撒母耳記上 第 11 章

1

(THR) A-bûn lâng Ná-hat chiūⁿ-kàu Ki-lia̍t ê Ngá-pí, chat-iâⁿ beh kong-kek i; Ngá-pí ê chèng-lâng kā Ná-hat kóng, Lí kap góan lı̍p-iok, góan chiū beh ho̍k-sāi lí.

(BCL) 亞捫人拿轄上到基列的雅比，紮營欲攻擊伊。雅比的眾人給拿轄講：「你及阮立約，阮就欲服事你。」

2

(THR) A-bûn lâng Ná-hat ìn kóng, Góa kap lín lı̍p-iok, tio̍h án-ni, chiū-sī iah lín chèng-lâng ê chiàⁿ-ba̍k, góa thang ēng chit-ê lâi lêng-jio̍k Í-sek-lia̍t lâng.

(BCL) 亞捫人拿轄應講：「我及恁立約，著按呢就是挖恁眾人的正目，我通用此個來凌辱以色列人。」

3

(THR) Ngá-pí ê tiúⁿ-ló kā i kóng, Kiû lí khoan-iông góan chhit-jı̍t, hō͘ góan chhe lâng khì Í-sek-lia̍t ê chôan-kéng; nā bô lâng kiù góan, góan chiū chhut-lâi chiū lí.

(BCL) 雅比的長老給伊講：「求你寬容阮七日，互阮差人去以色列的全境；若無人救阮，阮就出來就你。」

4

(THR) Só͘ chhe ê lâng kàu Sò-lô ê Ki-pí-a, chiong chiah ê ōe kóng hō͘ peh-sìⁿ thiaⁿ; peh-sìⁿ chiū lóng khui-siaⁿ háu.

(BCL) 所差的人到掃羅的基比亞，將諸個話講互百姓聽，百姓就攏開聲哮。

5

(THR) Sò-lô tú-tn̄g tùi chhân-nih kóaⁿ-gû tò-lâi; Sò-lô kóng, Peh-sìⁿ ūi siáⁿ-sū thî-khàu? In chiū chiong Ngá-pí lâng ê ōe kā i kóng.

(BCL) 掃羅抵當對田裡趕牛倒來，掃羅講：「百姓為啥事啼哭？」就將雅比人的話給伊講。

6

(THR) Sò-lô thiaⁿ-kìⁿ chiah ê ōe, Siōng-tè ê Sîn tōa-tōa kám-tōng i; i tōa siū-khì.

(BCL) 掃羅聽見諸個話，上帝的神大大感動伊，伊大受氣。

7

(THR) I chiū chiong chı̍t tùi gû chhiat chı̍t-tè chı̍t-tè, kau-tài sù-chiá sàng kàu Í-sek-lia̍t ê chôan-kéng, kóng, Kìⁿ-nā bô chhut-lâi kun-tè Sò-lô kap Sat-bó͘-jíⁿ ê, iā beh án-ni khóan-thāi i ê gû. Iâ-hô-hoa hō͘ peh-sìⁿ kiaⁿ, in chiū lóng chhut-lâi chhin-chhiūⁿ chı̍t-lâng.

(BCL) 伊就將一對牛切一塊一塊，交代使者送到以色列的全境，講：「見若無出來跟隨掃羅及撒母耳的，也欲按呢款待伊的牛。」耶和華互百姓驚，就攏出來，親像一人。

8

(THR) Tī Pí-sek tiám-sǹg hiah ê lâng; Í-sek-lia̍t lâng ū saⁿ-cha̍p-bān, Iû-tāi lâng ū saⁿ-bān.

(BCL) 佇比色點算許個人：以色列人有三十萬，猶大人有三萬。

9

(THR) In kā só͘ chhe ê lâng kóng, Lín tio̍h án-ni hê-hok Ki-lia̍t ê Ngá-pí lâng, kóng, Bîn-á-jı̍t chiong-kūn tiong-tàu ê sî, lín beh tit-tio̍h chín-kiù; só͘ chhe ê lâng tò-khì kā Ngá-pí lâng kóng, in chiū hoaⁿ-hí.

(BCL) 給所差的人講：「恁著按呢回覆基列的雅比人講，明仔日將近中晝的時，恁欲得著拯救。」所差的人倒去給雅比人講，就歡喜。

10

(THR) Ngá-pí lâng chiū kā A-bûn lâng kóng, Bîn-á-jı̍t góan beh chhut-lâi chiū lín, lín thang chhut-chāi ì-sù khóan-thāi góan.

(BCL) 雅比人就給亞捫人講：「明仔日阮欲出來就恁，恁通出在意思款待阮。」

11

(THR) Keh-jı̍t Sò-lô pun peh-sìⁿ chòe saⁿ-tūi, tī gō͘-kiⁿ-chá ê sî, jı̍p A-bûn lâng ê kun-iâⁿ, phah-sí in kàu jı̍t beh tàu; só͘ chhun ê lâng lóng cháu sì-sòaⁿ, bô nn̄g-lâng saⁿ-kap tòa chı̍t-ūi.

(BCL) 隔日，掃羅分百姓做三隊，佇五更早的時入亞捫人的軍營，拍死到日欲晝，所剩的人攏走四散，無二人相及住一位。

12

(THR) Peh-sìⁿ kā Sat-bó͘-jíⁿ kóng, Hit-ê kóng, Sò-lô kiám ōe kóan-hat lán-ê sī chī-chūi ah? Tio̍h lia̍h hiah ê lâng chhut-lâi, góan beh thâi-sí i.

(BCL) 百姓給撒母耳講：「彼個講『掃羅豈會管轄咱』的是是誰啊？著掠許個人出來，阮欲死伊。」

13

(THR) Sò-lô kóng, Kin-á-jı̍t chı̍t-lâng iā m̄-thang thâi-sí; in-ūi kin-á-jı̍t Iâ-hô-hoa chín-kiù Í-sek-lia̍t.

(BCL) 掃羅講：「今仔日一人也呣通死，因為今仔日耶和華拯救以色列。」

14

(THR) Sat-bó͘-jíⁿ kā peh-sìⁿ kóng, Lâi ah, lán lâi khì Kiat-kah, tī-hia têng-chài kiàn-lı̍p kok.

(BCL) 撒母耳給百姓講：「來啊，咱來去吉甲，佇遐重再建立國。」

15

(THR) Chèng peh-sìⁿ chiū khì Kiat-kah; tī Kiat-kah tng Iâ-hô-hoa ê bīn-chêng siat-lı̍p Sò-lô chòe-ông; in tī-hia hiàn siā-un-chè tī Iâ-hô-hoa ê bīn-chêng. Sò-lô kap Í-sek-lia̍t chèng-lâng tōa-tōa hoaⁿ-hí.

(BCL) 眾百姓就去吉甲，佇吉甲當耶和華的面前設立掃羅做王，佇遐獻謝恩祭佇耶和華的面前。掃羅及以色列眾人大大歡喜。

Bible Color Mark

• 台語漢字羅馬本
• 巴克禮全羅