列王紀上 第 21 章

1

(THR) Chiah ê tāi-chì liáu-āu, Iâ-su-lia̍t lâng Ná-po̍k ū phû-tô-hn̂g tī Iâ-su-lia̍t, kūn Sat-má-lī-a ông A-hap ê kiong.

(BCL) 諸個代誌了後，耶斯列人拿伯有葡萄園佇耶斯列，近撒瑪利亞王亞哈的宮。

2

(THR) A-hap kā Ná-po̍k kóng, Lí ēng lí ê phû-tô-hn̂g hō͘ góa, góa thang chòe chhài-hn̂g; in-ūi sī kūn tī góa ê kiong; góa beh ēng koh khah-hó ê hn̂g kā lí ōaⁿ; á-sī lí ài gûn, góa chiū chiàu kè-chîⁿ hō͘ lí.

(BCL) 亞哈給拿伯講：「你用你的葡萄園互我，我通做菜園，因為是近佇我的宮；我欲用閣卡好的園給你換，抑是你愛銀，我就照價錢互你。」

3

(THR) Ná-po̍k kā A-hap kóng, Ēng góa ê chó͘ só͘ lâu ê gia̍p hō͘ lí, chit ê tāi-chì gōan Iâ-hô-hoa kìm-chí góa.

(BCL) 拿伯給亞哈講：「用我的祖所留的業互你，此個代誌願耶和華禁止我。」

4

(THR) A-hap in-ūi Iâ-su-lia̍t lâng Ná-po̍k só͘ kóng ê ōe, chiū ut-chut bô hoaⁿ-hí; tò--khì i ê chhù; in-ūi Ná-po̍k bat kóng, Góa m̄ ēng góa ê chó͘-gia̍p hō͘ lí, A-hap chiū tó tī bîn-chhn̂g, bīn ǹg lāi-bīn, iā m̄ chia̍h.

(BCL) 亞哈因為耶斯列人拿伯所講的話，就鬱悴無歡喜倒去伊的厝，因為拿伯曾講「我呣用我的祖業互你」，亞哈就倒佇眠床，面向內面，也呣食。

5

(THR) Ông-hō͘ Iâ-sé-piat kàu i hia, mn̄g i kóng, Lí ê sim-lāi iu-būn sòa m̄-chia̍h, sī siáⁿ iân-kò͘ ah?

(BCL) 王后耶洗別到伊遐問伊講：「你的心內憂悶續呣食，是啥緣故啊？」

6

(THR) I kā i kóng, In-ūi góa tùi Iâ-su-lia̍t lâng Ná-po̍k kóng, Lí ēng lí ê phû-tô-hn̂g hō͘ góa, góa ēng gûn hō͘ lí; á-sī lí nā ài, góa chiū ēng phû-tô-hn̂g ōaⁿ lí. I kóng, Góa ê phû-tô-hn̂g, góa m̄ hō͘ lí.

(BCL) 伊給伊講：「因為我對耶斯列人拿伯講：『你用你的葡萄園互我，我用銀互你，抑是你若愛，我就用葡萄園換你』；伊講：『我的葡萄園我呣互你。』」

7

(THR) Ông-hō͘ Iâ-sé-piat kā i kóng, Lí chit-chūn sī teh kóan-lí Í-sek-lia̍t kok á-m̄-sī? chòe lí khí-lâi chia̍h, hō͘ lí ê sim hoaⁿ-hí; góa beh ēng Iâ-su-lia̍t lâng Ná-po̍k ê phû-tô-hn̂g hō͘ lí.

(BCL) 王后耶洗別給伊講：「你此陣是管理以色列國抑呣是？做你起來食，互你的心歡喜，我欲用耶斯列人拿伯的葡萄園互你。」

8

(THR) Chiū ēng A-hap ê miâ siá-phoe, ēng ông ê ìn tǹg--i; kià hiah ê phoe hō͘ Ná-po̍k ê siâⁿ, hō͘ kap i khiā-khí ê tiúⁿ-ló kùi-cho̍k.

(BCL) 就用亞哈的名寫批，用王的印頓伊，寄許個批互拿伯的城互及伊徛起的長老貴族。

9

(THR) Siá tī phoe--nih kóng, Lín tio̍h soan-pò͘ kìm-chia̍h, hō͘ Ná-po̍k chē tī peh-sìⁿ-kan ê kôaiⁿ-ūi;

(BCL) 寫佇批裡講：「恁著宣佈禁食，互拿伯坐佇百姓間的高位；

10

(THR) koh siat nn̄g ê húi-lūi tī i ê bīn-chêng, chòe kan-chèng kò i kóng, Lí pòng-to̍k Siōng-tè kap ông; jiân-āu chiū thoa i chhut-khì, ēng chio̍h-thâu tìm-sí i.

(BCL) 閣設二個匪類佇伊的面前，做干證告伊講：『你謗瀆上帝及王』；然後就拖伊出去用石頭擲死伊。」

11

(THR) I siâⁿ-lāi ê lâng, chiū-sī khiā-khí hit ê siâⁿ ê tiúⁿ-ló, kap kùi-cho̍k, chiū chiàu Iâ-sé-piat só͘ kià ê ōe, chiū-sī chiàu i kià hō͘ in ê phoe só͘-siá-ê, lâi kiâⁿ.

(BCL) 伊城內的人，就是徛起彼個城的長老及貴族，就照耶洗別所寄的話，就是照伊寄互的批，所寫的來行，

12

(THR) Soan-pò͘ kìm-chia̍h, hō͘ Ná-po̍k chē tī peh-sìⁿ-kan ê kôaiⁿ-ūi.

(BCL) 宣佈禁食，互拿伯坐佇百姓間的高位。

13

(THR) Hit nn̄g ê húi-lūi jı̍p-khì, chē tī i ê bīn-chêng; húi-lūi tng peh-sìⁿ ê bīn-chêng chòe kan-chèng kò Ná-po̍k kóng, Ná-po̍k pòng-to̍k Siōng-tè kap ông; chiū thoa i chhut siâⁿ-gōa, ēng chio̍h-thâu tìm-sí i.

(BCL) 彼二個匪類入去，坐佇伊的面前，匪類當百姓的面前做干證告拿伯講：「拿伯謗瀆上帝及王！」就拖伊出城外，用石頭擲死伊。

14

(THR) Chiū chhe lâng khì kā Iâ-sé-piat kóng, Ná-po̍k í-keng hō͘ chio̍h-thâu tìm-sí lah.

(BCL) 就差人去給耶洗別，講：「拿伯已經互石頭擲死啦。」

15

(THR) Iâ-sé-piat thiaⁿ-kìⁿ Ná-po̍k hō͘ chio̍h-thâu tìm-sí, Iâ-sé-piat chiū kā A-hap kóng, Lí khí-lâi chiáng Iâ-su-lia̍t lâng Ná-po̍k m̄-khéng ūi-tio̍h kè-chîⁿ hō͘ lí ê phû-tô-hn̂g, in-ūi Ná-po̍k í-keng sí, bô-miā lah.

(BCL) 耶洗別聽見拿伯互石頭擲死，耶洗別就給亞哈講：「你起來掌耶斯列人拿伯呣肯為著價錢互你的葡萄園！因為拿伯已經死，無命啦！」

16

(THR) A-hap thiaⁿ-kìⁿ Ná-po̍k í-keng sí, A-hap chiū khí-lâi, lo̍h-khì Iâ-su-lia̍t lâng Ná-po̍k ê phû-tô-hn̂g hia, beh chiáng i.

(BCL) 亞哈聽見拿伯已經死，亞哈就起來，落去耶斯列人拿伯的葡萄園遐欲掌伊。

17

(THR) Iâ-hô-hoa ê ōe lîm-kàu Thê-su-pí lâng Í-lī-a, kóng,

(BCL) 耶和華的話臨到提斯比人以利亞講：

18

(THR) Lí khí-lâi, khì kìⁿ tiàm tī Sat-má-lī-a ê Í-sek-lia̍t ông A-hap; i lo̍h-khì Ná-po̍k ê phû-tô-hn̂g beh chiáng i; chit-chūn i tī-hia.

(BCL) 「你起來，去見踮佇撒瑪利亞的以色列王亞哈，伊落去拿伯的葡萄園欲掌伊，此陣伊佇遐。

19

(THR) Lí tio̍h kā i kóng, Iâ-hô-hoa án-ni kóng, Lí ū thâi-sí lâng koh chiáng i ê gia̍p mah? Koh tio̍h kā i kóng, Iâ-hô-hoa án-ni kóng, Káu tī sím-mı̍h só͘-chāi chī Ná-po̍k ê huih, káu iā beh tī-hia chī lí ê huih, chiū-sī lí pún-sin ê huih.

(BCL) 你著給伊講：『耶和華按呢講：你有死人閣掌伊的業嗎？』閣著給伊講：『耶和華按呢講：狗佇甚麼所在舐拿伯的血，狗也欲佇遐舐你的血，就是你本身的血。』」

20

(THR) A-hap kā Í-lī-a kóng, Góa ê tùi-te̍k ah, lí chhē-tio̍h góa mah? I ìn kóng, Góa chhē-tio̍h lí, in-ūi lí bōe ka-kī, kiâⁿ Iâ-hô-hoa khòaⁿ-chòe pháiⁿ ê sū.

(BCL) 亞哈給以利亞講：「我的對敵啊，你尋著我嗎？」伊應講：「我尋著你；因為你賣家己，行耶和華看做歹的事。

21

(THR) Iâ-hô-hoa kóng, Góa beh kàng chai-ē hō͘ lí, beh it-chīn tû lí; kìⁿ sio̍k A-hap ê ta-po͘-teng, bô-lūn siū khu-sok--ê, á-sī chū-iû--ê, lóng tī Í-sek-lia̍t tiong chián-tû i.

(BCL) 耶和華講：『我欲降災禍互你，欲一盡除你。見屬亞哈的查甫丁，無論受拘束者、抑是自由者，攏佇以色列中剪除伊。

22

(THR) Góa beh hō͘ lí ê ke chhin-chhiūⁿ Nî-pat ê kiáⁿ Iâ-lô-phò-àm ê ke, koh chhin-chhiūⁿ A-hi-ngá ê kiáⁿ Pa-sa ê ke, in-ūi lí só͘ kan-hōan kek-tōng Góa siū-khì ê sū, koh hō͘ Í-sek-lia̍t hōan-chōe.

(BCL) 我欲互你的家親像尼八的子耶羅波安的家，閣親像亞希雅的子巴沙的家；因為你所干犯激動我受氣的事，閣互以色列犯罪。』

23

(THR) Lūn Iâ-sé-piat Iâ-hô-hoa iā ū kóng, Kàu beh chia̍h Iâ-sé-piat tī Iâ-su-lia̍t ê gōa-siâⁿ.

(BCL) 論耶洗別，耶和華也有講：『狗欲食耶洗別佇耶斯列的外城。

24

(THR) Sio̍k A-hap ê lâng, sí tī siâⁿ--lāi ê, káu beh chia̍h--i, sí tī chhân-iá ê, khong-tiong ê chiáu beh chia̍h--i.

(BCL) 屬亞哈的人，死佇城內的，狗欲食伊，死佇田野的，空中的鳥欲食伊。』」（

25

(THR) (Chóng-sī bô lâng chhin-chhiūⁿ A-hap, in-ūi i ka-kī bōe, kiâⁿ Iâ-hô-hoa khòaⁿ-chòe pháiⁿ ê sū; sī tùi i ê ông-hō͘ Iâ-sé-piat kiáu-sō i.

(BCL) 總是無人親像亞哈，因為伊家己賣，行耶和華看做歹的事，是對伊的王后耶洗別教唆伊；

26

(THR) I kiâⁿ tōa khó-ò͘ⁿ ê sū, in-ūi i tè hiah ê ngó͘-siōng, lóng chhin-chhiūⁿ A-mô͘-lī lâng chı̍t-iūⁿ, chiū-sī Iâ-hô-hoa só͘ kóaⁿ-chhut tī Í-sek-lia̍t lâng ê bīn-chêng--ê.)

(BCL) 伊行大可惡的事，因為伊隨許個偶像，攏親像亞摩利人一樣，就是耶和華所趕出佇以色列人的面前者。）

27

(THR) A-hap thiaⁿ-kìⁿ chiah ê ōe, chiū thiah-lı̍h saⁿ, sin-khu chhēng chho͘ môa-pò͘, kìm-chia̍h, khùn iā tó tī chho͘-môa-pò͘, koh ûn-ûn-á kiâⁿ.

(BCL) 亞哈聽見諸個話，就拆裂衫，身軀穿粗麻布，禁食，睏也倒佇粗麻布，閣緩緩仔行。

28

(THR) Iâ-hô-hoa ê ōe lîm-kàu Thê-su-pí lâng Í-lī-a kóng,

(BCL) 耶和華的話臨到提斯比人以利亞講：

29

(THR) A-hap cháiⁿ-iūⁿ ka-kī khiam-pi tī góa ê bīn-chêng, lí ū khòaⁿ-kìⁿ mah? in-ūi i ka-kī khiam-pi tī Góa ê bīn-chêng, só͘-í Góa bô beh tī i o̍ah-teh ê jı̍t kàng chit ê chai-ē; sī tī i ê kiáⁿ ê jı̍t, kàng chit ê chai-ē tī i ê ke.

(BCL) 「亞哈怎樣家己謙卑佇我的面前，你有看見嗎？因為伊家己謙卑佇我的面前，所以我無欲佇伊活的日，降此個災禍；是佇伊的子的日，降此個災禍佇伊的家。」

Bible Color Mark

• 台語漢字羅馬本
• 巴克禮全羅