哥林多後書 第 1 章

1

(THR) Tùi Siōng-tè ê chí-ì chòe Ki-tok Iâ-so͘ ê sù-tô͘ Pó-lô, kap hiaⁿ-tī Thê-mô͘-thài, phoe kià hō͘ Siōng-tè ê kàu-hōe tī Ko-lîm-to ê, í-kı̍p piàn A-kai-a lóng-chóng ê sèng-tô͘;

(BCL) 對上帝的旨意做基督耶穌的使徒保羅及兄弟提摩太，批寄互上帝的教會佇哥林多的，以及遍亞該亞攏總的聖徒。

2

(THR) gōan lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

(BCL) 願恁對咱的父上帝及主耶穌基督得著恩典、平安！

3

(THR) Gōan lán ê Chú Iâ-so͘ Ki-tok ê Siōng-tè, iā sī I ê Pē, chiū-sī lîn-bín ê Pē, siúⁿ-sù ta̍k iūⁿ an-ùi ê Siōng-tè, tit-tio̍h o-ló.

(BCL) 願咱的主耶穌基督的上帝，也是伊的父，就是憐憫的父，賞賜逐樣安慰的上帝得著謳咾。

4

(THR) Góan tī ta̍k iūⁿ hōan-lān tiong, I an-ùi góan, beh hō͘ góan tùi Siōng-tè só͘ an-ùi góan ê an-ùi, lâi an-ùi ta̍k iūⁿ hōan-lān tiong ê lâng.

(BCL) 阮佇逐樣患難中，伊安慰阮，欲互阮對上帝所安慰阮的安慰，來安慰逐樣患難中的人。

5

(THR) In-ūi chhin-chhiūⁿ Ki-tok ê kan-khó͘ móa-chhut-lâi kàu tī góan, góan ê an-ùi iā tùi Ki-tok móa-móa.

(BCL) 因為親像基督的艱苦滿出來到佇阮，阮的安慰也對基督滿滿。

6

(THR) Góan he̍k-sī siū hōan-lān, sī beh chòe lín siū an-ùi kap tit kiù ê lō͘-ēng; he̍k-sī siū an-ùi, sī beh chòe lín siū an-ùi ê lō͘-ēng, chit ê an-ùi hō͘ lín ōe thun-lún kan-khó͘, chiàu góan só͘ tú-tio̍h ê chı̍t iūⁿ.

(BCL) 阮或是受患難，是欲做恁受安慰，及得救的路用；或是受安慰，是欲做恁受安慰的路用；此個安慰互恁會吞艱苦，照阮所抵著的一樣。

7

(THR) Koh góan só͘ thòe lín ǹg-bāng ê sī kian-kò͘, in-ūi chai lín kì-jiân ū hūn tī chiah ê kan-khó͘, chiū ū hūn tī an-ùi, iā sī án-ni.

(BCL) 閣阮所替恁向望的是堅固，因為知恁既然有份佇諸個艱苦，就有份佇安慰，也是按呢。

8

(THR) Hiaⁿ-tī ah, lūn-kàu góan tī A-se-a só͘ tú-tio̍h ê hōan-lān, góan m̄ ài lín m̄ chai; sī siū teh-tāng chin thiám kàu tng bōe khí, liân o̍ah iā bô ǹg-bāng;

(BCL) 兄弟啊，論到阮佇亞西亞所抵著的患難，阮呣愛恁呣知，是受壓重真殄，到當起，連活也無向望；

9

(THR) góan ka-kī sim-lāi iā àn-sǹg ōe sí; beh hō͘ góan bô óa-khò ka-kī, to̍k-to̍k óa-khò hō͘ sí-lâng koh-o̍ah ê Siōng-tè;

(BCL) 阮家己心內也按算會死，欲互阮無倚靠家己，獨獨倚靠互死人復活的上帝。

10

(THR) I í-keng kiù góan thoat-lī hiah tōa ê sí-bô, koh beh kiù góan; góan iā ǹg-bāng I iáu beh kiù góan;

(BCL) 伊已經救阮脫離許大的死無，閣欲救阮，阮也向望伊猶欲救阮。

11

(THR) lín iā ēng kî-tó lâi pang-chān góan, beh hō͘ chōe-chōe lâng in-ūi góan lâi kám-siā, chiū-sī ūi-tio̍h góan tùi chōe-chōe lâng kî-tó só͘ tit-tio̍h ê un.

(BCL) 恁也用祈禱來幫助阮，欲互多多人因為阮來感謝，就是為著阮對多多人祈禱所得著的恩。

12

(THR) In-ūi góan só͘ khoa-kháu ê, góan ê liông-sim iā chòe góan ê kan-chèng, chiū-sī góan chiàu Siōng-tè ê sèng-kiat kap sêng-sı̍t, m̄ sī ēng jio̍k-thé ê tì-hūi, sī ēng Siōng-tè ê un, óng-lâi tī sè-kan, tùi lín koh khah sī án-ni.

(BCL) 因為阮所誇口的，阮的良心也做阮的干證，就是阮照上帝的聖潔及誠實，呣是用肉體的智慧，是用上帝的恩，往來佇世間，對恁閣卡是按呢。

13

(THR) In-ūi góan só͘ siá hō͘ lín ê bô pa̍t hāng, to̍k-to̍k lín só͘ tha̍k só͘ jīn ê, góa iā ǹg-bāng lín kàu bé beh jīn i;

(BCL) 因為阮所寫互恁的無別項，獨獨恁所讀、所認的，我也向望恁到尾欲認伊；

14

(THR) chhin-chhiūⁿ lín tiong-kan ū lâng jīn góan, tī lán ê Chú Iâ-so͘ ê jı̍t, lia̍h góan chòe lín ê khoa-kháu, chhin-chhiūⁿ góan iā lia̍h lín chòe góan ê khoa-kháu.

(BCL) 親像恁中間有人認阮，佇咱的主耶穌的日掠阮做恁的誇口，親像阮也掠恁做阮的誇口。

15

(THR) Góa in-ūi sìn án-ni, pún gī-tiāⁿ beh tāi-seng chiū-kūn lín, hō͘ lín têng-chài tit-tio̍h lī-ek;

(BCL) 我因為信按呢，本議定欲代先就近恁，互恁重再得著利益；

16

(THR) iā ài tùi lín hia keng-kè khì Má-kî-tùn, koh tùi Má-kî-tùn khì lín hia, hō͘ lín sàng góa khì Iû-thài.

(BCL) 也愛對恁遐經過，去馬其頓，閣對馬其頓去恁遐，互恁送我去猶太。

17

(THR) Góa í-keng gī-tiāⁿ án-ni, kiám ū ēng phû-phiò mah? á-sī góa só͘ gī-tiāⁿ ê sī chiàu jio̍k-thé lâi gī-tiāⁿ, tì-kàu góa ū hit ê Sī, sī, ia̍h ū hit ê M̄ sī, m̄ sī mah?

(BCL) 我已經議定按呢，豈有用浮漂嗎？抑是我所議定的，是照肉體來議定，致到我有彼個是，是，亦有彼個呣是，呣是嗎？

18

(THR) Siōng-tè sī sìn-sı̍t, án-ni góan só͘ tùi lín kóng ê ōe iā bô ū Sī kap M̄ sī.

(BCL) 上帝是信實，按呢阮所對恁講的話，也無有是及呣是。

19

(THR) In-ūi tùi góan chiah-ê, chiū-sī tùi góa kap Se-lah Thê-mô͘-thài, tī lín tiong-kan só͘ thôan Siōng-tè ê Kiáⁿ Iâ-so͘ Ki-tok bô ū Sī kap M̄ sī, chāi-tī I chí ū Sī nā-tiāⁿ.

(BCL) 因為對阮諸個就是對我及西拉提摩太，佇恁中間所傳上帝的子耶穌基督，無有是及呣是，在佇伊只有是若定。

20

(THR) In-ūi Siōng-tè só͘ èng-ún ê, bô lūn jōa chōe, chāi-tī I lóng ū Sī; só͘-í À-bēng iā sī tùi I, hō͘ Siōng-tè tùi lán tit-tio̍h êng-kng.

(BCL) 因為上帝所應允的，無論偌多，在佇伊攏有是。所以阿們也是對伊，互上帝對咱得著榮光。

21

(THR) Taⁿ kian-kò͘ góan kap lín tī Ki-tok, koh ēng iû boah lán ê, sī Siōng-tè;

(BCL) 今堅固阮及恁佇基督，閣用油抹咱的是上帝。

22

(THR) I iā kā lán khàm-ìn, koh siúⁿ-sù Sîn tī lán ê sim chòe tiāⁿ.

(BCL) 伊也給咱蓋印，閣賞賜神佇咱的心做定。

23

(THR) Góa kí góa ê o̍ah-miā kiû Siōng-tè chòe kan-chèng, góa bô koh kàu Ko-lîm-to sī in-ūi khoan-iông lín.

(BCL) 我指我的活命求上帝做干證，我無閣到哥林多是因為寬容恁。

24

(THR) M̄ sī góan kóan-hat lín ê sìn, sī pang-chān lín ê hoaⁿ-hí; in-ūi lín tùi sìn lâi khiā-chāi.

(BCL) 呣是阮管轄恁的信，是幫助恁的歡喜，因為恁對信來徛在。

Bible Color Mark

• 台語漢字羅馬本
• 巴克禮全羅