列王紀上 第 20 章

1

(THR) A-lân ông Piān-hap-ta̍t chū-chı̍p i ê chôan-kun, ū saⁿ-cha̍p-jī ê ông kap i khì, ū bé, ū chhia, chiūⁿ-khì ûi Sat-má-lī-a, lâi kong i.

(BCL) 亞蘭王便哈達聚集伊的全軍，有三十二個王及伊去，有馬有車上去圍撒瑪利亞來攻伊；

2

(THR) Koh chhe sù-chiá jı̍p siâⁿ kìⁿ Í-sek-lia̍t ông A-hap, kā i kóng, Piān-hap-ta̍t án-ni kóng,

(BCL) 閣差使者入城見以色列王亞哈，給伊講：「便哈達按呢講：

3

(THR) Lí ê gûn, lí ê kim, lóng sī góa-ê, lí hiah ê bó͘, lí hiah ê kiáⁿ-jî, tē-it súi ê, iā-sī góa-ê.

(BCL) 你的銀你的金攏是我的，你許個某你許個子兒第一娞的也是我的。」

4

(THR) Í-sek-lia̍t ông ìn kóng, Góa ê chú, góa ê ông ah, chiàu lí ê ōe, góa kap góa só͘-ū-ê lóng sī lí-ê.

(BCL) 以色列王應講：「我的主我的王啊，照你的話，我及我所有的攏是你的。」

5

(THR) Sù-chiá koh lâi kóng, Piān-hap-ta̍t án-ni kóng, Góa khiok ū chhe lâng khì kìⁿ lí, ài lí chiong lí ê gûn, kim, bó͘, kiáⁿ-jî, lóng kau hō͘ góa.

(BCL) 使者閣來講：「便哈達按呢講：我卻有差人去見你，愛你將你的銀、金、某、子兒攏交互我。

6

(THR) Chóng-sī bîn-á-jı̍t iok-lio̍k chit-sî góa beh chhe góa ê sù-chiá kàu lí hia, chhiau-chhē lí ê chhù, kap lí ê lô͘-po̍k ê chhù, kìⁿ-nā lí só͘ khòaⁿ-chòe hó--ê, in beh chhin-chhiú tòa--khì.

(BCL) 總是明仔日約略此時，我欲差我的使者到你遐，搜尋你的厝及你的奴僕的厝，見若你所看做好的，欲親手帶去。」

7

(THR) Í-sek-lia̍t ông tiàu kok-lāi ê tiúⁿ-ló lóng lâi, kā in kóng, Lín khòaⁿ, chit ê lâng tiâu-tî chhē-phāng beh hāi góa; i bat chhe lâng lâi góa chia, beh góa ê bó͘, kiáⁿ-jî, kap kim gûn, góa bô the-sî--i.

(BCL) 以色列王召國內的長老攏來，給講：「恁看，此個人刁持尋縫欲害我，伊曾差人來我遮，欲我的某、子兒、及金銀，我無推辭伊。」

8

(THR) Tiúⁿ-ló kap chèng peh-sìⁿ lóng kā ông kóng, M̄-thang thiaⁿ i, iā m̄-thang ún i.

(BCL) 長老及眾百姓攏給王講：「呣通聽伊，也呣通允伊。」

9

(THR) Só͘-í ông kā Piān-hap-ta̍t ê sù-chiá kóng, Lín kā góa ê chú góa ê ông kóng, Lí tāi-seng chhe lâng tùi lí ê lô͘-po̍k só͘-thó--ê góa ū ún; chóng-sī chit-ê góa bōe kiâⁿ--tit. Sù-chiá chiū tò-khì hê-hok.

(BCL) 所以，王給便哈達的使者講：「恁給我的主我的王講：你代先差人對你的奴僕所討的，我有允；總是此個，我行得。」使者就倒去回覆。

10

(THR) Piān-hap-ta̍t koh chhe lâng kóng, Sat-má-lī-a ê thô͘-hún, nā ū kàu-gia̍h hō͘ tè góa ê lâng ta̍k-lâng mi chı̍t-pé, chiū gōan hiah ê siōng-tè ka-pē chek-ho̍at góa.

(BCL) 便哈達閣差人講：「撒瑪利亞的土粉若有夠額互隨我的人逐人搣一把，就願許個上帝加倍責罰我！」

11

(THR) Í-sek-lia̍t ông ìn kóng, Lín kā i kóng, Chhēng khoe-kah--ê, m̄-thang chhin-chhiūⁿ thǹg khoe-kah--ê lâi khoa-kháu.

(BCL) 以色列王應講：「恁給伊講，穿盔甲者，呣通親像褪盔甲者來誇口。」

12

(THR) Piān-hap-ta̍t kap hiah ê ông tī pò͘-pîⁿ-lāi lim-chiú, thiaⁿ-kìⁿ chiah ê ōe, chiū kā i ê jîn-sîn kóng, Thang pâi-tīn; in chiū pâi-tīn kong-siâⁿ.

(BCL) 便哈達及許個王佇布棚內飲酒，聽見諸個話，就給伊的人臣講：「通排陣！」就排陣攻城。

13

(THR) Ū chı̍t ê sian-ti lâi kìⁿ Í-sek-lia̍t ông A-hap kóng, Iâ-hô-hoa án-ni kóng, Lí ū khòaⁿ-kìⁿ chit tōa tīn ê lâng bô? Khòaⁿ ah, kin-á-jı̍t Góa beh chiong in kau tī lí ê chhiú, lí chiū chai Góa sī Iâ-hô-hoa.

(BCL) 有一個先知來見以色列王亞哈，講：「耶和華按呢講：『你有看見此大陣的人無？看啊，今仔日我欲將交佇你的手，你就知我是耶和華。』」

14

(THR) A-hap kóng, Beh ēng chī-chūi ah? I ìn kóng, Iâ-hô-hoa án-ni kóng, Ēng chiah ê séng-tiúⁿ ê siàu-liân lâng. A-hap kóng, Sím-mı̍h lâng beh pâi-tīn ah? I ìn kóng, Chiū-sī lí.

(BCL) 亞哈講：「欲用是誰啊？」伊應講：「耶和華按呢講，用諸個省長的少年人。」亞哈講：「甚麼人欲排陣啊。？」伊應講：「就是你。」

15

(THR) I chiū sǹg hiah ê séng-tiúⁿ ê siàu-liân lâng, kiōng ū nn̄g-pah saⁿ-cha̍p-jī miâ; āu-lâi i koh sǹg chèng peh-sìⁿ, chiū-sī Í-sek-lia̍t lâng, kiōng chhit-chheng miâ.

(BCL) 伊就算許個省長的少年人，共有二百三十二名，後來伊閣算眾百姓就是以色列人，共七千名。

16

(THR) Jı̍t-tiong-tàu ê sî, in chiū chhut-khì. Piān-hap-ta̍t kap hiah ê ông, chiū-sī pang-chān i ê saⁿ-cha̍p-jī ê ông, tī pò͘-pîⁿ-lāi chia̍h chiú-chùi.

(BCL) 日中晝的時，就出去；便哈達及許個王就是幫助伊的三十二個王佇布棚內食酒醉。

17

(THR) Hiah ê séng-tiúⁿ ê siàu-liân lâng chòe-thâu chhut-khì. Piān-hap-ta̍t chhe lâng khì thàm-bāi, in hê-hok kóng, Ū lâng tùi Sat-má-lī-a chhut-lâi.

(BCL) 許個省長的少年人做頭出去；便哈達差人去探覓，回覆講：「有人對撒瑪利亞出來。」

18

(THR) I kóng, In nā ūi-tio̍h káng-hô chhut-lâi, tio̍h o̍ah-o̍ah lia̍h in; nā ūi-tio̍h kau-chiàn chhut-lâi, iā tio̍h o̍ah-o̍ah lia̍h in.

(BCL) 伊講：「若為著講和出來，著活活掠；若為著交戰出來，也著活活掠。」

19

(THR) Hiah ê séng-tiúⁿ ê siàu-liân lâng chhut siâⁿ, kun-peng tè in; ta̍k-lâng thâi i ê tùi-te̍k.

(BCL) 許個省長的少年人出城，軍兵隨；

20

(THR) A-lân lâng tô-cháu, Í-sek-lia̍t lâng jip in. A-lân ông Piān-hap-ta̍t khiâ-bé, kap hiah ê bé-peng tô-thoat.

(BCL) 逐人伊的對敵。亞蘭人逃走，以色列人；亞蘭王便哈達騎馬及許個馬兵逃脫。

21

(THR) Í-sek-lia̍t ông chhut-siâⁿ, phah hiah ê chhia, kap bé, tōa-tōa thâi-sí A-lân lâng.

(BCL) 以色列王出城，拍許個車及馬，大大死亞蘭人。

22

(THR) Hit ê sian-ti lâi kìⁿ Í-sek-lia̍t ông, kā i kóng, Lí tio̍h ka-kī kiông-chòng, kín-sīn tio̍h cháiⁿ-iūⁿ chòe; in-ūi mê-nî chit-sî, A-lân ông beh chiūⁿ-lâi kong-kek lí.

(BCL) 彼個先知來見以色列王，給伊講：「你著家己強壯，謹慎著怎樣做；因為明年此時，亞蘭王欲上來攻擊你。」

23

(THR) A-lân ông ê jîn-sîn kā i kóng, Í-sek-lia̍t lâng ê Siōng-tè sī soaⁿ-thâu ê Siōng-tè, só͘-í in khah-iâⁿ lán; chóng-sī lán nā tī pîⁿ-iûⁿ kap in kau-chiàn, chiū ōe khah-iâⁿ in.

(BCL) 亞蘭王的人臣給伊講：「以色列人的上帝是山頭的上帝，所以卡贏咱；總是咱若佇平洋及交戰，就會卡贏。

24

(THR) Tio̍h án-ni kiâⁿ; hiah ê ông ta̍k-ê tio̍h bián-chit, lı̍p kun-tiúⁿ lâi thòe in.

(BCL) 著按呢行：許個王逐個著免職，立軍長來替，

25

(THR) Koh chio-bō͘ chı̍t tūi kun-peng chiàu lí só͘ sit-lo̍h ê kun-peng, ēng bé pó͘ bé, ēng chhia pó͘ chhia; lán tī pîⁿ-iûⁿ kap in kau-chiàn, ún-tàng ōe iâⁿ. Ông chiū thiaⁿ in ê ōe khì kiâⁿ.

(BCL) 閣招募一隊軍兵，照你所失落的軍兵，用馬補馬，用車補車，咱佇平洋及交戰，穩當會贏。」王就聽的話去行。

26

(THR) Keh-nî Piān-hap-ta̍t tiám-sǹg A-lân lâng, chiūⁿ-khì A-hut, beh kap Í-sek-lia̍t lâng kau-chiàn.

(BCL) 隔年，便哈達點算亞蘭人上去亞弗，欲及以色列人交戰。

27

(THR) Í-sek-lia̍t lâng iā tiám-sǹg in ê siàu-gia̍h, pī-pān kun-niû, chhut-khì tí-te̍k i, chat-iâⁿ tī in ê tùi-bīn, chhin-chhiūⁿ nn̄g sió-kûn ê soaⁿ-iûⁿ á; chóng-sī A-lân lâng móa tōe-bīn.

(BCL) 以色列人也點算的數額，備辦軍糧，出去抵敵伊，紮營佇的對面，親像二小群的山羊仔；總是亞蘭人滿地面。

28

(THR) Ū Siōng-tè ê lô͘-po̍k lâi kìⁿ Í-sek-lia̍t ông kóng, Iâ-hô-hoa án-ni kóng, In-ūi A-lân lâng kóng, Iâ-hô-hoa sī soaⁿ-thâu ê Siōng-tè, m̄-sī soaⁿ-kok ê Siōng-tè, só͘-í Góa beh chiong chit tōa-tīn ê lâng lóng kau tī lí ê chhiú; lín chiū chai Góa sī Iâ-hô-hoa.

(BCL) 有上帝的奴僕來見以色列王，講：「耶和華按呢講：『因為亞蘭人講──耶和華是山頭的上帝，呣是山谷的上帝，所以我欲將此大陣的人攏交佇你的手，恁就知我是耶和華。』」

29

(THR) Chiū chat-iâⁿ tāi-ke saⁿ tùi-bīn chhit-jı̍t; kàu tē-chhit jı̍t siang-pêng kun-peng kau-chiàn; tī chit-jı̍t Í-sek-lia̍t lâng thâi-sí A-lân lâng pō͘-peng cha̍p-bān.

(BCL) 就紮營大家相對面七日，到第七日雙旁軍兵交戰；佇此日以色列人死亞蘭人步兵十萬，

30

(THR) Kî-û-ê cháu jı̍p A-hut siâⁿ, hit ê siâⁿ-chhiûⁿ tó, teh-sí só͘-chhun ê nn̄g-bān chhit-chheng lâng. Piān-hap-ta̍t cháu jı̍p siâⁿ, bih tī lāi-pâng.

(BCL) 其餘的走入亞弗城；彼個城牆倒，壓死所剩的二萬七千人。便哈達走入城，匿佇內房。

31

(THR) I ê jîn-sîn kā i kóng, Khòaⁿ ah, góan thiaⁿ-kìⁿ Í-sek-lia̍t ke ê lia̍t-ông sī jîn-chû ê ông; kiû lí chún góan hâ môa-pò͘ tī góan ê io, thâu-khak pho̍ah-soh, chhut-khì tâu-hâng Í-sek-lia̍t ông; kiám-chhái i beh jiâu lí ê sìⁿ-miā.

(BCL) 伊的人臣給伊講：「看啊，阮聽見以色列家的列王是仁慈的王，求你准阮縖麻布佇阮的腰，頭殼披索，出去投降以色列王，豈採伊欲饒你的生命。」

32

(THR) In chiū io hâ môa-pò͘, thâu-khak pho̍ah-soh, khì kìⁿ Í-sek-lia̍t ông, kóng, Lí ê lô͘-po̍k Piān-hap-ta̍t kóng, Kiû lí, jiâu góa ê sìⁿ-miā. A-hap kóng, I iáu o̍ah--teh mah? i sī góa ê hiaⁿ-tī.

(BCL) 就腰縖麻布，頭殼披索，去見以色列王，講：「你的奴僕便哈達講，求你饒我的生命。」亞哈講：「伊猶活嗎？伊是我的兄弟。」

33

(THR) Hiah ê lâng chim-chiok thiaⁿ i ê kháu-khì, liâm-piⁿ sūn i ê ōe-bé, kóng, Lí ê hiaⁿ-tī Piān-hap-ta̍t. I kóng, Lín khì chhōa i lâi. Piān-hap-ta̍t chhut-lâi kìⁿ ông, ông chiū hō͘ i chē-chhia.

(BCL) 許個人斟酌聽伊的口氣，連鞭順伊的話尾講：「你的兄弟便哈達！」伊講：「恁去導伊來。」便哈達出來見王，王就互伊坐車。

34

(THR) Piān-hap-ta̍t kā i kóng, Góa ê pē tùi lí ê pē só͘ chhiúⁿ hiah ê siâⁿ, góa beh hêng lí; koh lí thang tī Tāi-má-sek siat koe-chhī, chhin-chhiūⁿ góa ê pē tī Sat-má-lī-a só͘ siat--ê chı̍t-iūⁿ. A-hap kóng, Góa chiàu chit ê iok pàng lí tò-khì; chiū kap i lı̍p-iok, pàng i tò-khì.

(BCL) 便哈達給伊講：「我的父對你的父所搶許個城，我欲還你。閣你通佇大馬色設街市，親像我的父佇撒瑪利亞所設的一樣。」亞哈講：「我照此個約，放你倒去」，就及伊立約，放伊倒去。

35

(THR) Ū sian-ti ê ha̍k-seng ê chı̍t-lâng, ēng Iâ-hô-hoa ê ōe kā i ê tâng-phōaⁿ kóng, Chhiáⁿ lí phah góa. Hit-lâng m̄-khéng phah i.

(BCL) 有先知的學生的一人用耶和華的話給伊的同伴講：「請你拍我！」彼人呣肯拍伊。

36

(THR) I chiū kā i kóng, In-ūi lí m̄-thàn Iâ-hô-hoa ê ōe, lí chı̍t-ē lī-khui góa, beh ū sai kā-sí lí. I chı̍t-ē lī-khui i khì, kó-jiân ū sai tú-tio̍h lâi kā-sí i.

(BCL) 伊就給伊講：「因為你呣趁耶和華的話，你一下離開我，欲有獅咬死你。」伊一下離開伊去，果然有獅抵著，來咬死伊。

37

(THR) I koh tú-tio̍h chı̍t-lâng, kā i kóng, Chhiáⁿ lí phah góa. I chiū phah--i, phah kàu tio̍h-siong.

(BCL) 伊閣抵著一人，給伊講：「請你拍我！」伊就拍伊，拍到著傷。

38

(THR) Sian-ti chiū khì, tī lō͘--nih thèng-hāu ông kóe i ê iông-māu, ēng kun tà ba̍k-chiu.

(BCL) 先知就去，佇路裡聽候王，改伊的容貌，用巾罩目睭。

39

(THR) Ông tùi hia keng-kè ê sî, i kiò ông kóng, Lí ê lô͘-po̍k chhut-tīn, ū chı̍t-lâng oat--lâi piⁿ-á, koh chhōa chı̍t-lâng lâi kau góa, kóng, Lí kò͘-siú chit ê lâng; nā i sit-lo̍h, lí ê sìⁿ-miā tio̍h thòe i ê sìⁿ-miā; nā bô, lí tio̍h kau-chhut chı̍t tha-liân-tek ê gûn.

(BCL) 王對遐經過的時，伊叫王講：「你的奴僕出陣，有一人越來邊仔，閣導一人來交我，講：『你顧守此個人，若伊失落，你的生命著替伊的生命；若無，你著交出一他連得的銀。』

40

(THR) Lí ê lô͘-po̍k kò͘ chit-hāng hit-hāng ê sî, hit-lâng sòa bô--khì. Í-sek-lia̍t ông kā i kóng, Lí ê àn-kiāⁿ án-ni, lí í-keng ka-kī phòaⁿ-tòan.

(BCL) 你的奴僕顧此項彼項的時，彼人續無去。」以色列王給伊講：「你的案件按呢，你已經家己判斷。」

41

(THR) I kóaⁿ-kín tû-khì tà ba̍k-chiu ê kun; Í-sek-lia̍t ông chiū jīn-tit i sī sian-ti ê chı̍t-ê.

(BCL) 伊趕緊除去罩目睭的巾，以色列王就認得伊是先知的一個。

42

(THR) I kā ông kóng, Iâ-hô-hoa án-ni kóng, In-ūi lí chiong Góa só͘ tiāⁿ-tio̍h beh bia̍t ê lâng pàng hō͘ i khì, lí ê sìⁿ-miā chiū tio̍h thòe i ê sìⁿ-miā, lí ê peh-sìⁿ chiū tio̍h thòe i ê peh-sìⁿ.

(BCL) 伊給王講：「耶和華按呢講：『因為你將我所定著欲滅的人放互伊去，你的生命就著替伊的生命，你的百姓就著替伊的百姓。』」

43

(THR) Í-sek-lia̍t ông chiū ut-būn bô hoaⁿ-hí; kàu Sat-má-lī-a tò-khì i ê chhù.

(BCL) 以色列王就鬱悶無歡喜到撒瑪利亞，倒去伊的厝。

Bible Color Mark

• 台語漢字羅馬本
• 巴克禮全羅