哥林多後書 第 7 章

1

(THR) Só͘ thiàⁿ ê hiaⁿ-tī ah, kì-jiân ū chiah ê èng-ún, lán tio̍h chheng-khì pún-sin, tû-khì it-chhè jio̍k-thé kap sîn ê lâ-sâm, kiaⁿ-ùi Siōng-tè, lâi ôan-chôan chiâⁿ-sèng.

(BCL) 所疼的兄弟啊，既然有諸個應允，咱著清氣本身，除去一切肉體、及神的垃墋，驚畏上帝，來完全成聖。

2

(THR) Tio̍h khui-khoah lín ê sim, lâi chiap-la̍p góan. Góan bē bat khek-khui lâng, bē bat sún-hōai lâng, bē bat phiⁿ lâng.

(BCL) 著開闊恁的心來接納阮。阮未曾剋虧人，未曾損壞人，未曾偏人。

3

(THR) Góa kóng án-ni m̄ sī beh chek-chōe lín; in-ūi góa í-keng ū kóng, lín tī góan ê sim-thâu, tâng sí tâng o̍ah.

(BCL) 我講按呢，呣是欲責罪恁。因為我已經有講，恁佇阮的心頭，同死同活。

4

(THR) Góa ǹg tī lín tōa hó-táⁿ, góa ūi-tio̍h lín tōa khoa-kháu. Góa móa-sim tit-tio̍h an-ùi; tī góan it-chhè hōan-lān tiong, góa ū kek-gōe ê hoaⁿ-hí.

(BCL) 我向佇恁大好膽，我為著恁大誇口，我滿心得著安慰；佇阮一切患難中我有格外的歡喜。

5

(THR) In-ūi góan lâi kàu Má-kî-tùn ê sî, góan ê jio̍k-thé lóng bô pêng-an, hōan sū tú-tio̍h hōan-lān, gōa-bīn ū saⁿ-chiⁿ, lāi-bīn ū kiaⁿ.

(BCL) 因為阮來到馬其頓的時，阮的肉體攏無平安，凡事抵著患難，外面有相爭，內面有驚。

6

(THR) Chóng-sī an-ùi pi-bî ê lâng ê, chiū-sī Siōng-tè, ēng Thê-to kàu lâi an-ùi góan.

(BCL) 總是安慰卑微的人的就是上帝，用提多到來安慰阮；

7

(THR) M̄ nā ēng i kàu, iā sī ēng i tùi lín só͘ siū ê an-ùi lâi an-ùi góan, in-ūi i chiong lín ê lôan-bō͘, lín ê ai-siong, lín ǹg tī góa ê jia̍t-sim, kā góan kóng, tì-kàu góa it-hoat hoaⁿ-hí.

(BCL) 呣若用伊到，也是用伊對恁所受的安慰，來安慰阮；因為伊將恁的戀慕、恁的哀傷，恁向佇我的熱心，給阮講，致到我益發歡喜。

8

(THR) Góa bat ēng phoe hō͘ lín hôan-ló, chêng sui-jiân ū m̄ kè-sim, taⁿ chiū bô lah; in-ūi góa khòaⁿ hit tiuⁿ phoe hō͘ lín hôan-ló ê, put-kò sī chiām-sî.

(BCL) 我曾用批互恁煩惱，前雖然有呣過心，今就無啦；因為我看彼張批互恁煩惱的不過是暫時。

9

(THR) Taⁿ góa hoaⁿ-hí, m̄ sī in-ūi lín hôan-ló, sī in-ūi lín ū tùi hôan-ló tì-kàu hóan-hóe. In-ūi lín hôan-ló sī sūn Siōng-tè, hō͘ lín bô chı̍t hāng tùi góan siū khek-khui.

(BCL) 今我歡喜，呣是因為恁煩惱，是因為恁有對煩惱致到反悔。因為恁煩惱是順上帝，互恁無一項對阮受剋虧。

10

(THR) In-ūi sūn Siōng-tè ê hôan-ló siⁿ-chhut hóan-hóe, tì-kàu tit-tio̍h kiù, bô ū āu-lâi ê thè-hóe; nā-sī sè-kan ê hôan-ló sī tì-kàu sí.

(BCL) 因為順上帝的煩惱生出反悔，致到得著救，無有後來的退悔；若是世間的煩惱是致到死。

11

(THR) In-ūi lín khòaⁿ, lín chit ê sūn Siōng-tè ê hôan-ló, tī lín ū siⁿ-chhut jōa tōa ê un-khûn, cháiⁿ-iūⁿ ê ka-kī hun-sò͘, cháiⁿ-iūⁿ ê òan-chhoeh, cháiⁿ-iūⁿ ê kiaⁿ-hiâⁿ, cháiⁿ-iūⁿ ê lôan-bō͘, cháiⁿ-iūⁿ ê jia̍t-sim, cháiⁿ-iūⁿ ê chek-ho̍at. Lín tī chit chân sū í-keng ta̍k hāng piáu-bêng ka-kī sī chheng-khì.

(BCL) 因為恁看，恁此個順上帝的煩惱，佇恁有生出偌大的殷勤、怎樣的家己分訴、怎樣的怨慼、怎樣的驚惶、怎樣的戀慕、怎樣的熱心、怎樣的責罰。恁佇此層事，已經逐項表明家己是清氣。

12

(THR) Góa chêng sui-bóng siá phoe hó͘ lín, m̄ sī ūi-tio̍h hit ê khek-khui lâng ê, iā m̄ sī ūi-tio̍h hit ê siū khek-khui ê, sī beh hō͘ lín ūi-tio̍h góan ê un-khûn, tī Siōng-tè ê bīn-chêng, tùi lín hián-bêng.

(BCL) 我前雖罔寫批互恁，呣是為著彼個剋虧人的，也呣是為著彼個受剋虧的，是欲互恁為著阮的殷勤佇上帝的面前對恁顯明。

13

(THR) Só͘-í góan í-keng siū an-ùi; koh tī an-ùi tiong, in-ūi Thê-to ê hoaⁿ-hí chiū góan ê hoaⁿ-hí it-hoat chhiong-móa, in-ūi i ê sim tùi lín chèng lâng lâi tit-tio̍h an-hioh.

(BCL) 所以，阮已經受安慰。閣佇安慰中，因為提多的歡喜就阮的歡喜益發充滿，因為伊的心對恁眾人來得著安息。

14

(THR) Góa nā bat tùi i khoa-kháu lín sím-mı̍h tāi-chì, iā chiū bô kiàn-siàu. In-ūi góan tùi Thê-to só͘ khoa-kháu lín ê ōe sī chin-sı̍t, chhin-chhiūⁿ góan tùi lín só͘ kóng ê ōe iā lóng sī chin-sı̍t.

(BCL) 我若曾對伊誇口恁甚麼代誌，也就無見誚；因為阮對提多所誇口恁的話是真實，親像阮對恁所講的話也攏是真實。

15

(THR) Koh i kì-liām lín lóng sūn-ho̍k, ēng kiaⁿ-hiâⁿ ngia̍uh-ngia̍uh-chhoah chiap-la̍p i, chiū i ê sim it-hoat ǹg tī lín.

(BCL) 閣伊記念恁攏順服，用驚惶愕愕惙接納伊，就伊的心益發向佇恁。

16

(THR) Taⁿ góa hoaⁿ-hí, in-ūi lūn-kàu lín, góa hōan sū ōe pàng-sim tit.

(BCL) 今我歡喜，因為論到恁，我凡事會放心得。

Bible Color Mark

• 台語漢字羅馬本
• 巴克禮全羅