h-khì; ūi-tio̍h chhiú pîn-tōaⁿ chhù chiū lāu.

(BCL) 因為貧憚，厝蓋塌落去；為著手貧憚，厝就漏。

19

(THR) Iân-sia̍h sī ūi-tio̍h hoaⁿ-hí lâi siat, chiú sī hō͘ lâng khòaⁿ-o̍ah; chîⁿ-gûn chòe bān-sū ê lō͘-ēng.

(BCL) 筵席是為著歡喜來設。酒是互人快活；錢銀做萬事的路用。

20

(THR) Lí m̄-thang chiù-chó͘ kun-ông, sim iā m̄-thang án-ni siūⁿ; tī lí ê khùn-pâng iā m̄-thang chiù-chó͘ hó-gia̍h lâng; in-ūi khong-tiong ê chiáu beh thôan-pò͘ chit ê siaⁿ, ū sı̍t-kó͘--ê iā beh kóng-khí chit ê sū.

(BCL) 你呣通咒詛君王，心也呣通按呢想；佇你的睏房也呣通咒詛好額人。因為空中的鳥欲傳報此個聲，有翅股的也欲講起此個事。

Bible Color Mark

• 台語漢字羅馬本
• 巴克禮全羅