撒母耳記上 第 18 章

1

(THR) Tāi-pı̍t kap Sò-lô kóng bêng-pe̍k, Iok-ná-tan ê sìⁿ-miā kap Tāi-pı̍t ê sìⁿ-miā siⁿ saⁿ-liân; Iok-ná-tan thiàⁿ i chhin-chhiūⁿ ka-kī ê sìⁿ-miā.

(BCL) 大衛及掃羅講明白，約拿單的生命及大衛的生命生相連。約拿單疼伊，親像家己的生命。

2

(THR) Hit-jı̍t Sò-lô lâu i, bô hō͘ i tò-khì lāu-pē ê ke.

(BCL) 彼日掃羅留伊，無互伊倒去老父的家。

3

(THR) Iok-ná-tan kap Tāi-pı̍t nn̄g-lâng kiat-iok, in-ūi i thiàⁿ i chhin-chhiūⁿ ka-kī ê sìⁿ-miā.

(BCL) 約拿單及大衛二人結約，因為伊疼伊親像家己的生命。

4

(THR) Iok-ná-tan thǹg i sin-khu ê gōa-saⁿ, hō͘ Tāi-pı̍t; koh chiong i ê kun-ho̍k, liân i ê to, i ê keng, i ê io-tòa, iā hō͘ i.

(BCL) 約拿單褪伊身軀的外衫，互大衛，閣將伊的軍服，連伊的刀，伊的弓，伊的腰帶，也互伊。

5

(THR) Kìⁿ-nā Sò-lô chhe i khì toh-lo̍h, Tāi-pı̍t só͘ khì bô m̄ cheng-thong; Sò-lô chiū siat-lı̍p i chòe chiàn-sū ê thâu-lâng. Chèng peh-sìⁿ kap Sò-lô ê jîn-sîn lóng khòaⁿ-chòe hó.

(BCL) 見若掃羅差伊去叨落，大衛所去無呣精通。掃羅就設立伊做戰士的頭人，眾百姓及掃羅的人臣攏看做好。

6

(THR) Tāi-pı̍t phah-sí hit ê Hui-lī-sū lâng tò-tńg, in tò-lâi ê sî, hiah ê hū-lú tùi Í-sek-lia̍t ta̍k ê siâⁿ chhut-lâi, chhiùⁿ-koa, thiàu-bú, ēng lin-long-kó͘, ēng hoaⁿ-hí, ēng chok-ga̍k ê khì-kū, lâi ngiâ-chih Sò-lô ông.

(BCL) 大衛拍死彼個非利士人倒轉，倒來的時，許個婦女對以色列逐個城出來，唱歌跳舞，用鈴瓏鼓，用歡喜，用作樂的器具，來迎接掃羅王。

7

(THR) Hiah ê hū-lú thiàu-bú, ū-ê chhiùⁿ, ū-ê hō, kóng, Sò-lô thâi-sí in chheng-chheng, Tāi-pı̍t thâi-sí in bān-bān.

(BCL) 許個婦女跳舞有的唱有的和，講：「掃羅死千千，大衛死萬萬。」

8

(THR) Sò-lô put-chí siū-khì, bô hoaⁿ-hí chit ê ōe, chiū kóng, Chiong bān-bān hō͘ Tāi-pı̍t, chheng-chheng hō͘ góa, chí-ū chhun kok-ūi bē hō͘ i nā-tiāⁿ.

(BCL) 掃羅不止受氣，無歡喜此個話，就講：「將萬萬互大衛，千千互我，只有剩國位未互伊若定。」

9

(THR) Tùi hit-jı̍t khí, Sò-lô khòaⁿ-kìⁿ Tāi-pı̍t chiū gîn i.

(BCL) 對彼日起，掃羅看見大衛就眥伊。

10

(THR) Keh-jı̍t tùi Siōng-tè hia lâi ê pháiⁿ-sîn tōa-tōa lîm-kàu Sò-lô, i chiū tī chhù-lāi kóng sian-ti ōe. Tāi-pı̍t chiàu-siông ēng chhiú tôaⁿ-khîm, Sò-lô chhiú-nih ū chhiuⁿ.

(BCL) 隔日，對上帝遐來的歹神大大臨到掃羅，伊就佇厝內講先知話。大衛照常用手彈琴，掃羅手裡有槍。

11

(THR) Sò-lô ēng chhiuⁿ cho̍h-khì, in-ūi kóng, Góa beh chhì Tāi-pı̍t, tèng i tī piah-nih. Tāi-pı̍t tī i ê bīn-chêng siám-pī nn̄g-pái.

(BCL) 掃羅用槍擲去，因為講，我欲刺大衛，釘伊佇壁裡。大衛佇伊的面前閃避二擺。

12

(THR) Sò-lô kiaⁿ Tāi-pı̍t, in-ūi Iâ-hô-hoa kap i tī-teh, lī-khui Sò-lô.

(BCL) 掃羅驚大衛；因為耶和華及伊佇，離開掃羅。

13

(THR) Sò-lô chiah hō͘ Tāi-pı̍t lī-khui i, siat-lı̍p i chòe chhian-chóng; i tī peh-sìⁿ ê bīn-chêng chhut-jı̍p.

(BCL) 掃羅才互大衛離開伊，設立伊做千總，伊佇百姓的面前出入。

14

(THR) Tāi-pı̍t kìⁿ só͘ chòe ê tāi-chì bô m̄ cheng-thong, Iâ-hô-hoa kap i tī-teh.

(BCL) 大衛見所做的代誌無呣精通，耶和華及伊佇。

15

(THR) Sò-lô khòaⁿ-kìⁿ Tāi-pı̍t só͘ chòe ê tāi-chì chin cheng-thong, put-chí kiaⁿ i.

(BCL) 掃羅看見大衛所做的代誌真精通，不止驚伊。

16

(THR) To̍k-to̍k Í-sek-lia̍t kap Iû-tāi ê chèng lâng lóng thiàⁿ Tāi-pı̍t, in-ūi i tī in bīn-chêng chhut-jı̍p.

(BCL) 獨獨以色列及猶大的眾人攏疼大衛，因為伊佇面前出入。

17

(THR) Sò-lô kā Tāi-pı̍t kóng, Khòaⁿ ah, góa beh ēng tōa cha-bó͘-kiáⁿ Bí-la̍h hō͘ lí chòe-bó͘, to̍k-to̍k ài lí chòe góa ê ióng-sū, thòe Iâ-hô-hoa kau-chiàn. Sò-lô sim-lāi kóng, Góa m̄-thang chhin-chhiú hāi i, tio̍h chioh Hui-lī-sū lâng ê chhiú hāi i.

(BCL) 掃羅給大衛講：「看啊，我欲用大查某子米拉互你做某，獨獨愛你做我的勇士，替耶和華交戰。」掃羅心內講：「我呣通親手害伊，著借非利士人的手害伊。」

18

(THR) Tāi-pı̍t kā Sò-lô kóng, Góa sī chī-chūi, góa ū sím-mı̍h sin-hūn, góa lāu-pē ê ke tī Í-sek-lia̍t tiong sī sím-mı̍h hō ê ke, góa thang chòe ông ê kiáⁿ-sài mah?

(BCL) 大衛給掃羅講：「我是是誰，我有甚麼身份，我老父的家佇以色列中是甚麼號的家，我通做王的子婿嗎？」

19

(THR) Sò-lô ê cha-bó͘-kiáⁿ Bí-la̍h tiāⁿ-tio̍h hō͘ Tāi-pı̍t ê kî kàu lah, kéng-jiân hō͘ Bí-hô-la̍h lâng A-tek-lia̍t chòe-bó͘.

(BCL) 掃羅的查某子米拉定著互大衛的期到啦，竟然互米何拉人亞得列做某。

20

(THR) Sò-lô ê cha-bó͘-kiáⁿ Bí-kah thiàⁿ Tāi-pı̍t; ū lâng kā Sò-lô kóng; Sò-lô hoaⁿ-hí chit ê sū.

(BCL) 掃羅的查某子米甲疼大衛。有人給掃羅講，掃羅歡喜此個事。

21

(THR) Sò-lô sim-lāi kóng, Góa chiong chit ê cha-bó͘-kiáⁿ hō͘ Tāi-pı̍t chòe lô-bāng lâi bāng i; thang chioh Hui-lī-sū lâng ê chhiú hāi i. Sò-lô chiū kā Tāi-pı̍t kóng, Taⁿ chit ê tē-jī pái lí thang chòe góa ê kiáⁿ-sài.

(BCL) 掃羅心內講：「我將此個查某子互大衛，做羅網來網伊，通借非利士人的手害伊。」掃羅就給大衛講：「今此個第二擺你通做我的子婿。」

22

(THR) Sò-lô hoan-hù jîn-sîn kóng, Lín àm-chīⁿ kā Tāi-pı̍t kóng, Ông hoaⁿ-hí lí, jîn-sîn iā thiàⁿ lí; só͘-í lí thang chòe ông ê kiáⁿ-sài.

(BCL) 掃羅吩咐人臣講：「恁暗靜給大衛講：『王歡喜你，人臣也疼你，所以你通做王的子婿。』」

23

(THR) Sò-lô ê jîn-sîn chiū chiong chiah ê ōe kóng hō͘ Tāi-pı̍t thiaⁿ; Tāi-pı̍t kóng, Lín phah-sǹg chòe ông ê kiáⁿ-sài sī sió-khóa sū mah? góa sī sòng-hiong pi-bî ê lâng.

(BCL) 掃羅的人臣就將諸個話講互大衛聽。大衛講：「恁拍算做王的子婿是小可事嗎？我是喪鄉卑微的人。」

24

(THR) Sò-lô ê jîn-sîn hê-hok, kóng, Tāi-pı̍t só͘ kóng ê, án-ni, án-ni.

(BCL) 掃羅的人臣回覆講，大衛所講的按呢按呢。

25

(THR) Sò-lô kóng, Lín tio̍h tùi Tāi-pı̍t án-ni kóng, ông m̄-ài sím-mı̍h phèng-lé, chí-ū beh chı̍t-pah ê Hui-lī-sū lâng iông-bu̍t ê phê, thang pò-siû tī ông ê tùi-te̍k. Sò-lô ê ì-sù beh hō͘ Tāi-pı̍t sí tī Hui-lī-sū lâng ê chhiú.

(BCL) 掃羅講：「恁著對大衛按呢講：『王呣愛甚麼聘禮，只有欲一百個非利士人陽物的皮，通報仇佇王的對敵。』」掃羅的意思欲互大衛死佇非利士人的手。

26

(THR) I ê jîn-sîn chiong chiah ê ōe kā Tāi-pı̍t kóng; Tāi-pı̍t hoaⁿ-hí beh chòe ông ê kiáⁿ-sài.

(BCL) 伊的人臣將諸個話給大衛講，大衛歡喜欲做王的子婿。日期猶未到，

27

(THR) Jı̍t-kî iáu-bē kàu, Tāi-pı̍t khí-lâi kap tè i ê lâng, khí-sin khì, thâi-sí nn̄g-pah ê Hui-lī-sū lâng. Tāi-pı̍t tòa hiah ê iông-bu̍t ê phê, in chiū chiàu siàu-gia̍h it-chīn hiàn hō͘ ông, hō͘ i thang chòe ông ê kiáⁿ-sài. Tùi án-ni Sò-lô chiong cha-bó͘-kiáⁿ Bí-kah hō͘ i chòe-bó͘.

(BCL) 大衛起來及隨伊的人起身去，死二百個非利士人，大衛帶許個陽物的皮，就照數額一盡獻互王，互伊通做王的子婿。對按呢掃羅將查某子米甲互伊做某。

28

(THR) Sò-lô khòaⁿ-kìⁿ, koh chai Iâ-hô-hoa kap Tāi-pı̍t tī-teh; koh Sò-lô ê cha-bó͘-kiáⁿ Bí-kah iā thiàⁿ i.

(BCL) 掃羅看見閣知耶和華及大衛佇，閣掃羅的查某子米甲也疼伊，

29

(THR) Sò-lô it-hoat kiaⁿ Tāi-pı̍t; Sò-lô siông-siông chòe Tāi-pı̍t ê tùi-te̍k.

(BCL) 掃羅益發驚大衛，掃羅常常做大衛的對敵。

30

(THR) Hui-lī-sū hiah ê siú-léng chhut-lâi kau-chiàn; in ta̍k-pái chhut-lâi, Tāi-pı̍t só͘ kiâⁿ pí Sò-lô hiah ê jîn-sîn khah cheng-thong; tùi án-ni i ê miâ hō͘ lâng koh chun-tiōng.

(BCL) 非利士許個首領出來交戰，逐擺出來，大衛所行比掃羅許個人臣卡精通，對按呢伊的名互人閣尊重。

Bible Color Mark

• 台語漢字羅馬本
• 巴克禮全羅