申命記 第 12 章

1

(THR) Lín tī sè-kan it-seng ê jı̍t, tī Iâ-hô-hoa lín lia̍t-chó͘ ê Siōng-tè só͘ siúⁿ-sù lín chòe-gia̍p ê tōe, tio̍h chip-siú lâi kiâⁿ ê lu̍t-lē hoat-tō͘, chiū-sī chiah-ê.

(BCL) 「恁佇世間一生的日，佇耶和華──恁列祖的上帝所賞賜恁做業的地，著執守來行的律例法度就是諸個：

2

(THR) Lín só͘ beh kóaⁿ lâi sêng-chiap ê lia̍t-kok, kìⁿ-nā in ho̍k-sāi in hiah ê siōng-tè ê só͘-chāi, bô-lūn tī kôaiⁿ-soaⁿ, tī sió-soaⁿ, tī lóng-chóng chhiⁿ-chhùi ê chhiū-kha, lóng tio̍h húi-hōai in;

(BCL) 恁所欲趕來承接的列國，見若服事許個上帝的所在，無論佇高山、佇小山，佇攏總青翠的樹腳，攏著毀壞；

3

(THR) lín iā tio̍h thiah-húi in ê chè-tôaⁿ, phah-chhùi in tiau-khek ê thiāu, ēng hé sio in ê A-sià-lîm, chhò in só͘ tiau-khek ê siōng-tè ê siōng, iā tio̍h tùi hit só͘-chāi tû-bia̍t in ê miâ;

(BCL) 恁也著拆毀的祭壇，拍碎雕刻的柱，用火燒的亞舍林，剉所雕刻的上帝的像，也著對彼所在除滅的名。

4

(THR) lín m̄-thang chhin-chhiūⁿ án-ni lâi ho̍k-sāi Iâ-hô-hoa lín ê Siōng-tè.

(BCL) 恁呣通親像按呢來服事耶和華──恁的上帝。

5

(THR) To̍k-to̍k Iâ-hô-hoa lín ê Siōng-tè chiong-lâi tùi lín chèng chi-phài tiong só͘ beh kéng ê só͘-chāi, thang tī-hia an-tì I ê miâ, chiū-sī I khiā-khí ê só͘-chāi, lín tio̍h khì hia chhē I;

(BCL) 獨獨耶和華──恁的上帝將來對恁眾支派中所欲揀的所在，通佇遐安置伊的名，就是伊徛起的所在，恁著去遐尋伊，

6

(THR) chiong lín ê sio-chè kap pa̍t-hō ê chè, cha̍p-hūn chhú chı̍t-hūn ê mı̍h, kap chhiú-nı̍h ê kú-chè, í-kı̍p siā-gōan ê chè, kam-sim hiàn ê chè, í-kı̍p gû-kûn iûⁿ-kûn tiong thâu-chúi-siⁿ-ê, lóng tio̍h tòa kàu hia;

(BCL) 將恁的燒祭、及別號的祭、十份取一份的物，及手裡的舉祭，以及謝願的祭、甘心獻的祭，以及牛群羊群中頭水生的，攏著帶到遐。

7

(THR) tī-hia lín tī Iâ-hô-hoa lín Siōng-tè ê bīn-chêng ūi-tio̍h lín ê chhiú só͘ chòe it-chhè ê sū, tit-tio̍h Iâ-hô-hoa lín Siōng-tè sù-hok ê, lín kap lín ê ke-kòan lóng tio̍h lim-chia̍h hoaⁿ-hí.

(BCL) 佇遐，恁佇耶和華──恁上帝的面前，為著恁的手所做一切的事，得著耶和華──恁上帝賜福的，恁及恁的家眷攏著飲食歡喜。

8

(THR) Lán kin-á-jı̍t tī-chia só͘ kiâⁿ ê sū, sī ta̍k-lâng kiâⁿ i ka-kī khòaⁿ-chòe tio̍h-ê, lín chiong-lâi m̄-thang án-ni kiâⁿ.

(BCL) 咱今仔日佇遮所行的事是逐人行伊家己看做著的，恁將來呣通按呢行；

9

(THR) In-ūi lín hiān-kim iáu-bē ū kàu Iâ-hô-hoa lí ê Siōng-tè só͘ siúⁿ-sù lí ê an-hioh kap sán-gia̍p.

(BCL) 因為恁現今猶未有到耶和華──你的上帝所賞賜你的安息及產業。

10

(THR) Chóng-sī lín kè Iok-tàn, tit-tio̍h khiā-khí tī Iâ-hô-hoa lín Siōng-tè siúⁿ-sù lín sêng-chiap ê tōe, koh hō͘ lín thoat-lī sì-ûi lóng-chóng ê tùi-te̍k, tit-tio̍h an-hioh, lâi an-ún khiā-khí;

(BCL) 總是恁過約但，得著徛起佇耶和華──恁上帝賞賜恁承接的地，閣互恁脫離四圍攏總的對敵，得著安息來安穩徛起。

11

(THR) chiū beh ū chı̍t só͘-chāi, sī Iâ-hô-hoa lín ê Siōng-tè só͘ kéng lâi an-tì I ê miâ ê, kìⁿ-nā góa só͘ bēng-lēng lín ê, chiū-sī lín ê sio-chè, kap pa̍t-hō ê chè, cha̍p-hūn chhú chı̍t-hūn ê mı̍h, kap chhiú-nı̍h ê kú-chè, í-kı̍p lí tùi Iâ-hô-hoa só͘ hē-gōan ke̍k-hó ê mı̍h, lóng tio̍h tòa kàu hia.

(BCL) 就欲有一所在是耶和華──恁的上帝所揀來安置伊的名的，見若我所命令恁的就是恁的燒祭、及別號的祭、十份取一份的物，及手裡的舉祭，以及你對耶和華所下願極好的物，攏著帶到遐。

12

(THR) Lín kap lín ê kiáⁿ, cha-bó͘-kiáⁿ, lô͘-po̍k, lú-pī, lóng tio̍h hoaⁿ-hí tī Iâ-hô-hoa lín Siōng-tè ê bīn-chêng; Lī-bī lâng tiàm tī lín ê mn̂g-lāi-ê iā sī án-ni, in-ūi in tī lín tiong-kan bô-hūn bô-gia̍p.

(BCL) 恁及恁的子、查某子、奴僕、女婢，攏著歡喜佇耶和華──恁上帝的面前，利未人踮佇恁的門內的也是按呢，因為佇恁中間無份無業。

13

(THR) Lî tio̍h ka-kī kín-sīn, m̄-thang tī lí khòaⁿ kah-ì ê só͘-chāi hiàn lín ê sio-chè;

(BCL) 你著家己謹慎，呣通佇你看合意的所在獻恁的燒祭。

14

(THR) to̍k-to̍k tī lí chiah ê chi-phài tiong ê chı̍t-ê, Iâ-hô-hoa só͘ beh kéng ê só͘-chāi, lín tī-hia tio̍h hiàn lí ê sio-chè; koh tī-hia kiâⁿ góa it-chhè só͘ bēng-lēng lí ê.

(BCL) 獨獨佇你諸個支派中的一個，耶和華所欲揀的所在，恁佇遐著獻你的燒祭，閣佇遐行我一切所命令你的。

15

(THR) Chóng-sī lí tī lí ta̍k ê mn̂g-lāi, thang chiàu Iâ-hô-hoa lí Siōng-tè só͘ siúⁿ-sù lí ê hok-hūn, chiàu lí ê sim só͘ ài, thâi cheng-siⁿ chia̍h-bah; bô-lūn chheng-khì ê lâng, bô chheng-khì ê lâng, lóng thang chia̍h i, chhin-chhiūⁿ chia̍h lêng-iông kap lo̍k chı̍t-poaⁿ.

(BCL) 「總是，你佇你逐個門內通照耶和華──你上帝所賞賜你的福份，照你的心所愛精牲食肉；無論清氣的人無清氣的人攏通食伊，親像食羚羊及鹿一般。

16

(THR) Chóng-sī huih m̄-thang chia̍h, tio̍h piàⁿ tī tōe-nı̍h, chhin-chhiūⁿ piàⁿ-chúi chı̍t-iūⁿ.

(BCL) 總是血呣通食，著傾佇地裡，親像傾水一樣。

17

(THR) Lí ê ngó͘-kok, chiú, iû, cha̍p-hūn ê chı̍t-hūn, he̍k-sī gû-kûn iûⁿ-kûn tiong thâu-chúi siⁿ-ê, he̍k-sī lí hē-gōan hiàn-ê, kam-sim hiàn-ê, he̍k-sī chhiú-nı̍h ê kú-chè, lóng m̄-thang tī lí ê mn̂g-lāi chia̍h i;

(BCL) 你的五殼、酒、油十份的一份，或是牛群羊群中頭水生的，或是你下願獻的、甘心獻的，或是手裡的舉祭，攏呣通佇你的門內食伊。

18

(THR) to̍k-to̍k tī Iâ-hô-hoa lí ê Siōng-tè ê bīn-chêng chia̍h i, chiū-sī tī Iâ-hô-hoa lí ê Siōng-tè só͘ beh kéng ê só͘-chāi, lí kap lí ê kiáⁿ, lí ê cha-bó͘-kiáⁿ, lô͘-po̍k, lú-pī, í-kı̍p tiàm tī lí mn̂g-lāi ê Lī-bī lâng, lóng tio̍h chia̍h i; kìⁿ-nā lí ê chhiú só͘ chòe ê, tī Iâ-hô-hoa lí Siōng-tè ê bīn-chêng, thang hoaⁿ-hí.

(BCL) 獨獨佇耶和華──你的上帝的面前食伊，就是佇耶和華──你的上帝所欲揀的所在，你及你的子、你的查某子、奴僕、女婢，以及踮佇你門內的利未人，攏著食伊；見若你的手所做的，佇耶和華──你上帝的面前通歡喜。

19

(THR) Lí tio̍h ka-kī kín-sīn, tī lí ê tōe-hng, chı̍t-sì-lâng m̄-thang pàng-sak Lī-bī lâng.

(BCL) 你著家己謹慎，佇你的地方，一世人呣通放拺利未人。

20

(THR) Iâ-hô-hoa lí ê Siōng-tè chiàu I só͘ èng-ún lí ê, khui-khoah lí ê kéng-kài ê sî, lí ê sim ài chia̍h-bah, só͘-í kóng, Góa beh chia̍h-bah, chiū thang chiàu lí ê sim só͘-ài ê lâi chia̍h-bah.

(BCL) 「耶和華──你的上帝照伊所應允你的開闊你的境界的時，你的心愛食肉，所以講：『我欲食肉』，就通照你的心所愛的來食肉。

21

(THR) Iâ-hô-hoa lí ê Siōng-tè só͘ kéng beh an-tì I ê miâ ê só͘-chāi, nā lī-khui lí chin-hn̄g, chiū thang chiàu góa só͘ bēng-lēng lí ê, chiong Iâ-hô-hoa siúⁿ-sù lí ê gû, iûⁿ, chhú lâi thâi i, thang chiàu sim só͘-ài ê, tī lí ê mn̂g-lāi chia̍h i.

(BCL) 耶和華──你的上帝所揀欲安置伊的名的所在若離開你真遠，就通照我所命令你的，將耶和華賞賜你的牛羊取來伊，通照心所愛的佇你的門內食伊。

22

(THR) Lí chia̍h i, chhin-chhiūⁿ chia̍h lêng-iông kap lo̍k chı̍t-poaⁿ; bô chheng-khì kap chheng-khì ê lâng pîⁿ-pîⁿ thang chia̍h;

(BCL) 你食伊，親像食羚羊及鹿一般；無清氣及清氣的人平平通食。

23

(THR) to̍k-to̍k lí tio̍h koat-ì, m̄-thang chia̍h huih, in-ūi huih sī o̍ah-miā; lí m̄-thang chia̍h bah, sòa chia̍h i ê o̍ah-miā;

(BCL) 獨獨你著決意，呣通食血，因為血是活命；你呣通食肉續食伊的活命。

24

(THR) m̄-thang chia̍h i, tio̍h piàⁿ tī tōe-nı̍h, chhin-chhiūⁿ piàⁿ chúi chı̍t-iūⁿ;

(BCL) 呣通食伊，著傾佇地裡，親像傾水一樣。

25

(THR) m̄-thang chia̍h i; án-ni lí kiâⁿ Iâ-hô-hoa só͘ khòaⁿ-chòe tio̍h ê sū, lí kap lí ê kiáⁿ-sun chiū ōe tit-tio̍h hok-khì.

(BCL) 呣通食伊。按呢，你行耶和華所看做著的事，你及你的子孫就會得著福氣。

26

(THR) To̍k-to̍k lí só͘ ū ê sèng-mı̍h, kap lí só͘ hē-gōan ê, tio̍h tòa kàu Iâ-hô-hoa só͘ beh kéng ê só͘-chāi.

(BCL) 獨獨你所有的聖物及你所下願的，著帶到耶和華所欲揀的所在。

27

(THR) Lí ê sio-chè, bah kap huih, tio̍h hiàn tī Iâ-hô-hoa lí Siōng-tè ê tôaⁿ-téng; lí chè-mı̍h ê huih, tio̍h piàⁿ tī Iâ-hô-hoa lí Siōng-tè ê tôaⁿ; hit ê bah, lí thang chia̍h.

(BCL) 你的燒祭，肉及血，著獻佇耶和華──你上帝的壇頂。你祭物的血著傾佇耶和華──你上帝的壇；彼個肉，你通食。

28

(THR) Lí tio̍h chip-siú, thiaⁿ-thàn góa bēng-lēng lí it-chhè ê ōe, kiâⁿ Iâ-hô-hoa lí Siōng-tè só͘ khòaⁿ-chòe hó chòe-tio̍h ê sū; án-ni lí kap lí ê hō͘-è chiū thang éng-óan tit-tio̍h hok-khì.

(BCL) 你著執守聽趁我命令你一切的話，行耶和華──你上帝所看做好做著的事。按呢，你及你的後裔就通永遠得著福氣。」

29

(THR) Iâ-hô-hoa lí ê Siōng-tè tùi lí ê bīn-chêng tû-bia̍t lí só͘ beh khì sêng-chiap ê kok, lí sêng-chiap i, lâi khiā-khí i ê tōe;

(BCL) 「耶和華──你的上帝對你的面前除滅你所欲去承接的國，你承接伊來徛起伊的地，

30

(THR) hit-sî lí tio̍h ka-kī kín-sīn, m̄-thang tī in tùi lín ê bīn-chêng tû-bia̍t liáu-āu, hām-lo̍h in ê lô-bāng, lâi tè in; iā m̄-thang thàm-thiaⁿ in ê siōng-tè ê sū, kóng, Chiah ê kok cháiⁿ-iūⁿ ho̍k-sāi in ê siōng-tè, góa iā beh án-ni kiâⁿ.

(BCL) 彼時你著家己謹慎，呣通佇對恁的面前除滅了後，陷落的羅網來隨，也呣通探聽的上帝的事講：『諸個國怎樣服事的上帝，我也欲按呢行。』

31

(THR) Lí m̄-thang tùi Iâ-hô-hoa lí ê Siōng-tè án-ni kiâⁿ; in-ūi in tùi in ê siōng-tè kiâⁿ Iâ-hô-hoa it-chhè só͘ thòng-hūn iàm-ò͘ⁿ ê sū; sīm-chì ēng in ê kiáⁿ cha-bó͘-kiáⁿ ēng hé sio, hiàn hō͘ in ê siōng-tè.

(BCL) 你呣通對耶和華──你的上帝按呢行，因為對的上帝行耶和華一切所痛恨厭惡的事，甚至用的子查某子用火燒，獻互的上帝。

32

(THR) Kìⁿ-nā góa só͘ bēng-lēng lín ê, lín lóng tio̍h chip-siú lâi kiâⁿ; lí m̄-thang ke-thiⁿ, iā m̄-thang kiám-chió.

(BCL) 見若我所命令恁的，恁攏著執守來行，你呣通加添，也呣通減少。」

Bible Color Mark

• 台語漢字羅馬本
• 巴克禮全羅