撒母耳記上 第 8 章

1

(THR) Sat-bó͘-jíⁿ í-keng lāu, chiū siat-lı̍p i ê kiáⁿ chòe Í-sek-lia̍t ê sū-su.

(BCL) 撒母耳已經老，就設立伊的子做以色列的士師。

2

(THR) I ê tōa-kiáⁿ miâ-kiò Iok-jíⁿ, tē-jī-kiáⁿ miâ-kiò A-pí-a; in tī Pia̍t-sī-pa chòe sū-su.

(BCL) 伊的大子名叫約珥，第二子名叫亞比亞；佇別是巴做士師。

3

(THR) Chóng-sī i ê kiáⁿ bô kiâⁿ i ê lō͘, phian-su tham-châi, siū pò͘-lō͘, bô chiàu-tı̍t phòaⁿ-tòan.

(BCL) 總是伊的子無行伊的路，偏私貪財，受賄賂，無照直判斷。

4

(THR) Í-sek-lia̍t ê tiúⁿ-ló lóng chū-chı̍p, kàu La̍h-má kìⁿ Sat-bó͘-jíⁿ;

(BCL) 以色列的長老攏聚集，到拉瑪見撒母耳，

5

(THR) kā i kóng, Khòaⁿ ah, lí í-keng lāu, lí ê kiáⁿ bô kiâⁿ lí ê lō͘; taⁿ kiû lí kā góan siat-lı̍p chı̍t ê ông phòaⁿ-tòan góan, chhin-chhiūⁿ lia̍t-kok chı̍t-iūⁿ.

(BCL) 給伊講：「看啊，你已經老，你的子無行你的路。今求你給阮設立一個王判斷阮，親像列國一樣。」

6

(THR) In kóng, Kiû lí kā góan siat-lı̍p chı̍t ê ông phòaⁿ-tòan góan, hit ê sū Sat-bó͘-jíⁿ bô hoaⁿ-hí. Sat-bó͘-jíⁿ chiū kî-tó Iâ-hô-hoa.

(BCL) 講「求你給阮設立一個王判斷阮」彼個事撒母耳無歡喜，撒母耳就祈禱耶和華。

7

(THR) Iâ-hô-hoa tùi Sat-bó͘-jíⁿ kóng, Peh-sìⁿ tùi lí só͘ kóng it-chhè ê ōe, lí tio̍h thàn; in-ūi in m̄-sī khì-sak lí, sī khì-sak Góa, bô hō͘ Góa chòe in ê ông.

(BCL) 耶和華對撒母耳講：「百姓對你所講一切的話，你著趁，因為呣是棄拺你，是棄拺我，無互我做的王。

8

(THR) Tùi Góa chhōa in chhut Ai-kı̍p kàu kin-á-jı̍t, in it-chhè ê só͘-kiâⁿ lī-khui Góa, khì ho̍k-sāi pa̍t ê siōng-tè, taⁿ iā chiàu án-ni khóan-thāi lí;

(BCL) 對我導出埃及到今仔日，一切的所行離開我，去服事別個上帝。今也照按呢款待你。

9

(THR) só͘-í lí tio̍h thàn in ê ōe; chóng-sī tio̍h giâm-giâm kéng-kài in, hō͘ in chai chiong-lâi kóan-lí in ê ông ê chè-tō͘ sī cháiⁿ-iūⁿ.

(BCL) 所以你著趁的話，總是著嚴嚴警戒，互知將來管理的王的制度是怎樣。」

10

(THR) Sat-bó͘-jíⁿ ēng Iâ-hô-hoa ê ōe lóng kā peh-sìⁿ kóng, chiū-sī hiah ê tùi i thó chı̍t ê ông ê, kóng,

(BCL) 撒母耳用耶和華的話攏給百姓講，就是許個對伊討一個王的，講：

11

(THR) Chiong-lâi kóan-lí lín ê ông ê chè-tō͘ chiū-sī án-ni, i beh chhú lín ê kiáⁿ, ūi ka-kī siat-lı̍p i kā i kóan-chhia, chòe i ê bé-peng, cháu tī chhia ê thâu-chêng;

(BCL) 「將來管理恁的王的制度就是按呢：伊欲取恁的子為家己設立伊給伊管車，做伊的馬兵，走佇車的頭前；

12

(THR) koh beh ūi ka-kī siat-lı̍p in chòe chhian-chóng, ngó͘-sı̍p-hu-tióng; iā beh siat-lı̍p lâng kā i choh-hn̂g, siu gō͘-kak, chè-chō kun-khì, kap chhia-nih ê khì-kū;

(BCL) 閣欲為家己設立做千總、五十夫長，也欲設立人給伊作園，收五穀，製造軍器及車裡的器具；

13

(THR) beh chhú lín ê cha-bó͘-kiáⁿ kā i chè-chō phang-iû, chòe chú-chia̍h-ê, chòe pek-piáⁿ-ê;

(BCL) 欲取恁的查某子給伊製造芳油，做煮食者做餅者；

14

(THR) lín ê chhân-hn̂g, phû-tô-hn̂g, kaⁿ-ná-hn̂g, hit ê siōng-hó-ê, i beh chhú i lâi hō͘ i ê lô͘-po̍k;

(BCL) 恁的田園、葡萄園、橄欖園彼個上好的，伊欲取伊來互伊的奴僕。

15

(THR) lín só͘ chèng-choh-ê, kap lín ê phû-tô-hn̂g, i beh chhú cha̍p-hūn-chı̍t, hō͘ i ê thài-kàm kap lô͘-po̍k.

(BCL) 恁所種作的及恁的葡萄園，伊欲取十份一互伊的太監及奴僕；

16

(THR) Koh beh chhú lín ê lô͘-po̍k, lú-pī, ióng-kiāⁿ ê siàu-liân lâng, kap lín ê lû, lâi chòe i ê chhe-ēng;

(BCL) 閣欲取恁的奴僕女婢，勇健的少年人及恁的驢，來做伊的差用。

17

(THR) lín ê iûⁿ-kûn, i beh chhú cha̍p-hūn ê chı̍t-hūn; lín iā beh chòe i ê lô͘-po̍k;

(BCL) 恁的羊群伊欲取十份的一份，恁也欲做伊的奴僕。

18

(THR) hit-sî lín beh in-ūi só͘ kéng ê ông lâi âu-kiò; chóng-sī Iâ-hô-hoa tī hit-sî m̄-thiaⁿ lín.

(BCL) 彼時恁欲因為所揀的王來喉叫，總是耶和華佇彼時呣聽恁。」

19

(THR) Chóng-sī peh-sìⁿ m̄-khéng thiaⁿ Sat-bó͘-jíⁿ ê ōe, kóng, M̄-ah, góan tek-khak beh chı̍t ê ông tī-lí góan;

(BCL) 總是百姓呣肯聽撒母耳的話，講：「呣啊！阮的確欲一個王治理阮，

20

(THR) hō͘ góan chhin-chhiūⁿ lia̍t-kok chı̍t-iūⁿ, góan ê ông phòaⁿ-tòan góan, chòe-thâu chhōa góan, thòe góan kau-chiàn.

(BCL) 互阮親像列國一樣，阮的王判斷阮，做頭導阮，替阮交戰。」

21

(THR) Sat-bó͘-jíⁿ í-keng thiaⁿ-kìⁿ peh-sìⁿ lóng-chóng ê ōe, chiū kóng hiah ê ōe hō͘ Iâ-hô-hoa thiaⁿ.

(BCL) 撒母耳已經聽見百姓攏總的話，就講許個話互耶和華聽。

22

(THR) Iâ-hô-hoa tùi Sat-bó͘-jíⁿ kóng, Lí tio̍h thiaⁿ in ê ōe, kā in siat-lı̍p chı̍t ê ông. Sat-bó͘-jíⁿ kā Í-sek-lia̍t lâng kóng, Lín ta̍k-ê tò-khì ka-kī ê siâⁿ.

(BCL) 耶和華對撒母耳講：「你著聽的話，給設立一個王。」撒母耳給以色列人講：「恁逐個倒去家己的城！」

Bible Color Mark

• 台語漢字羅馬本
• 巴克禮全羅