列王紀下 第 4 章

1

(THR) Ū chı̍t ê hū-jîn-lâng, sī sian-ti ê ha̍k-seng ê bó͘, kiò Í-lī-sa kóng, Lí ê lô͘-po̍k góa ê tiōng-hu í-keng sí, lí ê lô͘-po̍k pêng-sò͘ kèng-ùi Iâ-hô-hoa, sī lí só͘ chai ê. Taⁿ chè-chú lâi beh chhú góa nn̄g ê kiáⁿ chòe lô͘-po̍k.

(BCL) 有一個婦仁人是先知的學生的某，叫以利沙講：「你的奴僕──我的丈夫已經死，你的奴僕平素敬畏耶和華，是你所知的。今債主來欲取我二個子做奴僕。」

2

(THR) Í-lī-sa mn̄g i kóng, Góa thang kā lí chòe sím-mı̍h? lí kā góa kóng; lí chhù-lāi ū sím-mı̍h? I kóng, Lí ê lú-pī chhù-lāi chhun chı̍t pân iû, í-gōa lóng bô.

(BCL) 以利沙問伊講：「我通給你做甚麼？你給我講，你厝內有甚麼？」伊講：「你的女婢厝內剩一瓶油，以外攏無。」

3

(THR) Í-lī-sa kóng, Lí khì ah, tī gōa-bīn tùi lí hiah ê chhù-piⁿ chioh khì-kū, chiū-sī khang ê khì-kū, m̄-thang chioh chió-chió.

(BCL) 以利沙講：「你去啊，佇外面對你許個厝邊借器具，就是空的器具，呣通借少少；

4

(THR) Tio̍h jı̍p chhù, koaiⁿ-mn̂g, lí kap lí ê kiáⁿ tiàm lāi-bīn, thîn-iûⁿ tī só͘-ū ê khì-kū; thîn-móa-ê tio̍h lēng-gōa hē.

(BCL) 著入厝，關門，你及你的子踮內面斟油佇所有的器具，斟滿的著另外下。」

5

(THR) Hū-jîn-lâng lī-khui i khì, koaiⁿ mn̂g, i kap i ê kiáⁿ tiàm lāi-bīn; kiáⁿ tòa khì-kū lâi hō͘ i, i chiū thîn iû.

(BCL) 婦仁人離開伊去，關門，伊及伊的子踮內面；子帶器具來互伊，伊就斟油。

6

(THR) Hiah ê khì-kū lóng móa, i kā i ê kiáⁿ kóng, Koh the̍h khì-kū lâi hō͘ góa. Kiáⁿ kóng, Bô koh ū khì-kū lah; iû chiū chí.

(BCL) 許個器具攏滿，伊給伊的子講：「閣提器具來互我。」子講：「無閣有器具啦。」油就止。

7

(THR) Hū-jîn-lâng khì kā Siōng-tè ê lô͘-po̍k kóng. I kóng, Lí khì bōe iû lâi hêng-chè; só͘ chhun-ê, lí kap lí ê kiáⁿ thang tō͘-o̍ah.

(BCL) 婦仁人去給上帝的奴僕講，伊講：「你去賣油來還債，所剩的你及你的子通度活。」

8

(THR) Ū chı̍t-jı̍t Í-lī-sa kiâⁿ kàu Su-liām, tī-hia ū chı̍t ê hó-gia̍h ê hū-jîn-lâng, kiông-kiông lâu i tiàm teh chia̍h; āu-lâi Í-lī-sa ta̍k-pái tùi-hia keng-kè, chiū jı̍p-khì chia̍h.

(BCL) 有一日，以利沙行到書念，佇遐有一個好額的婦仁人強強留伊踮食。後來，以利沙逐擺對遐經過就入去食。

9

(THR) Hū-jîn-lâng tùi i ê tiōng-hu kóng, Lí khòaⁿ, hit ê siông-siông tùi lán chia keng-kè--ê, góa khòaⁿ i sī Siōng-tè sèng ê lô͘-po̍k.

(BCL) 婦仁人對伊的丈夫講：「你看，彼個常常對咱遮經過者，我看伊是上帝聖的奴僕。

10

(THR) Kiû lí ún, lán thang tī chhiûⁿ-téng khí chı̍t keng sòe-keng pâng, tī-hia kā i an-tì bîn-chhn̂g, toh, í, teng-tâi, hō͘ i lâi lán chia, thang jı̍p--khì hioh.

(BCL) 求你允，咱通佇牆頂起一間細間房，佇遐給伊安置眠床、桌、椅、燈台，互伊來咱遮，通入去歇。」

11

(THR) Ū chı̍t-jı̍t Í-lī-sa lâi kàu hia, chiū jı̍p-khì hit keng pâng khùn.

(BCL) 有一日，以利沙來到遐，就入去彼間房睏。

12

(THR) Í-lī-sa kā i ê lô͘-po̍k Ki-hap-se kóng, Lí kiò chit ê Su-liām ê hū-jîn-lâng lâi. I chiū kiò i lâi; hū-jîn-lâng khiā tī i ê bīn-chêng.

(BCL) 以利沙給伊的奴僕基哈西講：「你叫此個書念的婦仁人來。」伊就叫伊來，婦仁人徛佇伊的面前。

13

(THR) I kā i ê lô͘-po̍k kóng, Lí thang kā i kóng, Khòaⁿ ah, lí ūi góan hùi chōe-chōe sim-su, taⁿ tio̍h kā lí chòe sím-mı̍h? lí ài góa thòe lí kā ông, á-sī kun-tiúⁿ, kóng ah? I ìn kóng, Góa khiā-khí tī góa ê peh-sìⁿ ê tiong-kan.

(BCL) 伊給伊的奴僕講：「你通給伊講：看啊，你為阮費多多心思，今著給你做甚麼？你愛我替你給王抑是軍長講啊？」伊應講：「我徛起佇我的百姓的中間。」

14

(THR) Í-lī-sa kóng, Án-ni tio̍h ūi i cháiⁿ-iūⁿ chòe--nih? Ki-hap-se kóng, I bô kiáⁿ, i ê tiōng-hu iā lāu lah.

(BCL) 以利沙講：「按呢著為伊怎樣做呢？」基哈西講：「伊無子，伊的丈夫也老啦。」

15

(THR) I koh kóng, Kiò i lâi; chiū kiò i lâi. Hū-jîn-lâng chiū khiā tī mn̂g-kháu.

(BCL) 伊閣講：「叫伊來。」就叫伊來。婦仁人就徛佇門口。

16

(THR) I kóng, Mê-nî kàu chit-sî, lí beh phō chı̍t ê kiáⁿ. I kóng, Bô--lah. Siōng-tè ê lô͘-po̍k, góa ê chú ah, m̄-thang phiàn lí ê lú-pī.

(BCL) 伊講：「明年到此時，你欲抱一個子。」伊講：「無啦，上帝的奴僕，我的主啊，呣通騙你的女婢。」

17

(THR) Hū-jîn-lâng kó-jiân hôai-īn, kàu mê-nî hit-sî siⁿ chı̍t ê kiáⁿ, chiàu Í-lī-sa só͘ kóng--ê.

(BCL) 婦仁人果然懷孕，到明年彼時生一個子，照以利沙所講的。

18

(THR) Gín-ná tōa-hàn; ū chı̍t-jı̍t chhut-khì kàu i ê lāu-pē, kàu siu-koah ê lâng hia.

(BCL) 囝仔大漢，有一日出去到伊的老父到收割的人遐，

19

(THR) I kā lāu-pē kóng, Góa ê thâu-khak ah, góa ê thâu-khak ah; i ê lāu-pē kā lô͘-po̍k kóng, Phō i kàu i ê lāu-bú hia.

(BCL) 伊給老父講：「我的頭殼啊，我的頭殼啊！」伊的老父給奴僕講：「抱伊到伊的老母遐。」

20

(THR) I phō i kàu i ê lāu-bú hia; gín-ná chē tī lāu-bú ê kha-thâu-u, kàu tiong-tàu chiū sí.

(BCL) 伊抱伊到伊的老母遐；囝仔坐佇老母的腳頭窩，到中晝就死。

21

(THR) Lāu-bú chiūⁿ-khì lâu-téng, chiong i ê kiáⁿ hē tī Siōng-tè ê lô͘-po̍k ê bîn-chhn̂g, koaiⁿ-mn̂g chhut-lâi;

(BCL) 老母上去樓頂，將伊的子下佇上帝的奴僕的眠床，關門出來，

22

(THR) kiò i ê tiōng-hu kóng, Chhiáⁿ chhe chı̍t ê lô͘-po̍k khan chı̍t chiah lû lâi góa chia; góa beh pháu--khì Siōng-tè ê lô͘-po̍k hia, chiah tò-lâi.

(BCL) 叫伊的丈夫講：「請差一個奴僕牽一隻驢來我遮，我欲跑去上帝的奴僕遐，才倒來。」

23

(THR) Tiōng-hu kóng, Kin-á-jı̍t m̄-sī ge̍h ê chhoe-it, iā m̄-sī an-hioh, lí siáⁿ-sū beh khì i hia? Hū-jîn-lâng kóng, Pêng-an.

(BCL) 丈夫講：「今仔日呣是月的初一，也呣是安息，你啥事欲去伊遐？」婦仁人講：「平安。」

24

(THR) Chiū pī-pān lû, kā lô͘-po̍k kóng, Lí kóaⁿ-lû chìn-chêng khì; góa nā bô kā lí kóng, chiū m̄-thang khah-bān.

(BCL) 就備辦驢，給奴僕講：「你趕驢進前去，我若無給你講，就呣通卡慢。」

25

(THR) Hū-jîn-lâng chiū khì Ka-bı̍t soaⁿ, khì Siōng-tè ê lô͘-po̍k hia. Siōng-tè ê lô͘-po̍k hn̄g-hn̄g khòaⁿ-kìⁿ i, kā i ê lô͘-po̍k Ki-hap-se kóng. Khòaⁿ ah, Su-liām ê hū-jîn-lâng lâi ah;

(BCL) 婦仁人就去迦密山，去上帝的奴僕遐。上帝的奴僕遠遠看見伊，給伊的奴僕基哈西講：「看啊，書念的婦仁人來啊！

26

(THR) Lí cháu--khì ngiâ-chih i, mn̄g i kóng, Lí pêng-an mah? lí ê tiōng-hu pêng-an mah? gín-ná pêng-an mah? I kóng, Pêng-an.

(BCL) 你走去迎接伊，問伊講：你平安嗎？你的丈夫平安嗎？囝仔平安嗎？」伊講：「平安。」

27

(THR) Hū-jîn-lâng kàu hit ê soaⁿ, kàu Siōng-tè ê lô͘-po̍k hia, chiū phō i ê kha. Ki-hap-se chìn-chêng beh kā i chhia-khui; Siōng-tè ê lô͘-po̍k kóng, Kù-chāi i, in-ūi i sim-lāi thòng-khó͘; Iâ-hô-hoa tùi góa ún-khǹg, bô kā góa kóng.

(BCL) 婦仁人到彼個山，到上帝的奴僕遐，就抱伊的腳。基哈西進前欲給伊捙開，上帝的奴僕講：「據在伊，因為伊心內痛苦，耶和華對我隱囥，無給我講。」

28

(THR) Hū-jîn-lâng kóng, Góa kiám bat tùi góa ê chú kiû kiáⁿ mah? góa kiám bô kóng, M̄-thang phiàn góa mah?

(BCL) 婦仁人講：「我豈曾對我的主求子嗎？我豈無講，呣通騙我嗎？」

29

(THR) I kā Ki-hap-se kóng, Lí hâ-io, chhiú kia̍h góa ê kóaiⁿ, chìn-chêng khì; nā tú-tio̍h lâng, bo̍h-tit kā in chhéng-an, lâng nā chhéng-an lí, iā bo̍h-tit ìn i; tio̍h ēng góa ê kóaiⁿ-á hē tī gín-ná ê bīn.

(BCL) 伊給基哈西講：「你縖腰手抬我枴進前去；若抵著人，莫得給請安，人若請安你，也莫得應伊；著用我的枴仔下佇囝仔的面。」

30

(THR) Gín-ná ê lāu-bú kóng, Góa kí éng-o̍ah ê Iâ-hô-hoa kap lí ê o̍ah-miā lâi kóng, góa tek-khak m̄ lī-khui lí. Í-lī-sa chiū khí-lâi, tè i khì.

(BCL) 囝仔的老母講：「我指永活的耶和華及你的活命來講，我的確呣離開你。」以利沙就起來，隨伊去。

31

(THR) Ki-hap-se thâu-chêng khì, ēng kóaiⁿ-á hē tī gín-ná ê bīn; chóng-sī bô siaⁿ-seh, iā m̄-chai lâng. Ki-hap-se tò-tńg tú-tio̍h i, kā i kóng, Gín-ná bô chhíⁿ.

(BCL) 基哈西頭前去，用枴仔下佇囝仔的面，總是無聲說，也呣知人。基哈西倒轉抵著伊，給伊講：「囝仔無醒。」

32

(THR) Í-lī-sa kàu-tè, jı̍p chhù, khòaⁿ-kìⁿ gín-ná í-keng sí, hē tī i ê bîn-chhn̂g.

(BCL) 以利沙到地，入厝，看見囝仔已經死，下佇伊的眠床。

33

(THR) I jı̍p-khì, chiū koaiⁿ-mn̂g, chí-ū in nn̄g-ê tī lāi-bīn; i chiū kî-tó Iâ-hô-hoa.

(BCL) 伊入去就關門，只有二個佇內面，伊就祈禱耶和華。

34

(THR) Chiūⁿ-khì phak tī gín-ná ê seng-khu, chhùi tùi chhùi, ba̍k-chiu tùi ba̍k-chiu, chhiú tùi chhiú, kui-sin àⁿ tī gín-ná ê seng-khu; gín-ná ê bah chiū chiām-chiām sio-lō.

(BCL) 上去仆佇囝仔的身軀，嘴對嘴，目睭對目睭，手對手；歸身俯佇囝仔的身軀，囝仔的肉就漸漸燒烙。

35

(THR) I lo̍h-lâi, tī chhù-lāi kiâⁿ-lâi kiâⁿ-khì chı̍t-pái, koh chiūⁿ-khì, kui-sin àⁿ tī gín-ná; gín-ná phah-ka-chhiùⁿ chhit-pái, ba̍k-chiu chiū thí-khui.

(BCL) 伊落來，佇厝內行來行去一擺，閣上去歸身俯佇囝仔，囝仔拍加嚏七擺，目睭就展開。

36

(THR) Í-lī-sa kiò Ki-hap-se kóng, Lí kiò chit ê Su-liām ê hū-jîn-lâng lâi. I chiū kiò i; i jı̍p-lâi i hia, Í-lī-sa kóng, Phō lí ê gín-ná khí--lâi.

(BCL) 以利沙叫基哈西講：「你叫此個書念的婦仁人來」；伊就叫伊，伊入來伊遐。以利沙講：「抱你的囝仔起來。」

37

(THR) Hū-jîn-lâng chiū jı̍p-lâi, àⁿ tī i ê kha-chêng, phak tī tōe--nih, phō i ê kiáⁿ chhut-khì.

(BCL) 婦仁人就入來，俯佇伊的腳前仆佇地裡，抱伊的子出去。

38

(THR) Í-lī-sa koh lâi kàu Kiat-kah; hit-sî kok-lāi ki-hng, sian-ti ê ha̍k-seng chē tī i ê bīn-chêng; i hoan-hù lô͘-po̍k kóng, Lí chiong tōa-tiáⁿ hē tī hé--nih, kā sian-ti ê ha̍k-seng chú chhài-thng.

(BCL) 以利沙閣來到吉甲，彼時國內飢荒。先知的學生坐佇伊的面前，伊吩咐奴僕講：「你將大鼎下佇火裡，給先知的學生煮菜湯。」

39

(THR) Ū chı̍t-lâng khì chhân--nih bán chhài, tú-tio̍h chı̍t châng iá-tîn, chiū bán i ê koe móa-phè tò-lâi; chhiat i, lok tī chú chhài-thng ê tiáⁿ; in-ūi in m̄ bat sī sím-mı̍h mı̍h.

(BCL) 有一人去田裡挽菜，抵著一欉野藤，就挽伊的瓜滿帕倒來，切伊，橐佇煮菜湯的鼎，因為呣識是甚麼物。

40

(THR) Piàⁿ--chhut-lâi hō͘ in chia̍h; chia̍h chhài-thng ê sî, in lóng kiò kóng, Siōng-tè ê lô͘-po̍k ah, tiáⁿ-lāi ū sí ê to̍k; in lóng bōe-chia̍h-tit.

(BCL) 傾出來互食；食菜湯的時，攏叫講：「上帝的奴僕啊，鼎內有死的毒！」攏食得。

41

(THR) Í-lī-sa kóng, The̍h tām-po̍h mī-hún lâi; chiū chiong mī-hún sám tī tiáⁿ--nih, kóng, Piàⁿ--chhut-lâi hō͘ in chia̍h; tiáⁿ-lāi chiū bô hāi.

(BCL) 以利沙講：「提淡薄麵粉來」，就將麵粉摻佇鼎裡，講：「傾出來互食！」鼎內就無害。

42

(THR) Ū chı̍t-lâng tùi Pa-le̍k-sa-lī-sa lâi, tòa khí-thâu se̍k ê be̍h só͘ chòe ê piáⁿ, kap tōa-be̍h piáⁿ jī-cha̍p-ê, kap sin ê sūi, tóe tī tē--nih, sàng hō͘ Siōng-tè ê lô͘-po̍k. I chiū kóng, Chiong chiah-ê hō͘ peh-sìⁿ chia̍h.

(BCL) 有一人對巴力沙利沙來，帶起頭熟的麥所做的餅及大麥餅二十個，及新的穗，貯佇袋裡，送互上帝的奴僕。伊就講：「將諸個互百姓食。」

43

(THR) I ê chhe-ēng kóng, Cháiⁿ-iūⁿ, góa kiám thang pâi chiah-ê tī chı̍t-pah lâng ê bīn-chêng mah? I kóng, Chòe lí hō͘ peh-sìⁿ chia̍h, in-ūi Iâ-hô-hoa án-ni kóng, In beh chia̍h i, iáu ū chhun.

(BCL) 伊的差用講：「怎樣，我豈通排諸個佇一百人的面前嗎？」伊講：「做你互百姓食！因為耶和華按呢講，欲食伊，猶有剩。」

44

(THR) I chiū pâi tī in ê bīn-chêng, in chia̍h i, iā ū chhun, chiàu Iâ-hô-hoa só͘ kóng.

(BCL) 伊就排佇的面前，食伊，也有剩，照耶和華所講。

Bible Color Mark

• 台語漢字羅馬本
• 巴克禮全羅