撒母耳記上 第 5 章

1

(THR) Hui-lī-sū lâng tòa Siōng-tè ê iok-kūi, tùi Í-piān-í-siā kng kàu A-sı̍t-tu̍t.

(BCL) 非利士人帶上帝的約櫃對以便以謝扛到亞實突。

2

(THR) Hui-lī-sū lâng chiong Siōng-tè ê kūi kng jı̍p Tāi-kún ê biō, hē tī Tāi-kún ê sin-piⁿ.

(BCL) 非利士人將上帝的櫃扛入大袞的廟，下佇大袞的身邊。

3

(THR) Keh chá-khí A-sı̍t-tu̍t ê lâng khí-lâi, khòaⁿ-kìⁿ Tāi-kún po̍ah-tó tī Iâ-hô-hoa ê kūi-chêng, bīn phak tī tōe-nih; chiū chiong Tāi-kún koh chhāi tī i ê gôan-ūi.

(BCL) 隔早起，亞實突的人起來，看見大袞跋倒佇耶和華的櫃前，面仆佇地裡，就將大袞閣祀佇伊的原位。

4

(THR) Koh keh-jı̍t thàu-chá khí-lâi, khòaⁿ-kìⁿ Tāi-kún po̍ah-tó tī Iâ-hô-hoa ê kūi-chêng, bīn phak tī tōe-nih; koh Tāi-kún ê thâu kap nn̄g-ki chhiú-chiúⁿ lóng chı̍h tī hō͘-tēng téng; chí-ū chhun Tāi-kún khu̍t-khu̍t ê sin-khu.

(BCL) 閣隔日透早起來，看見大袞跋倒佇耶和華的櫃前，面仆佇地裡，閣大袞的頭及二支手掌攏折佇戶椗頂，只有剩大袞啒啒的身軀。（

5

(THR) Ūi-tio̍h án-ni, Tāi-kún ê chè-si, kap it-chhè jı̍p A-sı̍t-tu̍t Tāi-kún ê biō ê lâng, lóng bô ta̍h Tāi-kún ê hō͘-tēng, tı̍t-kàu kin-á-jı̍t.

(BCL) 為著按呢，大袞的祭司及一切入亞實突、大袞的廟的人攏無踏大袞的戶椗，直到今仔日。）

6

(THR) Iâ-hô-hoa ê chhiú tāng-tāng phah A-sı̍t-tu̍t lâng, pāi-hōai in, hō͘ in hoat lia̍p-á-chèng; chiū-sī A-sı̍t-tu̍t kap i ê kéng-lāi lóng sī án-ni.

(BCL) 耶和華的手重重拍亞實突人，敗壞，互發仔症。就是亞實突及伊的境內攏是按呢。

7

(THR) A-sı̍t-tu̍t lâng khòaⁿ-kìⁿ án-ni, chiū kóng, Í-sek-lia̍t Siōng-tè ê kūi m̄-thang tiàm tī lán tiong-kan, in-ūi I ê chhiú tāng-tāng phah lán, kap lán ê siōng-tè Tāi-kún.

(BCL) 亞實突人看見按呢，就講：「以色列上帝的櫃呣通踮佇咱中間，因為伊的手重重拍咱及咱的上帝大袞」；

8

(THR) Chiū chhe lâng chhiáⁿ Hui-lī-sū hiah ê siú-léng lâi chū-chı̍p in hia, kóng, Í-sek-lia̍t Siōng-tè ê kūi lán tio̍h cháiⁿ-iūⁿ siat-hoat ah? In ìn kóng, Thang chiong Í-sek-lia̍t Siōng-tè ê kūi ūn khì Ka-te̍k; chiū chiong Í-sek-lia̍t Siōng-tè ê kūi ūn kàu hia.

(BCL) 就差人請非利士許個首領來聚集遐，講：「以色列上帝的櫃咱著怎樣設法啊？」應講：「通將以色列上帝的櫃運去迦特。」就將以色列上帝的櫃運到遐。

9

(THR) Ūn-kàu liáu-āu, Iâ-hô-hoa ê chhiú kong-kek hit ê siâⁿ, hō͘ hit ê siâⁿ ê lâng chin tōa-lōan; koh phah siâⁿ-lāi ê lâng bô-lūn tōa-sòe, in lóng hoat lia̍p-á-chèng.

(BCL) 運到了後，耶和華的手攻擊彼個城，互彼個城的人真大亂，閣拍城內的人無論大細，攏發仔症。

10

(THR) In chiū chiong Siōng-tè ê kūi sàng-kàu Í-kek-lûn. Siōng-tè ê kūi kàu Í-kek-lûn, Í-kek-lûn ê lâng chiū hoah kóng, In chiong Í-sek-lia̍t Siōng-tè ê kūi ūn-kàu lán chia, beh hāi-sí lán kap lán ê peh-sìⁿ.

(BCL) 就將上帝的櫃送到以革倫。上帝的櫃到以革倫，以革倫的人就喝講：「將以色列上帝的櫃運到咱遮，欲害死咱及咱的百姓！」

11

(THR) Chiū chhe lâng chū-chı̍p Hui-lī-sū lóng-chóng ê siú-léng, kóng Í-sek-lia̍t Siōng-tè ê iok-kūi tio̍h sàng i khì hō͘ i tò-khì pún só͘-chāi, bián-tit i hāi-sí lán kap lán ê peh-sìⁿ; hit-sî thong-siâⁿ ū tì-kàu sí ê jiáu-lōan; in-ūi Siōng-tè ê chhiú tī-hia phah in chin-tāng;

(BCL) 就差人聚集非利士攏總的首領，講：「以色列上帝的約櫃著送伊去互伊倒去本所在，免得伊害死咱及咱的百姓！」彼時通城有致到死的擾亂，因為上帝的手佇遐拍真重；

12

(THR) bô sí ê lâng lóng tú-tio̍h lia̍p-á-chèng; siâⁿ-tiong thî-khàu ê siaⁿ thàu kàu thiⁿ-nih.

(BCL) 無死的人攏抵著仔症。城中啼哭的聲，透到天裡。

Bible Color Mark

• 台語漢字羅馬本
• 巴克禮全羅