列王紀下 第 9 章

1

(THR) Sian-ti Í-lī-sa kiò sian-ti ê ha̍k-seng chı̍t-ê, kā i kóng, Lí hâ-io, the̍h chı̍t-pân iû, khì Ki-lia̍t ê La̍h-bo̍at.

(BCL) 先知以利沙叫先知的學生一個，給伊講：「你縖腰，提一瓶油去基列的拉末。

2

(THR) Kàu hia, tio̍h chhē Lêng-sī ê sun, Iok-sa-hoat ê kiáⁿ, Iâ-hō͘, jı̍p-khì, hō͘ i tùi i ê hiaⁿ-tī-tiong khí-lâi, chhōa i jı̍p lāi-pâng;

(BCL) 到遐，著尋寧示的孫、約沙法的子耶戶，入去，互伊對伊的兄弟中起來，導伊入內房，

3

(THR) chiong pân-lāi ê iû thîn tī i ê thâu-khak, kóng, Iâ-hô-hoa án-ni kóng, Góa ēng iû boah lí chòe Í-sek-lia̍t ê ông. Lí chiū tio̍h khui-mn̂g tô-cháu, m̄-thang iân-chhiân.

(BCL) 將瓶內的油斟佇伊的頭殼，講：『耶和華按呢講：我用油抹你做以色列的王。』你就著開門逃走，呣通延延。」

4

(THR) Chit ê siàu-liân lâng, chiū-sī siàu-liân ê sian-ti, khì Ki-lia̍t ê La̍h-bo̍at.

(BCL) 此個少年人就是少年的先知去基列的拉末。

5

(THR) Kàu hia, khòaⁿ-kìⁿ chèng kun-tiúⁿ teh chē; i chiū kóng, Kun-tiúⁿ ah, góa ū tāi-chì beh kā lí kóng. Iâ-hō͘ kóng, Beh kā góan tiong-kan sím-mı̍h lâng kóng? Ìn kóng, Kun-tiúⁿ ah, chiū-sī lí.

(BCL) 到遐，看見眾軍長坐，伊就講：「軍長啊，我有代誌欲給你講。」耶戶講：「欲給阮中間甚麼人講？」應講：「軍長啊，就是你。」

6

(THR) I chiū khí-lâi, jı̍p-khì chhù-lāi; siàu-liân lâng ēng iû thîn tī i ê thâu-khak, kā i kóng, Iâ-hô-hoa Í-sek-lia̍t ê Siōng-tè án-ni kóng, Góa ēng iû boah lí, chòe Iâ-hô-hoa ê peh-sìⁿ Í-sek-lia̍t ê ông.

(BCL) 伊就起來，入去厝內，少年人用油斟佇伊的頭殼，給伊講：「耶和華──以色列的上帝按呢講：『我用油抹你做耶和華的百姓以色列的王。

7

(THR) Lí tio̍h phah-bia̍t lí ê chú-lâng A-hap ê ke, hō͘ Góa thang pò-èng Góa ê lô͘-po̍k chiah ê sian-ti ê huih, í-kı̍p Iâ-hô-hoa chèng lô͘-po̍k ê huih, chiū-sī tī Iâ-sé-piat ê chhiú só͘ chòe ê.

(BCL) 你著拍滅你的主人亞哈的家，互我通報應我的奴僕諸個先知的血，以及耶和華眾奴僕的血，就是佇耶洗別的手所做的。

8

(THR) In-ūi A-hap chôan-ke beh lóng bia̍t-bô; Góa beh chián-tû sio̍k A-hap ê ta-po͘-teng, bô-lūn siū khu-sok-ê, á-sī chū-iû-ê, tī Í-sek-lia̍t tiong.

(BCL) 因為亞哈全家欲攏滅無，我欲剪除屬亞哈的查甫丁，無論受拘束的抑是自由的，佇以色列中，

9

(THR) Góa beh hō͘ A-hap ê ke chhin-chhiūⁿ Nî-pat ê kiáⁿ Iâ-lô-phò-àm ê ke, iā chhin-chhiūⁿ A-hi-ngá ê kiáⁿ Pa-sa ê ke.

(BCL) 我欲互亞哈的家親像尼八的子耶羅波安的家，也親像亞希雅的子巴沙的家。

10

(THR) Tī Iâ-su-lia̍t ê hn̂g, káu beh chia̍h Iâ-sé-piat, bô lâng bâi-chòng i. Siàu-liân lâng chiū khui-mn̂g tô-cháu.

(BCL) 佇耶斯列的園，狗欲食耶洗別，無人埋葬伊。』」少年人就開門逃走。

11

(THR) Iâ-hō͘ chhut-khì, kàu i ê chú-lâng ê lô͘-po̍k hia; ū chı̍t-lâng mn̄g i kóng, Lóng pêng-an bô? chit ê siáu-ê lâi chhē lí sím-mı̍h tāi-chì ah? I kā in kóng, Lín bat hit ê lâng, iā chai i só͘ kóng ê.

(BCL) 耶戶出去，到伊的主人的奴僕遐，有一人問伊講：「攏平安無？此個狗者來尋你甚麼代誌啊？」伊給講：「恁識彼個人，也知伊所講的。」

12

(THR) In kóng, Bô-iáⁿ, lí tio̍h kā góan kóng. Ìn kóng, I án-ni, án-ni kā góa kóng; i kóng, Iâ-hô-hoa án-ni kóng, Góa ēng iû boah lí chòe Í-sek-lia̍t ê ông.

(BCL) 講：「無影，你著給阮講。」應講：「伊按呢按呢給我講。伊講：『耶和華按呢講：我用油抹你做以色列的王。』」

13

(THR) In kóaⁿ-kín, ta̍k-lâng ēng ka-kī ê saⁿ pho͘ tī kiā-á ê téng-chân, hē tī Iâ-hō͘ ê ē-bīn; in pûn sàu-kak kóng, Iâ-hō͘ chòe-ông lah.

(BCL) 趕緊逐人用家己的衫舖佇崎仔的頂層，下佇耶戶的下面；歕哨角講：「耶戶做王啦！」

14

(THR) Án-ni Lêng-sī ê sun, Iok-sa-hoat ê kiáⁿ, Iâ-hō͘ pōe-pōan Iok-lâm. (Iok-lâm kap Í-sek-lia̍t chèng-lâng bat pé-siú Ki-lia̍t ê La̍h-bo̍at, in-ūi A-lân ông Hap-siat ê iân-kò͘.

(BCL) 按呢，寧示的孫、約沙法的子耶戶背叛約蘭。約蘭及以色列眾人曾把守基列的拉末，因為亞蘭王哈設的緣故；

15

(THR) Chóng-sī Iok-lâm ông tò-khì Iâ-su-lia̍t, i-tī i ê siong, chiū-sī i tī kap A-lân ông Hap-siat kau-chiàn ê sî, A-lân lâng phah-tio̍h i--ê.) Iâ-hō͘ kóng, Lín ê ì-sù nā sī án-ni, chiū m̄-thang iông-ún lâng cháu chhut-siâⁿ, khì Iâ-su-lia̍t pò siau-sit.

(BCL) 總是約蘭王倒去耶斯列，醫治伊的傷，就是伊佇及亞蘭王哈設交戰的時，亞蘭人拍著伊的。耶戶講：「恁的意思若是按呢，就呣通容允人走出城去耶斯列報消息。」

16

(THR) Iâ-hō͘ chiū chē-chhia, khì Iâ-su-lia̍t, in-ūi Iok-lâm tó tī-hia. Iû-tāi ông A-hap-siā í-keng lo̍h-khì bāi Iok-lâm.

(BCL) 耶戶就坐車去耶斯列，因為約蘭倒佇遐。猶大王亞哈謝已經落去覓約蘭。

17

(THR) Ū chı̍t ê siú-bāng-ê khiā tī Iâ-su-lia̍t ê lâu-téng, khòaⁿ-kìⁿ Iâ-hō͘ ê kun-tūi lâi, chiū kóng, Góa khòaⁿ-kìⁿ chı̍t-tīn kun-tūi. Iok-lâm kóng, Chhe chı̍t ê khiâ-bé--ê khì chih i, sòa mn̄g i kóng, Pêng-an mah?

(BCL) 有一個守望者徛佇耶斯列的樓頂，看見耶戶的軍隊來，就講：「我看見一陣軍隊。」約蘭講：「差一個騎馬者去接伊，續問伊講：平安嗎？」

18

(THR) Khiâ-bé--ê khì chih i kóng, Ông án-ni kóng, Sī pêng-an mah? Iâ-hō͘ kóng, Pêng-an á-bô, kap lí sím-mı̍h kan-sia̍p? lí oat-lâi tè góa ê āu-bīn. Siú-bāng--ê koh kóng, Sù-chiá kàu in hia, chóng-sī bô tò-tńg-lâi.

(BCL) 騎馬者去接伊，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」守望者閣講：「使者到遐，總是無倒轉來。」

19

(THR) Ông koh chhe chı̍t ê khiâ-bé--ê khì, i kàu in hia, kóng, Ông án-ni kóng, Sī pêng-an mah? Iâ-hō͘ kóng, Pêng-an á-bô, kap lí sím-mı̍h kan-sia̍p? lí oat-lâi tè góa ê āu-bīn.

(BCL) 王閣差一個騎馬者去。伊到遐，講：「王按呢講，是平安嗎？」耶戶講：「平安抑無及你甚麼干涉？你越來隨我的後面！」

20

(THR) Siú-bāng--ê koh kóng, I kàu in hia, iā bô tò-tńg--lâi; kóaⁿ-chhia ê khóan chhin-chhiūⁿ Lêng-sī ê sun Iâ-hō͘ teh kóaⁿ; in-ūi i kóaⁿ chin kông.

(BCL) 守望者閣講：「伊到遐，也無倒轉來；趕車的款親像寧示的孫耶戶趕，因為伊趕真狂。」

21

(THR) Iok-lâm kóng, Thò chhia; chiū thò i ê chhia. Í-sek-lia̍t ông Iok-lâm kap Iû-tāi ông A-hap-siā chhut-khì; ta̍k-ê chē ka-kī ê chhia chhut-khì chih Iâ-hō͘; tī Iâ-su-lia̍t lâng Ná-po̍k ê hn̂g tú-tio̍h i.

(BCL) 約蘭講：「套車！」就套伊的車。以色列王約蘭及猶大王亞哈謝出去逐個坐家己的車出去接耶戶，佇耶斯列人拿伯的園抵著伊。

22

(THR) Iok-lâm kìⁿ-tio̍h Iâ-hō͘ chiū kóng, Iâ-hō͘ ah, sī pêng-an mah? I ìn kóng, Lí ê lāu-bú Iâ-sé-piat ê îm-hēng siâ-su̍t hiah-chōe iáu tī-teh, thái ōe pêng-an?

(BCL) 約蘭見著耶戶就講：「耶戶啊，是平安嗎？」伊應講：「你的老母耶洗別的淫行邪術許多猶佇，豈會平安？」

23

(THR) Iok-lâm chiū o̍at-tńg i ê chhia cháu, kā A-hap-siā kóng, A-hap-siā ah, ū bô͘-hóan lah.

(BCL) 約蘭就越轉伊的車走，給亞哈謝講：「亞哈謝啊，有謀反啦！」

24

(THR) Iâ-hō͘ chīn-la̍t khui-keng, siā-tio̍h Iok-lâm ê pn̄g-sî-kut tiong; chìⁿ tùi i ê sim thàng--chhut khì. I chiū lek--lo̍h chhia-lāi.

(BCL) 耶戶盡力開弓，射著約蘭的飯匙骨中，箭對伊的心出去。伊就慄落車內。

25

(THR) Iâ-hō͘ kā i ê kun-tiúⁿ Pit-kah kóng, Lí chiong i hiat tī Iâ-su-lia̍t lâng Ná-po̍k ê hn̂g--nih; lí tio̍h kì-tit lí góa saⁿ-kap chē-chhia tè i ê lāu-pē A-hap ê sî, Iâ-hô-hoa tùi i só͘ chhàm-gú-ê;

(BCL) 耶戶給伊的軍長畢甲講：「你將伊佇耶斯列人拿伯的園裡。你著記得，你我相及坐車隨伊的老父亞哈的時，耶和華對伊所讖語的，

26

(THR) Iâ-hô-hoa kóng, Góa chā-jı̍t ū khòaⁿ-kìⁿ Ná-po̍k ê huih, kap i ê kiáⁿ ê huih; Iâ-hô-hoa koh kóng, Tī chit khu hn̂g Góa beh pò-èng lí. Taⁿ tio̍h chiong i hiat tī hit khu hn̂g, chiàu Iâ-hô-hoa só͘ kóng ê.

(BCL) 耶和華講：『我昨日有看見拿伯的血及伊的子的血』，耶和華閣講：『佇此區園我欲報應你。』今著將伊佇彼區園，照耶和華所講的。」

27

(THR) Iû-tāi ông A-hap-siā khòaⁿ-kìⁿ án-ni, chiū tùi hn̂g ê chhù ê lō͘ tô-cháu. Iâ-hō͘ jip i, kóng, Iā tio̍h phah-sí i tī chhia-lāi; kàu óa-kūn Í-pek-liân chiūⁿ Ko-jíⁿ ê soaⁿ-phiâⁿ phah-siong i. I cháu kàu Bí-kiat-to, chiū sí tī-hia.

(BCL) 猶大王亞哈謝看見按呢，就對園的厝的路逃走。耶戶伊，講：「也著拍死伊佇車內。」到倚近以伯蓮上姑珥的山坪拍傷伊。伊走到米吉多，就死佇遐。

28

(THR) I ê lô͘-po̍k ēng chhia chài i kàu Iâ-lō͘-sat-léng, chòng tī i ê bōng, kap i ê lia̍t-chó͘, tī Tāi-pı̍t ê siâⁿ.

(BCL) 伊的奴僕用車載伊到耶路撒冷，葬佇伊的墓及伊的列祖，佇大衛的城。

29

(THR) Tī A-hap ê kiáⁿ Iok-lâm cha̍p-it nî, A-hap-siā khí-thâu chòe Iû-tāi ông.

(BCL) 佇亞哈的子約蘭十一年，亞哈謝起頭做猶大王。

30

(THR) Iâ-hō͘ kàu Iâ-su-lia̍t, Iâ-sé-piat thiaⁿ-kìⁿ, chiū ūi ba̍k-bâi, soe-thâu, àⁿ tī thang-á teh-khòaⁿ.

(BCL) 耶戶到耶斯列；耶洗別聽見就畫目眉、梳頭，俯佇窗仔看。

31

(THR) Iâ-hō͘ jı̍p-mn̂g ê sî, Iâ-sé-piat kóng, Thâi-sí chú-lâng ê Sim-lī ah, pêng-an mah?

(BCL) 耶戶入門的時，耶洗別講：「死主人的心利啊，平安嗎？」

32

(THR) Iâ-hō͘ kia̍h-thâu ǹg thang-á khòaⁿ, kóng, Chī-chūi ūi góa, chī-chūi ah? Ū nn̄g-saⁿ ê thài-kàm àⁿ-lo̍h khòaⁿ i.

(BCL) 耶戶抬頭向窗仔看，講：「是誰為我，是誰啊？」有二三個太監俯落看伊。

33

(THR) Iâ-hō͘ kóng, Kā i chhia--lo̍h-lâi; in chiū chhia i lo̍h-lâi; i ê huih chōaⁿ-tio̍h chhiûⁿ-piah kap bé; chiū ēng kha ta̍h i.

(BCL) 耶戶講：「給伊捙落來！」就捙伊落來。伊的血濺著牆壁及馬；就用腳踏伊。

34

(THR) Iâ-hō͘ jı̍p-khì, iā chia̍h iā lim, kóng, Lín khì khòaⁿ hit ê siū chiù-chó͘ ê hū-jîn-lâng, sòa bâi-chòng i, in-ūi i sī ông ê cha-bó͘-kiáⁿ.

(BCL) 耶戶入去，也食也飲，講：「恁去看彼個受咒詛的婦仁人續埋葬伊，因為伊是王的查某子。」

35

(THR) In khì beh chòng i; kan-ta chhē-tio̍h i ê thâu-khak-kut, kap kha, kap chhiú-chiúⁿ nā-tiāⁿ.

(BCL) 去欲葬伊，干單尋著伊的頭殼骨及腳，及手掌若定。

36

(THR) In tò-lâi hê-hok i; Iâ-hō͘ chiū kóng, Che chiū-sī Iâ-hô-hoa thok I ê lô͘-po̍k Thê-su-pí lâng Í-lī-a só͘ kóng ê ōe, kóng, Tī Iâ-su-lia̍t ê hn̂g, káu beh chia̍h Iâ-sé-piat ê bah.

(BCL) 倒來回覆伊，耶戶就講：「這就是耶和華託伊的奴僕提斯比人以利亞所講的話，講：『佇耶斯列的園，狗欲食耶洗別的肉；

37

(THR) Koh Iâ-sé-piat ê sin-si beh tī Iâ-su-lia̍t ê hn̂g chhin-chhiūⁿ pùn tī thô͘-bīn, tì-kàu lâng bô beh kóng, Che sī Iâ-sé-piat.

(BCL) 閣耶洗別的身屍欲佇耶斯列的園親像糞佇土面，致到人無欲講這是耶洗別。』」

Bible Color Mark

• 台語漢字羅馬本
• 巴克禮全羅