列王紀下 第 8 章

1

(THR) Ū chı̍t ê hū-jîn-lâng, Í-lī-sa bat hō͘ i ê kiáⁿ koh-o̍ah ê, iā bat kā i kóng, Khí-lâi, lí kap lí ê chôan-ke khì tòa lí só͘ thang tòa ê só͘-chāi; in-ūi Iâ-hô-hoa bēng-lēng ki-hng lîm-kàu, beh tī chit ê só͘-chāi chhit-nî kú.

(BCL) 有一個婦仁人以利沙曾互伊的子復活的，也曾給伊講：「起來你及你的全家去住你所通住的所在，因為耶和華命令飢荒臨到，欲佇此個所在七年久。」

2

(THR) Hū-jîn-lâng chiū khí-lâi, chiàu Siōng-tè ê lô͘-po̍k ê ōe khì kiâⁿ; i kap i ê ke khì Hui-lī-sū lâng ê tōe, tòa chhit-nî kú.

(BCL) 婦仁人就起來，照上帝的奴僕的話去行，伊及伊的家去非利士人的地，住七年久。

3

(THR) Chhit-nî móa, hit ê hū-jîn-lâng tùi Hui-lī-sū tōe tò-lâi; chiū chhut-khì, beh ūi ka-kī ê chhù-the̍h chhân-hn̂g kiû-kiò ông.

(BCL) 七年滿，彼個婦仁人對非利士地倒來，就出去欲為家己的厝宅田園求叫王。

4

(THR) Hit-sî ông kap Siōng-tè ê lô͘-po̍k ê chhe-ēng Ki-hap-se kóng-ōe, kóng, Chhiáⁿ lí chiong Í-lī-sa só͘ kiâⁿ it-chhè ê tōa-sū kā góa kóng.

(BCL) 彼時王及上帝的奴僕的差用基哈西講話講：「請你將以利沙所行一切的大事給我講。」

5

(THR) Ki-hap-se teh kā ông kóng Í-lī-sa cháiⁿ-iūⁿ hō͘ sí ê lâng koh-o̍ah; chhàu-khám hit ê hū-jîn-lâng, chiū-sī i hō͘ i ê kiáⁿ koh-o̍ah-ê, ūi-tio̍h i ê chhù-the̍h chhân-hn̂g lâi kiû-kiò ông. Ki-hap-se kóng, Góa ê chú góa ê ông, chit-ê sī hit ê hū-jîn-lâng, chit-ê sī i ê kiáⁿ, chiū-sī Í-lī-sa hō͘ i koh-o̍ah ê.

(BCL) 基哈西給王講以利沙怎樣互死的人復活，湊巧彼個婦仁人就是伊互伊的子復活的，為著伊的厝宅田園來求叫王。基哈西講：「我的主我的王，此個是彼個婦仁人，此個是伊的子，就是以利沙互伊復活的。」

6

(THR) Ông mn̄g hit ê hū-jîn-lâng, i chiū kā i kóng; ông chiū ūi-tio̍h i phài chı̍t ê koaⁿ-ôan kóng, Kìⁿ-nā sio̍k chit ê hū-jîn-lâng ê, lóng tio̍h hêng i; tùi i lī-khui pún só͘-chāi kàu kin-á-jı̍t, i ê chhân-hn̂g só͘ chhut-sán ê, iā lóng tio̍h hêng i.

(BCL) 王問彼個婦仁人，伊就給伊講。王就為著伊派一個官員，講：「見若屬此個婦仁人的攏著還伊，對伊離開本所在到今仔日，伊的田園所出產的也攏著還伊。」

7

(THR) Í-lī-sa lâi kàu Tāi-má-sek; A-lân ông Piān-hap-ta̍t teh phòa-pīⁿ; ū lâng kā ông kóng, Siōng-tè ê lô͘-po̍k lâi kàu chia.

(BCL) 以利沙來到大馬色，亞蘭王便哈達破病。有人給王講：「上帝的奴僕來到遮。」

8

(THR) Ông chiū kā Hap-siat kóng, Lí tòa lé-mı̍h khì kìⁿ Siōng-tè ê lô͘-po̍k, pài-thok i mn̄g Iâ-hô-hoa khòaⁿ góa chit ê pīⁿ ōe o̍ah á-bōe?

(BCL) 王就給哈設講：「你帶禮物去見上帝的奴僕，拜託伊問耶和華，看我此個病會活抑？」

9

(THR) Hap-siat chiū khì kìⁿ i, ēng sì-cha̍p chiah lo̍k-tô chài Tāi-má-sek ta̍k-hō ê hó-mı̍h chòe lé-mı̍h, khì khiā tī i ê bīn-chêng, kóng, Lí ê kiáⁿ A-lân ông Piān-hap-ta̍t chhe góa lâi lí chia, kóng, Góa chit ê pīⁿ ōe o̍ah á-bōe?

(BCL) 哈設就去見伊，用四十隻駱駝載大馬色逐號的好物做禮物，去徛佇伊的面前，講：「你的子亞蘭王便哈達差我來你遮，講：『我此個病會活抑？』」

10

(THR) Í-lī-sa kā i kóng, Lí khì hê-hok i, kóng, Lí tek-khak ōe o̍ah; chóng-sī Iâ-hô-hoa chí-sī góa, i tek-khak beh sí.

(BCL) 以利沙給伊講：「你去回覆伊講，你的確會活；總是耶和華指示我，伊的確欲死。」

11

(THR) Í-lī-sa chù-ba̍k khòaⁿ i, tì-kàu i kiàn-siàu; Siōng-tè ê lô͘-po̍k chiū lâu ba̍k-sái.

(BCL) 以利沙注目看伊，致到伊見誚。上帝的奴僕就流目屎；

12

(THR) Hap-siat kóng, Góa ê chú siáⁿ-sū lâu ba̍k-sái? Ìn kóng, In-ūi góa chai lí só͘ beh khó͘-chhó͘ Í-sek-lia̍t lâng ê; ēng hé sio in hiám-iàu ê só͘-chāi, ēng to thâi-sí in ê chòng-teng, siak-sí in ê eⁿ-á, phòa-khui in ū sin-īn ê hū-jîn-lâng.

(BCL) 哈設講：「我的主啥事留目屎？」應講：「因為我知你所欲苦楚以色列人的，用火燒險要的所在，用刀死的壯丁，摔死的嬰仔，破開有娠孕的婦仁人。」

13

(THR) Hap-siat kóng, Lí ê lô͘-po̍k sī sím-mı̍h, put-kò sī chı̍t chiah káu, thái-thó ōe kiâⁿ chit ê tōa-sū ah? Í-lī-sa ìn kóng, Iâ-hô-hoa chí-sī góa, lí beh chòe A-lân ông.

(BCL) 哈設講：「你的奴僕是甚麼，不過是一隻狗，豈可會行此個大事啊？」以利沙應講：「耶和華指示我，你欲做亞蘭王。」

14

(THR) I lī-khui Í-lī-sa, tò-khì i ê chú-lâng hia; chú-lâng mn̄g i kóng, Í-lī-sa kā lí kóng sím-mı̍h? Ìn kóng, I kā góa kóng, lí tek-khak ōe o̍ah.

(BCL) 伊離開以利沙，倒去伊的主人遐。主人問伊講：「以利沙給你講甚麼？」應講：「伊給我講你的確會活。」

15

(THR) Keh-jı̍t i the̍h kāu ê pò͘ ùn chúi, khàm ông ê bīn, ông chiū sí. Hap-siat chiū thòe i chòe ông.

(BCL) 隔日伊提厚的布搵水，蓋王的面，王就死。哈設就替伊做王。

16

(THR) Í-sek-lia̍t ông A-hap ê kiáⁿ Iok-lâm tē-gō͘ nî, Iok-sa-hoat chòe Iû-tāi ông ê sî, Iû-tāi ông Iok-sa-hoat ê kiáⁿ Iâ-hô-lâm khí-thâu chē-ūi.

(BCL) 以色列王亞哈的子約蘭第五年，約沙法做猶大王的時，猶大王約沙法的子耶和南起頭坐位。

17

(THR) Iâ-hô-lâm chē-ūi ê sî, saⁿ-cha̍p-jī hè, tī Iâ-lō͘-sat-léng chòe-ông le̍k-kè poeh-nî.

(BCL) 耶和南坐位的時三十二歲，佇耶路撒冷做王歷過八年。

18

(THR) I kiâⁿ Í-sek-lia̍t ông ê lō͘, kap A-hap ê ke bô koh-iūⁿ; in-ūi i chhōa A-hap ê cha-bó͘-kiáⁿ chòe-bó͘, kiâⁿ Iâ-hô-hoa só͘ khòaⁿ-chòe pháiⁿ ê sū.

(BCL) 伊行以色列王的路，及亞哈的家無各樣；因為伊娶亞哈的查某子做某，行耶和華所看做歹的事。

19

(THR) Chóng-sī Iâ-hô-hoa, in-ūi I ê lô͘-po̍k Tāi-pı̍t ê iân-kò͘, m̄-kam bia̍t Iû-tāi, chiàu I só͘ èng-ún Tāi-pı̍t ê ōe, éng-óan siúⁿ-sù chı̍t pha teng hō͘ i ê kiáⁿ-sun.

(BCL) 總是耶和華因為伊的奴僕大衛的緣故，呣甘滅猶大，照伊所應允大衛的話，永遠賞賜一葩燈互伊的子孫。

20

(THR) Tng Iok-lâm ê nî-kan, Í-tong pōe-pōan Iû-tāi, thoat-lī i ê chhiú-thâu, ka-kī siat-lı̍p ông.

(BCL) 當約蘭的年間，以東背叛猶大，脫離伊的手頭，家己設立王。

21

(THR) Iok-lâm tòa só͘ ū ê chiàn-chhia, kè-khì Sat-ek, thàu-mî khí-lâi, phah ûi-khùn i ê Í-tong lâng kap hiah ê chhia-tiúⁿ; peh-sìⁿ chiū tô-cháu, ta̍k-ê tò-khì i ê pò͘-pîⁿ.

(BCL) 約蘭帶所有的戰車過去撒益，透暝起來，拍圍困伊的以東人及許個車長；百姓就逃走，逐個倒去伊的布棚。

22

(THR) Án-ni, Í-tong lâng pōe-pōan Iû-tāi, thoat-lī i ê chhiú-thâu, kàu kin-á-jı̍t. Siâng hit-sî, Lı̍p-ná lâng iā pōe-pōan.

(BCL) 按呢，以東人背叛猶大，脫離伊的手頭，到今仔日。像彼時立拿人也背叛。

23

(THR) Iok-lâm kî-û ê sū, kìⁿ i só͘ kiâⁿ ê, kiám bô lóng kì tī Iû-tāi lia̍t-ông ê kì-lio̍k mah?

(BCL) 約蘭其餘的事，見伊所行的，豈無攏記佇猶大列王的記錄嗎？

24

(THR) Iok-lâm kap i ê lia̍t-chó͘ tâng-khùn, tī Tāi-pı̍t siâⁿ kap i ê chó͘ tâng bâi-chòng. I ê kiáⁿ A-hap-siā sòa-chiap i chòe-ông.

(BCL) 約蘭及伊的列祖同睏，佇大衛城及伊的祖同埋葬。伊的子亞哈謝續接伊做王。

25

(THR) Í-sek-lia̍t ông A-hap ê kiáⁿ Iok-lâm cha̍p-jī nî, Iû-tāi ông Iâ-hô-lâm ê kiáⁿ A-hap-siā khí-thâu chē-ūi.

(BCL) 以色列王亞哈的子約蘭十二年，猶大王耶和南的子亞哈謝起頭坐位。

26

(THR) A-hap-siā chē-ūi ê sî, jī-cha̍p-jī hè, tī Iâ-lō͘-sat-léng chòe ông chı̍t-nî; i ê lāu-bú miâ kiò A-tha-lī-ngá, sī Í-sek-lia̍t ông Àm-lī ê cha-bó͘-sun.

(BCL) 亞哈謝坐位的時二十二歲，佇耶路撒冷做王一年，伊的老母名叫亞她利雅，是以色列王暗利的查某孫。

27

(THR) I kiâⁿ A-hap ê ke ê lō͘, kiâⁿ Iâ-hô-hoa só͘ khòaⁿ-chòe pháiⁿ ê sū, kap A-hap ê ke bô koh-iūⁿ. In-ūi i sī A-hap ê ke ê kiáⁿ-sài.

(BCL) 伊行亞哈的家的路行耶和華所看做歹的事，及亞哈的家無各樣，因為伊是亞哈的家的子婿。

28

(THR) I kap A-hap ê kiáⁿ Iok-lâm saⁿ-kap khì Ki-lia̍t ê La̍h-bo̍at, kap A-lân ông Hap-siat kau-chiàn; A-lân lâng phah-siong Iok-lâm.

(BCL) 伊及亞哈的子約蘭，相及去基列的拉末，及亞蘭王哈設交戰。亞蘭人拍傷約蘭，

29

(THR) Iok-lâm ông tò-khì Iâ-su-lia̍t, beh i-tī i ê siong, chiū-sī i tī La̍h-bo̍at kap A-lân ông Hap-siat kau-chiàn ê sî, A-lân lâng phah--tio̍h i--ê. Iû-tāi ông Iâ-hô-lâm ê kiáⁿ A-hap-siā lo̍h-khì Iâ-su-lia̍t, beh bāi A-hap ê kiáⁿ Iok-lâm, in-ūi i ū phòa-pīⁿ.

(BCL) 約蘭王倒去耶斯列，欲醫治伊的傷，就是伊佇拉末及亞蘭王哈設交戰的時，亞蘭人拍著伊的。猶大王耶和南的子亞哈謝落去耶斯列欲覓亞哈的子約蘭，因為伊有破病。

Bible Color Mark

• 台語漢字羅馬本
• 巴克禮全羅