撒母耳記上 第 1 章

1

(THR) Í-hoat-liân soaⁿ-tōe ê La̍h-má-so-hui, ū chı̍t ê Í-hoat-liân lâng miâ-kiò Í-lī-ka-ná, sī So͘-hut ê gôan-sun, Thok-hō͘ ê cheng-sun, Í-lī-hō͘ ê sun, Iâ-lô-hán ê kiáⁿ.

(BCL) 以法蓮山地的拉瑪瑣非有一個以法蓮人，名叫以利加拿，是蘇弗的元孫，託戶的曾孫，以利戶的孫，耶羅罕的子。

2

(THR) I ū nn̄g ê bó͘, chı̍t-ê miâ Hap-ná, chı̍t-ê miâ Pí-nî-ná; Pí-nî-ná ū kiáⁿ-jî, Hap-ná bô kiáⁿ-jî.

(BCL) 伊有二個某：一個名哈拿，一個名毗尼拿。毗尼拿有子兒，哈拿無子兒。

3

(THR) Chit-lâng ta̍k-nî tùi i ê pún-siâⁿ chiūⁿ-khì kàu Sī-lô, beh kèng-pài, iā beh chè-sū bān-kun ê Iâ-hô-hoa; Í-lī nn̄g ê kiáⁿ Hô-hut-nî Hui-nî-hap tī-hia chòe Iâ-hô-hoa ê chè-si.

(BCL) 此人逐年對伊的本城上去到示羅，欲敬拜也欲祭祀萬軍的耶和華；以利二個子何弗尼、非尼哈佇遐做耶和華的祭司。

4

(THR) Í-lī-ka-ná hiàn-chè ê jı̍t, pun chè-bah hō͘ i ê bó͘ Pí-nî-ná, kap i ê kiáⁿ cha-bó͘-kiáⁿ;

(BCL) 以利加拿獻祭的日，分祭肉互伊的某毗尼拿及伊的子查某子；

5

(THR) chóng-sī pun hō͘ Hap-ná ê sī siang-hūn, in-ūi i thiàⁿ Hap-ná; nā-sī Iâ-hô-hoa koaiⁿ-ba̍t i ê thai.

(BCL) 總是分互哈拿的是雙份，因為伊疼哈拿。若是耶和華關密伊的胎。

6

(THR) Kap i chòe tùi-thâu ê Pí-nî-ná tōa-tōa kek i, beh hō͘ i iu-būn; in-ūi Iâ-hô-hoa koaiⁿ-ba̍t i ê thai.

(BCL) 及伊做對頭的毗尼拿大大激伊，欲互伊憂悶，因為耶和華關密伊的胎。

7

(THR) I chiūⁿ kàu Iâ-hô-hoa ê chhù ê sî, Í-lī-ka-ná nî-nî án-ni kiâⁿ, Pí-nî-ná iû-gôan kek i; i chiū thî-khàu, sòa m̄-chia̍h.

(BCL) 伊上到耶和華的厝的時，以利加拿年年按呢行；毗尼拿猶原激伊，伊就啼哭續呣食。

8

(THR) I ê tiōng-hu Í-lī-ka-ná kā i kóng, Hap-ná ah, lí siáⁿ-sū thî-khàu? siáⁿ-sū m̄-chia̍h? siáⁿ-sū sim iu-būn ah? góa tùi-tī lí kiám bô pí cha̍p ê kiáⁿ khah-hó mah?

(BCL) 伊的丈夫以利加拿給伊講：「哈拿啊，你啥事啼哭，啥事呣食，啥事心憂悶啊？我對佇你豈無比十個子卡好嗎？」

9

(THR) In tī Sī-lô lim-chia̍h liáu-āu, Hap-ná chiū khí-lâi. Chè-si Í-lī tī Iâ-hô-hoa tiān ê mn̂g-khiā-piⁿ chē tī i ê ūi.

(BCL) 佇示羅飲食了後，哈拿就起來。祭司以利佇耶和華殿的門豎邊，坐佇伊的位。

10

(THR) Hap-ná ê sim-lāi iu-khó͘, kî-tó Iâ-hô-hoa lâi tōa thî-khàu;

(BCL) 哈拿的心內憂苦，祈禱耶和華，來大啼哭，

11

(THR) hē-gōan kóng, Bān-kun ê Iâ-hô-hoa ah, Lí nā kó-jiân sûi-lo̍h khòaⁿ-kò͘ Lí ê lú-pī ê kan-lân, koh siàu-liām góa, bô bōe-kì-tit Lí ê lú-pī, siúⁿ-sù Lí ê lú-pī siⁿ ta-po͘-kiáⁿ, góa beh hō͘ i kui tī Iâ-hô-hoa kàu chı̍t-sì-lâng, thì-thâu-to bô kàu i ê thâu-khak.

(BCL) 下願講：「萬軍的耶和華啊，你若果然垂落看顧你的女婢的艱難，閣數念我無記得你的女婢，賞賜你的女婢生查甫子，我欲互伊歸佇耶和華到一世人，剃頭刀無到伊的頭殼。」

12

(THR) Hap-ná tī Iâ-hô-hoa ê bīn-chêng tı̍t-tı̍t kî-tó ê sî, Í-lī chù-ba̍k khòaⁿ i ê chhùi.

(BCL) 哈拿佇耶和華的面前直直祈禱的時，以利注目看伊的嘴。（

13

(THR) Taⁿ Hap-ná sim-lāi chēng-chēng kiû, chí-ū chhùi-tûn tín-tāng, bô thiaⁿ-kìⁿ siaⁿ; só͘-í Í-lī lia̍h-chòe i sī chiú-chùi.

(BCL) 今哈拿心內靜靜求，只有嘴唇振動，無聽見聲，所以以利掠做伊是酒醉。）

14

(THR) Í-lī kā i kóng, Lí beh chùi kàu tī-sî ah? Lí m̄-thang koh lim chiú.

(BCL) 以利給伊講：「你欲醉到底時啊？你呣通閣飲酒。」

15

(THR) Hap-ná ìn kóng, Góa ê chú ah, m̄-sī án-ni; góa sī sim-lāi iu-khó͘ ê hū-jîn-lâng, po̍h-chiú kāu-chiú góa lóng bô lim; to̍k-to̍k tī Iâ-hô-hoa ê bīn-chêng thò͘-chhut sim-chêng;

(BCL) 哈拿應講：「我的主啊，呣是按呢。我是心內憂苦的婦仁人，薄酒厚酒我攏無飲，獨獨佇耶和華的面前吐出心情。

16

(THR) bo̍h-tit lia̍h lí ê lú-pī chòe pháiⁿ tek-hēng ê hū-lú, in-ūi góa kàu-taⁿ tùi góa ê tōa iu-būn siū kek-khì lâi kóng.

(BCL) 莫得掠你的女婢做歹德行的婦女。因為我到今對我的大憂悶，受激氣來講。」

17

(THR) Í-lī ìn i kóng, Lí thang pêng-an tò-khì; gōan Í-sek-lia̍t ê Siōng-tè ún-chún lí só͘ tùi I kiû ê.

(BCL) 以利應伊講：「你通平安倒去。願以色列的上帝允准你所對伊求的！」

18

(THR) Hap-ná kóng, Gōan lí ê lú-pī tit-tio̍h un tī lí ê bīn-chêng. Hū-jîn-lâng chiū tò-khì, lâi lim-chia̍h, chiū bô koh-chài tài-iu-iông.

(BCL) 哈拿講：「願你的女婢得著恩佇你的面前。」婦仁人就倒去來飲食，就無閣再帶憂容。

19

(THR) Keh-jı̍t in chá-chá khí-lâi, tī Iâ-hô-hoa ê bīn-chêng kèng-pài, chiū tò-khì La̍h-má, kàu i ê ke. Í-lī-ka-ná kap bó͘ Hap-ná tâng-pâng; Iâ-hô-hoa siàu-liām Hap-ná.

(BCL) 隔日，早早起來，佇耶和華的面前敬拜，就倒去拉瑪。到伊的家，以利加拿及某哈拿同房，耶和華數念哈拿，

20

(THR) Hap-ná chiū hôai-īn; kàu-sî chiū siⁿ chı̍t ê kiáⁿ, kā i hō-miâ kiò Sat-bó͘-jíⁿ, kóng, Che sī góa tùi Iâ-hô-hoa kiû-ê.

(BCL) 哈拿就懷孕。到時，就生一個子，給伊號名叫撒母耳，講：「這是我對耶和華求的。」

21

(THR) Hit-lâng Í-lī-ka-ná kap i ê thong-ke lóng chiūⁿ-khì, beh ēng ta̍k-nî ê chè-sū kap i só͘ hē ê gōan hiàn-hō͘ Iâ-hô-hoa.

(BCL) 彼人以利加拿及伊的通家攏上去，欲用逐年的祭祀，及伊所下的願獻互耶和華。

22

(THR) Chóng-sī Hap-ná bô chiūⁿ-khì; kā i ê tiōng-hu kóng, Thèng-hāu gín-ná tn̄g-lin, góa chiū tòa i chiūⁿ-khì, hō͘ i tiâu-kìⁿ Iâ-hô-hoa, éng-óan tiàm tī-hia.

(BCL) 總是哈拿無上去，給伊的丈夫講：「聽候囝仔斷奶，我就帶伊上去互伊朝見耶和華，永遠踮佇遐。」

23

(THR) I ê tiōng-hu Í-lī-ka-ná kā i kóng, Chiàu lí só͘ khòaⁿ-chòe hó-ê lâi kiâⁿ, thang thèng-hāu gín-ná tn̄g-lin; chóng-sī gōan Iâ-hô-hoa èng-giām I ê ōe. Tùi án-ni hū-jîn-lâng tī ke-lāi io kiáⁿ, kàu tn̄g-lin.

(BCL) 伊的丈夫以利加拿給伊講：「照你所看做好的來行！通聽候囝仔斷奶。總是願耶和華應驗伊的話。」對按呢婦仁人佇家內育子，到斷奶；

24

(THR) Í-keng kā i tn̄g-lin, chiū chhōa i saⁿ-kap chiūⁿ Sī-lô, kàu Iâ-hô-hoa ê chhù; koh tòa saⁿ chiah gû-káng, chı̍t i-hoat iù ê mī-hún, chı̍t phê-tē chiú; hit-sî gín-ná iáu sòe-hàn.

(BCL) 已經給伊斷奶，就導伊相及上示羅，到耶和華的厝；閣帶三隻牛，一伊法幼的麵粉，一皮袋酒。（彼時，囝仔猶細漢。）

25

(THR) In thâi chı̍t chiah gû-káng, chiū chhōa gín-ná kàu Í-lī ê bīn-chêng.

(BCL) 一隻牛，就導囝仔到以利的面前。

26

(THR) Hū-jîn-lâng kóng, Góa ê chú ah, góa kí lí ê o̍ah-miā lâi chiù-chōa, góa ê chú ah, chêng khiā tī lí chia, kî-kiû Iâ-hô-hoa ê, hit ê hū-jîn-lâng chiū-sī góa.

(BCL) 婦仁人講：「我的主啊，我指你的活命來咒誓，我的主啊，前徛佇你遮祈求耶和華的彼個婦仁人，就是我。

27

(THR) Góa kiû ài tit-tio̍h chit ê gín-ná; Iâ-hô-hoa í-keng siúⁿ-sù góa só͘ tùi I kiû ê;

(BCL) 我求愛得著此個囝仔；耶和華已經賞賜我所對伊求的。

28

(THR) só͘-í góa ēng chit ê gín-ná hêng Iâ-hô-hoa, i chı̍t-sì-lâng hêng Iâ-hô-hoa. Chiū tī-hia kèng-pài Iâ-hô-hoa.

(BCL) 所以，我用此個囝仔還耶和華，伊一世人還耶和華。」就佇遐敬拜耶和華。

Bible Color Mark

• 台語漢字羅馬本
• 巴克禮全羅