傳道書 第 1 章

1

(THR) Tī Iâ-lō͘-sat-léng chòe-ông, Tāi-pı̍t ê kiáⁿ, Thôan-tō ê ōe.

(BCL) 佇耶路撒冷做王、大衛的子、傳道的話。

2

(THR) Thôan-tō--ê kóng, Khang-hu ê khang-hu; khang-hu ê khang-hu; hōan-sū lóng sī khang-hu.

(BCL) 傳道者講：空虛的空虛，空虛的空虛，凡事攏是空虛。

3

(THR) Lâng it-chhè ê tio̍h-bôa, chiū-sī i tī jı̍t-kng ê ē-bīn só͘ tio̍h-bôa-ê ū sím-mı̍h lī-ek ah?

(BCL) 人一切的著磨，就是伊佇日光的下面所著磨的，有甚麼利益啊？

4

(THR) Chı̍t-tāi kè-khì, koh chı̍t-tāi lâi, chóng-sī tōe iû-gôan tī-teh.

(BCL) 一代過去，閣一代來，總是地猶原佇。

5

(THR) Jı̍t-chhut, jı̍t-lo̍h, kín-kín cháu tò-tńg i só͘ chhut-lâi ê só͘-chāi.

(BCL) 日出，日落，緊緊走倒轉伊所出來的所在。

6

(THR) Hong chhe ǹg lâm, koh tò-tńg ǹg pak, tńg-se̍h bô soah, iā tò-tńg tī i tńg-se̍h ê khôan.

(BCL) 風吹向南，閣倒轉向北，轉踅無息，也倒轉佇伊轉踅的圈。

7

(THR) Kang-hô lóng lâu-lo̍h hái, chóng-sī hái iā bô móa; kang-hô lâu kàu toh-lo̍h, chiū koh lâu kàu hia.

(BCL) 江河攏流落海，總是海也無滿；江河流到叨落，就閣流到遐。

8

(THR) Bān-sū lô-khó͘ kàu-ke̍k, lâng kóng bōe chīn; ba̍k-chiu khòaⁿ, khòaⁿ bōe pá, hī-khang thiaⁿ, thiaⁿ bōe tīⁿ.

(BCL) 萬事勞苦到極，人講盡。目睭看，看飽；耳孔聽，聽淀。

9

(THR) Só͘ beh ū ê, sī chêng í-keng ū, só͘ beh chòe--ê sī chêng í-keng chòe; tī jı̍t-kng ê ē-bīn bô ū sin ê sū.

(BCL) 所欲有的是前已經有；所欲做的是前已經做。佇日光的下面無有新的事。

10

(THR) Kiám ū sím-mı̍h sū, lâng thang kí i kóng, Lí khòaⁿ chit-ê sī sin ê? Tī lán í-chêng ê sè-tāi, chá-chá í-keng ū lah.

(BCL) 豈有甚麼事人通指伊講你看此個是新的？佇咱以前的世代，早早已經有啦。

11

(THR) Í-keng kè ê sè-tāi, bô lâng kì-tit; chiong-lâi ê sè-tāi, āu-lâi ê lâng iā bōe-kì-tit.

(BCL) 已經過的世代，無人記得；將來的世代，後來的人也記得。

12

(THR) Góa Thôan-tō--ê, bat tī Iâ-lō͘-sat-léng chòe Í-sek-lia̍t ông.

(BCL) 我傳道者曾佇耶路撒冷做以色列王。

13

(THR) Góa choan-sim ēng tì-hūi gián-kiù chhâ-khó thiⁿ-ē só͘ chòe it-chhè ê sū, chiū chai Siōng-tè só͘ hō͘ lâng tio̍h-bôa--ê sī khó͘-thàng ê tio̍h-bôa.

(BCL) 我專心用智慧、研究查考天下所做一切的事，就知上帝所互人著磨的是苦痛的著磨。

14

(THR) Góa khòaⁿ-kìⁿ jı̍t-kng ê ē-bīn só͘ chòe it-chhè ê sū; khòaⁿ ah, lóng sī khang-hu, lóng sī lia̍h-hong.

(BCL) 我看見日光的下面所做一切的事，看啊，攏是空虛，攏是掠風。

15

(THR) Oan-khiau--ê bōe-ōe hō͘ i tı̍t, khoat-hām--ê bōe-ōe sǹg--tit.

(BCL) 彎曲的，會互伊直；缺陷的，會算得。

16

(THR) Góa ê sim-lāi siūⁿ kóng, Khòaⁿ ah, góa tit-tio̍h tōa tì-hūi, iâⁿ-kè góa í-chêng it-chhè tī Iâ-lō͘-sat-léng ê lâng; koh góa sim le̍k-kè chōe-chōe tì-sek kap chai-bat.

(BCL) 我的心內想講：看啊，我得著大智慧，贏過我以前一切佇耶路撒冷的人，閣我心歷過多多智識及知識。

17

(THR) Góa choan-sim tì-ì ài chai tì-hūi, ài chai tian-kông kap gû-gōng, chiū chai che iā-sī lia̍h-hong.

(BCL) 我專心致意愛知智慧，愛知癲狂，及愚戇，就知這也是掠風。

18

(THR) In-ūi chōe-chōe tì-hūi chiū chōe-chōe hôan-ló, ke-thiⁿ chai-bat chiū ke-thiⁿ iu-siong.

(BCL) 因為多多智慧，就多多煩惱；加添知識，就加添憂傷。

Bible Color Mark

• 台語漢字羅馬本
• 巴克禮全羅