哥林多後書 第 8 章

1

(THR) Hiaⁿ-tī ah, góan chiong Siōng-tè só͘ siúⁿ-sù tī Má-kî-tùn chiah ê kàu-hōe ê un pò lín chai,

(BCL) 兄弟啊，阮將上帝所賞賜佇馬其頓諸個教會的恩報恁知，

2

(THR) chiū-sī tī hōan-lān tiong siū tōa chhì-liān ê sî, in ê tōa hoaⁿ-hí, kap in ê ke̍k sòng-hiong, ū kek-gōe chiâⁿ in tōa-tōa ê hó-sim.

(BCL) 就是佇患難中受大試煉的時，的大歡喜，及的極喪鄉有格外成大大的好心。

3

(THR) In-ūi góa kan-chèng in ka-kī kam-gōan chiàu in ê le̍k-liōng, koh kè-thâu tī in ê le̍k-liōng,

(BCL) 因為我干證，家己甘願照的力量，閣過頭佇的力量，

4

(THR) khún-chhiat kiû góan hō͘ in tit-tio̍h chit ê un, lâi saⁿ-kap ū hūn tī ho̍k-sāi sèng-tô͘.

(BCL) 懇切求阮互得著此個恩，來相及有份佇服事聖徒；

5

(THR) Koh m̄ nā chiàu góan só͘ ǹg-bāng, chiū-sī tāi-seng chiong pún-sin hiàn hō͘ Chú, iā tùi Siōng-tè ê chí-ì hiàn hō͘ góan.

(BCL) 閣呣若照阮所向望，就是代先將本身獻互主，也對上帝的旨意獻互阮。

6

(THR) Só͘-í góan khǹg Thê-to, i kì-jiân ū thê-chhiòng chit ê un-hūi tī lín tiong-kan, chiū tio̍h chiàu án-ni hō͘ i chiâⁿ.

(BCL) 所以阮勸提多，伊既然有提倡此個恩惠佇恁中間，就著照按呢互伊成。

7

(THR) Taⁿ lín tī hōan sū, chhin-chhiūⁿ sìn-sim, kháu-châi, tì-sek, lóng-chóng ê jia̍t-sim, í-kı̍p lín ê thiàⁿ góan, chiah ê sū kì-jiân chhiong-móa, chiū tī chit ê un-hūi iā tio̍h chhiong-móa.

(BCL) 今恁佇凡事親像信心、口才、智識、攏總的熱心，以及恁的疼阮，諸個事既然充滿，就佇此個恩惠也著充滿。

8

(THR) Góa kóng án-ni, m̄ sī bēng-lēng lín; sī tùi pa̍t lâng ê un-khûn lâi chhì-giām lín jîn-ài ê sı̍t-chāi.

(BCL) 我講按呢，呣是命令恁，是對別人的殷勤來試驗恁仁愛的實在。

9

(THR) In-ūi lín chai lán ê Chú Iâ-so͘ Ki-tok ê un; I pún hó-gia̍h, ūi-tio̍h lín chiâⁿ-chòe sòng-hiong, beh hō͘ lín tùi I ê sòng-hiong lâi chiâⁿ-chòe hó-gia̍h.

(BCL) 因為恁知咱的主耶穌基督的恩：伊本好額，為著恁成做喪鄉，欲互恁對伊的喪鄉，來成做好額。

10

(THR) Góa tī chit chân sū chiong góa ê ì-kiàn hō͘ lín chai; in-ūi che sī lín ê lī-ek; sī lín tùi kū-nî í-keng thê-chhiòng chit ê sū, m̄ nā chòe-chêng kiâⁿ, iā chòe-chêng kam-gōan.

(BCL) 我佇此層事將我的意見互恁知，因為這是恁的利益；是恁對舊年已經提倡此個事，呣若做前行，也做前甘願，

11

(THR) Taⁿ tio̍h chòe-chiâⁿ chit ê sū; tì-kàu lín kì-jiân ū jia̍t-sim ê kam-gōan, iā chiàu só͘ ū ê lâi chiâⁿ i.

(BCL) 今著做成此個事。致到恁既然有熱心的甘願，也照所有的來成伊。

12

(THR) In-ūi í-keng ū chit hō jia̍t-sim, chiū tit-tio̍h chiap-la̍p, sī chiàu lâng só͘ ū ê, m̄ sī chiàu lâng só͘ bô ê.

(BCL) 因為已經有此號熱心，就得著接納，是照人所有的，呣是照人所無的。

13

(THR) Khiok m̄ sī ài pa̍t lâng liāu-lēng, lín ha̍t-ta̍t, sī ài tit pîⁿ-pîⁿ;

(BCL) 卻呣是愛別人聊量，恁豁達，

14

(THR) hiān-sî chiong lín ū chhun ê pó͘ in ê bô kàu, thang chiong in ū chhun ê pó͘ lín ê bô kàu, án-ni chiah ōe pîⁿ;

(BCL) 是愛得平平，現時將恁有剩的補的無夠，通將有剩的補恁的無夠，按呢才會平。

15

(THR) chiàu só͘ kì-chài kóng, khioh chōe ê bô chhun, khioh chió ê bô khiàm.

(BCL) 照所記載講：拾多的無剩；拾少的無欠。

16

(THR) Kám-siā Siōng-tè hō͘ Thê-to ê sim pîⁿ-pîⁿ ūi-tio̍h lín un-khûn;

(BCL) 感謝上帝，互提多的心平平為著恁殷勤。

17

(THR) i khiok iā sī siū góan ê khó͘-khǹg; chóng-sī i pún-jiân chin un-khûn, ka-kī kam-gōan khì chhē lín.

(BCL) 伊卻也是受阮的苦勸，總是伊本然真殷勤，家己甘願去尋恁。

18

(THR) Góa iā chhe chı̍t ê hiaⁿ-tī kap i khì, chiū-sī tī hok-im ū hō͘ chèng kàu-hōe o-ló ê;

(BCL) 我也差一個兄弟及伊去，就是佇福音有互眾教會謳咾的。

19

(THR) m̄ nā án-ni, iā sī chiah ê kàu-hōe só͘ kéng-sóan kap góan chhut-mn̂g tàu liāu-lí góan só͘ teh pān ê un-hūi, lâi piáu-bêng Chú ê êng-kng kap góan ê kam-gōan;

(BCL) 呣若按呢，也是諸個教會所揀選，及阮出門鬥料理阮所辦的恩惠，來表明主的榮光，及阮的甘願。

20

(THR) sī tî-hông lâng, ūi-tio̍h góan só͘ liāu-lí ê chōe-chōe gûn lâi hiâm góan;

(BCL) 是持防人為著阮所料理的多多銀，來嫌阮。

21

(THR) in-ūi góan tô͘-bô͘ hó-sū, m̄ nā tī Chú ê bīn-chêng, iā sī tī lâng ê bīn-chêng.

(BCL) 因為阮圖謀好事，呣若佇主的面前，也是佇人的面前。

22

(THR) Koh chhe góan ê hiaⁿ-tī chı̍t lâng kap in khì, góan tī chōe-chōe sū bat chōe-chōe pái chhì-giām i, chai i ê un-khûn, taⁿ in-ūi chhim sìn lín, chiū koh khah un-khûn.

(BCL) 閣差阮的兄弟一人及去；阮佇多多事曾多多擺試驗伊，知伊的殷勤。今因為深信恁，就閣卡殷勤。

23

(THR) Lūn-kàu Thê-to, i sī góa ê tâng-phōaⁿ, ūi-tio̍h lín lâi saⁿ-kap tio̍h-bôa ê. Á-sī góan chiah ê hiaⁿ-tī, in sī chiah ê kàu-hōe ê sù-chiá, iā sī Ki-tok ê êng-kng.

(BCL) 論到提多，伊是我的同伴，為著恁來相及著磨的。抑是阮諸個兄弟，是諸個教會的使者，也是基督的榮光。

24

(THR) Só͘-í tī chiah ê kàu-hōe ê bīn-chêng, lín tio̍h tùi in hián-bêng lín ê jîn-ài ê pîn-kù, iā hián-bêng góan ūi-tio̍h lín só͘ khoa-kháu ê sī sı̍t-chāi.

(BCL) 所以，佇諸個教會的面前恁著對顯明恁的仁愛的憑據，也顯明阮為著恁所誇口的是實在。

Bible Color Mark

• 台語漢字羅馬本
• 巴克禮全羅