約翰三書 第 1 章

1

(THR) Chòe tiúⁿ-ló ê phoe kià hō͘ só͘ thiàⁿ ê Ka-iû, chiū-sī góa tī chin-lí só͘ thiàⁿ ê.

(BCL) 做長老的批寄互所疼的該猶，就是我佇真理所疼的。

2

(THR) Só͘ thiàⁿ ê hiaⁿ-tī ah, góa gōan lí bān sū ōe heng-thong ióng-kiāⁿ, chhin-chhiūⁿ lí ê lêng-hûn heng-thong chı̍t iūⁿ.

(BCL) 所疼的兄弟啊，我願你萬事會亨通，勇健，親像你的靈魂亨通一樣。

3

(THR) In-ūi ū hiaⁿ-tī lâi kan-chèng lí só͘ chûn ê chin-lí, chhin-chhiūⁿ lí tī chin-lí teh kiâⁿ, góa chiū chin hoaⁿ-hí.

(BCL) 因為有兄弟來干證你所存的真理，親像你佇真理行，我就真歡喜。

4

(THR) Góa thiaⁿ-kìⁿ góa ê kiáⁿ-jî tī chin-lí teh kiâⁿ, góa ê hoaⁿ-hí bô khah tōa tī chit ê.

(BCL) 我聽見我的子兒佇真理行，我的歡喜無卡大佇此個。

5

(THR) Só͘ thiàⁿ ê hiaⁿ-tī ah, kìⁿ-nā lí só͘ khóan-thāi chhut-gōa ê hiaⁿ-tī ê, sī tiong-sìn ê só͘ kiâⁿ.

(BCL) 所疼的兄弟啊，見若你所款待出外的兄弟的是忠信的所行。

6

(THR) In bat tī kàu-hōe ê bīn-chêng kan-chèng lí ê thiàⁿ-thàng; lí nā ha̍p tī Siōng-tè kā in sòng-hêng, chiū-sī chòe hó sū.

(BCL) 曾佇教會的面前干證你的疼痛；你若合佇上帝給送行，就是做好事。

7

(THR) In-ūi in ūi-tio̍h I ê miâ chhut-gōa, bô tùi gōa-pang lâng the̍h sím-mı̍h mı̍h.

(BCL) 因為為著伊的名出外，無對外邦人提甚麼物。

8

(THR) Só͘-í hit hō lâng, lán eng-kai chih-chiap in, hō͘ lán ūi-tio̍h chin-lí chòe tâng tio̍h-bôa ê.

(BCL) 所以彼號人咱應該接接，互咱為著真理做同著磨的。

9

(THR) Góa í-keng ū siá tām-po̍h hō͘ kàu-hōe; to̍k-to̍k in tiong-kan ài chòe thâu ê Tiu-te̍k-hui bô chiap-la̍p góan.

(BCL) 我已經有寫淡薄互教會，獨獨中間愛做頭的丟特腓無接納阮。

10

(THR) Só͘-í góa nā lâi, beh kì-tit i só͘ kiâⁿ ê sū, chiū-sī i ēng pháiⁿ ōe lām-sám kóng góan; koh bô lia̍h chit-ê chòe kàu-gia̍h, pún-sin m̄ chiap-la̍p hiaⁿ-tī, ū lâng ài chiap-la̍p, i chiū chó͘-tòng, sòa kek in chhut kàu-hōe.

(BCL) 所以我若來，欲記得伊所行的事，就是伊用歹話濫糝講阮。閣無掠此個做夠額，本身呣接納兄弟，有人愛接納，伊就阻擋，續革出教會。

11

(THR) Só͘ thiàⁿ ê hiaⁿ-tī ah, m̄ thang o̍h pháiⁿ, tio̍h o̍h hó. Kiâⁿ hó ê sī tùi Siōng-tè chhut; kiâⁿ pháiⁿ ê bē bat khòaⁿ-kìⁿ Siōng-tè.

(BCL) 所疼的兄弟啊，呣通學歹，著學好。行好的是對上帝出；行歹的未曾看見上帝。

12

(THR) Tí-bí-tiu hō͘ chèng lâng só͘ kan-chèng, chin-lí iā ka-kī chòe i ê kan-chèng; góan iā chòe kan-chèng; lí chai góan ê kan-chèng sī chin.

(BCL) 低米丟互眾人所干證，真理也家己做伊的干證，阮也做干證。你知阮的干證是真。

13

(THR) Góa ū chōe-chōe hāng ài siá hō͘ lí, nā-sī m̄ ài ēng pit ba̍k siá hō͘ lí;

(BCL) 我有多多項愛寫互你，若是呣愛用筆墨寫互你，

14

(THR) sī ǹg-bāng kín-kín kìⁿ lí, lán chiah beh tng-bīn kóng.

(BCL) 是向望緊緊見你，咱才欲當面講。

15

(THR) Gōan lí pêng-an. Chiah ê pêng-iú kā lí chhéng-an. Chhiáⁿ lí sûi chı̍t miâ kā hiah ê pêng-iú chhéng-an.

(BCL) 願你平安。諸個朋友給你請安。請你隨一名給許個朋友請安。

Bible Color Mark

• 台語漢字羅馬本
• 巴克禮全羅