列王紀上 第 2 章

1

(THR) Tāi-pı̍t beh sí ê kî kūn--lah; chiū hoan-hù i ê kiáⁿ Só͘-lô-bûn kóng,

(BCL) 大衛欲死的期近啦，就吩咐伊的子所羅門講：

2

(THR) Góa teh-beh kiâⁿ sè-kan chèng-lâng só͘ tio̍h kiâⁿ ê lō͘; só͘-í lí tio̍h ióng-kám, chòe tāi-tiōng-hu;

(BCL) 「我欲行世間眾人所著行的路。所以，你著勇敢，做大丈夫，

3

(THR) siú Iâ-hô-hoa lí Siōng-tè só͘ kau-tài lí siú ê, kiâⁿ I ê tō-lō͘, siú I ê lu̍t-lē, I ê kài-bēng, I ê hoat-tō͘, I kan-chèng ê ōe, chiàu só͘ siá tī Mô͘-se lu̍t-hoat ê chheh--nih ê; án-ni lí bô-lūn chòe sím-mı̍h, bô-lūn tùi toh-lo̍h khì, lóng ōe heng-thong;

(BCL) 守耶和華──你上帝所交代你守的，行伊的道路，守伊的律例、伊的誡命、伊的法度、伊干證的話，照所寫佇摩西律法的冊裡的。按呢，你無論做甚麼，無論對叨落去，攏會亨通。

4

(THR) iā hō͘ Iâ-hô-hoa èng-giām I só͘ èng-ún góa ê ōe kóng, Lí ê kiáⁿ-sun nā kín-sīn i ê lō͘, chīn-sim chīn-ì sêng-sı̍t kiâⁿ tī Góa ê bīn-chêng, chiū lí ê hō͘-è chē Í-sek-lia̍t ê kok-ūi éng bô tn̄g.

(BCL) 也互耶和華應驗伊所應允我的話講：『你的子孫若謹慎伊的路，盡心盡意誠實行佇我的面前，就你的後裔坐以色列的國位永無斷。』

5

(THR) Lí iā chai Sé-ló͘-ngá ê kiáⁿ Iok-ap tùi góa só͘ kiâⁿ ê, i tùi Í-sek-lia̍t nn̄g ê kun-tiúⁿ só͘ kiâⁿ ê, chiū-sī Nî-jíⁿ ê kiáⁿ Ap-nî-jíⁿ, kap Ek-thiap ê kiáⁿ A-má-sat, i thâi-sí in; i tī thài-pêng ê sî lâu in ê huih, chhin-chhiūⁿ tī kau-chiàn ê sî chı̍t-iūⁿ, chiong chit ê kau-chiàn ê huih bak-tio̍h i ê io só͘ hâ ê tòa, kap i ê kha só͘ chhēng ê ôe.

(BCL) 你也知洗魯雅的子約押對我所行的，伊對以色列二個軍長所行的：就是尼珥的子押尼珥及益帖的子亞瑪撒，伊死。伊佇太平的時流的血，親像佇交戰的時一樣，將此個交戰的血染著伊的腰所縖的帶及伊的腳所穿的鞋。

6

(THR) Só͘-í lí tio̍h chiàu lí ê tì-hūi lâi kiâⁿ, m̄-thang iông-ún i pe̍h-thâu-mn̂g an-jiân lo̍h im-kan.

(BCL) 所以你著照你的智慧來行，呣通容允伊白頭毛安然落陰間。

7

(THR) Lí tio̍h hó khóan-thāi Ki-lia̍t lâng Pa-se-lâi hiah ê kiáⁿ, hō͘ in siông-siông tī lí ê toh chia̍h; in-ūi góa siám-pī lí ê hiaⁿ Ap-sa-liông ê sî, in án-ni khóan-thāi góa.

(BCL) 你著好款待基列人巴西萊許個子，互常常佇你的桌食；因為我閃避你的兄押沙龍的時，按呢款待我。

8

(THR) Khòaⁿ ah, kap lí tī-teh-ê ū Pa-hō͘-lîm ê Piān-ngá-bín lâng, Ki-la̍h ê kiáⁿ Sī-múi; góa khì Má-hap-liām ê jı̍t, i ēng tāng ê chiù-chó͘ chiù-chó͘ góa; chóng-sī i ū lo̍h Iok-tàn ngiâ-chih góa, góa chiū kí Iâ-hô-hoa tùi i chiù-chōa kóng, Góa bô beh ēng to thâi lí.

(BCL) 看啊，及你佇的有巴戶琳的便雅憫人，基拉的子示每；我去瑪哈念的日，伊用重的咒詛咒詛我，總是伊有落約但迎接我，我就指耶和華對伊咒誓講：『我無欲用刀你。』

9

(THR) Taⁿ lí bo̍h-tit sǹg i bô-chōe, in-ūi lí sī chhang-miâ ê lâng, iā ōe chai tio̍h cháiⁿ-iūⁿ khóan-thāi i, tio̍h hō͘ i pe̍h-thâu-mn̂g lâu-huih lo̍h im-kan.

(BCL) 今你莫得算伊無罪。因為你是聰明的人，也會知著怎樣款待伊，著互伊白頭毛，流血落陰間。」

10

(THR) Tāi-pı̍t kap i ê lia̍t-chó͘ saⁿ-kap khùn, bâi-chòng tī Tāi-pı̍t ê siâⁿ.

(BCL) 大衛及伊的列祖相及睏，埋葬佇大衛的城。

11

(THR) Tāi-pı̍t chòe Í-sek-lia̍t ông kiōng sì-cha̍p nî; tī Hi-pek-lûn chòe-ông chhit-nî, tī Iâ-lō͘-sat-léng chòe-ông saⁿ-cha̍p-saⁿ nî.

(BCL) 大衛做以色列王共四十年；佇希伯崙做王七年，佇耶路撒冷做王三十三年。

12

(THR) Só͘-lô-bûn chē i ê lāu-pē Tāi-pı̍t ê ūi; i ê kok kian-kò͘ kàu-ke̍k.

(BCL) 所羅門坐伊的老父大衛的位，伊的國堅固到極。

13

(THR) Hap-kı̍p ê kiáⁿ, A-to-nî-ngá, khì kìⁿ Só͘-lô-bûn ê lāu-bú Po̍at-sī-pa; i mn̄g i kóng, Lí lâi sī pêng-an mah? Ìn kóng, Pêng-an.

(BCL) 哈及的子亞多尼雅去見所羅門的老母拔示巴，伊問伊講：「你來是平安嗎？」應講：「平安」；

14

(THR) Koh kóng, Góa ū tāi-chì beh tùi lí kóng. I kóng, Chòe lí kóng.

(BCL) 閣講：「我有代誌欲對你講。」伊講：「做你講。」

15

(THR) A-to-nî-ngá kóng, Lí chai kok pún sī góa-ê, Í-sek-lia̍t chèng-lâng iā lóng ì-hiòng góa, ài góa chòe-ông; chóng-sī kok hóan-tńg kui góa ê sió-tī, in-ūi sī tùi Iâ-hô-hoa hō͘ i.

(BCL) 亞多尼雅講：「你知國本是我的，以色列眾人也攏意向我，愛我做王，總是，國反轉歸我的小弟，因為是對耶和華互伊。

16

(THR) Taⁿ góa ū chı̍t kiāⁿ sū kiû lí, ǹg-bāng lí bo̍h-tit the-sî góa. I kóng, Chòe lí kóng.

(BCL) 今我有一件事求你，向望你莫得推辭我。」伊講：「做你講。」

17

(THR) I kóng, Kiû lí tùi Só͘-lô-bûn ông kóng, hō͘ i chiong Su-liām ê cha-bó͘-kiáⁿ A-pí-soah siúⁿ-sù góa chòe-bó͘, in-ūi ông tek-khak bô the-sî lí.

(BCL) 伊講：「求你對所羅門王講，互伊將書念的查某子亞比煞賞賜我做某，因為王的確無推辭你。」

18

(THR) Po̍at-sī-pa kóng, Hó, góa thòe lí kā ông kóng.

(BCL) 拔示巴講：「好，我替你給王講。」

19

(THR) Tùi án-ni Po̍at-sī-pa khì kìⁿ Só͘-lô-bûn ông, beh ūi-tio̍h A-to-nî-ngá kā i kóng; ông khí-lâi ngiâ-chih i, tùi i kiok-kiong, koh chē i ê ūi, hoan-hù lâng ūi ông ê lāu-bú siat chō-ūi; i chiū chē tī ông ê chiàⁿ-pêng.

(BCL) 對按呢，拔示巴去見所羅門王，欲為著亞多尼雅給伊講；王起來迎接伊，對伊鞠躬，閣坐伊的位，吩咐人為王的老母設座位，伊就坐佇王的正旁。

20

(THR) I chiū kóng, Góa ū chı̍t-kiāⁿ sió-khóa sū kiû lí, chhiáⁿ lí bo̍h--tit the-sî góa. Ông kā i kóng, Góa ê lāu-bú ah, chòe lí kóng; góa bô beh the-sî lí.

(BCL) 伊就講：「我有一件小可事求你，請你莫得推辭我。」王給伊講：「我的老母啊，做你講，我無欲推辭你。」

21

(THR) I kóng, Gōan ēng Su-liām ê cha-bó͘-gín-ná, A-pí-soah, hō͘ lí ê hiaⁿ A-to-nî-ngá chòe-bó͘.

(BCL) 伊講：「願用書念的查某囝仔亞比煞互你的兄亞多尼雅做某。」

22

(THR) Só͘-lô-bûn ông ìn i ê lāu-bú kóng, Lí siáⁿ-sū ūi-tio̍h A-to-nî-ngá kiû Su-liām ê cha-bó͘-gín-ná, A-pí-soah ah? iā tio̍h thòe i kiû kok; in-ūi i sī góa ê hiaⁿ; chiū-sī tio̍h ūi i, kap chè-si A-pí-a-tha, kap Sé-ló͘-ngá ê kiáⁿ Iok-ap lâi kiû.

(BCL) 所羅門王應伊的老母講：「你啥事為著亞多尼雅求書念的查某囝仔亞比煞啊？也著替伊求國，因為伊是我的兄，就是著為伊及祭司亞比亞他及洗魯雅的子約押來求。」

23

(THR) Só͘-lô-bûn ông chiū kí Iâ-hô-hoa lâi chiù-chōa kóng, A-to-nî-ngá kóng che ōe sī hāi ka-kī ê sìⁿ-miā; nā-bô, gōan Siōng-tè ka-pē chek-ho̍at góa.

(BCL) 所羅門王就指耶和華來咒誓講：「亞多尼雅講這話是害家己的生命，若無，願上帝加倍責罰我。

24

(THR) Iâ-hô-hoa kian-kò͘ góa, hō͘ góa chē góa ê pē Tāi-pı̍t ê ūi, chiàu I só͘ èng-ún ê ōe, kā góa kiàn-lı̍p ke; góa kí I ê éng-o̍ah lâi chiù-chōa, A-to-nî-ngá kin-á-jı̍t tek-khak sí.

(BCL) 耶和華堅固我，互我坐我的父大衛的位，照伊所應允的話給我建立家；我指伊的永活來咒誓，亞多尼雅今仔日的確死。」

25

(THR) Só͘-lô-bûn ông chiū chhe Iâ-hô-iâ-tāi ê kiáⁿ Pí-ná-ngá khì; i chiū phah i, hō͘ i sí.

(BCL) 所羅門王就差耶何耶大的子比拿雅去，伊就拍伊互伊死。

26

(THR) Ông kā chè-si A-pí-a-tha kóng, Lí tio̍h tò--khì A-ná-tu̍t, lí ê chhân-hn̂g hia; lí eng-kai tio̍h sí, chóng-sī kin-a-jı̍t góa m̄ hō͘ lí sí, in-ūi lí tī góa ê pē Tāi-pı̍t ê bīn-chêng ū kng Chú Iâ-hô-hoa ê kūi; koh góa ê lāu-pē só͘ siū it-chhè ê hōan-lān, lí iā kap i siū hōan-lān.

(BCL) 王給祭司亞比亞他講：「你著倒去亞拿突你的田園遐！你應該著死，總是今仔日我呣互你死，因為你佇我的父大衛的面前有扛主耶和華的櫃，閣我的老父所受一切的患難，你也及伊受患難。」

27

(THR) Só͘-lô-bûn chiū kek-tio̍k A-pí-a-tha, m̄-chún i chòe Iâ-hô-hoa ê chè-si; án-ni chiū èng-giām Iâ-hô-hoa tī Sī-lô lūn Í-lī ê ke só͘ kóng ê ōe.

(BCL) 所羅門就革逐亞比亞他，呣准伊做耶和華的祭司。按呢，就應驗耶和華佇示羅論以利的家所講的話。

28

(THR) Chit ê siau-sit thôan kàu Iok-ap, Iok-ap chiū cháu, jı̍p Iâ-hô-hoa ê Pò͘-pîⁿ, khîⁿ tôaⁿ-kak; in-ūi Iok-ap sui-jiân bô tè Ap-sa-liông, chóng-sī tè A-to-nî-ngá.

(BCL) 此個消息傳到約押，約押就走入耶和華的布棚，擒壇角。因為約押雖然無隨押沙龍，總是隨亞多尼雅。

29

(THR) Ū lâng kā Só͘-lô-bûn ông kóng, Iok-ap cháu kàu Iâ-hô-hoa ê Pò͘-pîⁿ, taⁿ tī tôaⁿ-piⁿ; Só͘-lô-bûn chiū chhe Iâ-hô-iâ-tāi ê kiáⁿ pí-ná-ngá kóng, Lí khì phah i.

(BCL) 有人給所羅門王講：「約押走到耶和華的布棚，今佇壇邊。」所羅門就差耶何耶大的子比拿雅，講：「你去拍伊。」

30

(THR) Pí-ná-ngá kàu Iâ-hô-hoa ê Pò͘-pîⁿ, kā Iok-ap kóng, Ông án-ni kóng, Lí tio̍h chhut-lâi. I ìn kóng, M̄--ah, góa beh sí tī-chia. Pí-ná-ngá khì hê-hok ông kóng, Iok-ap án-ni kóng, án-ni ìn góa.

(BCL) 比拿雅到耶和華的布棚，給約押講：「王按呢講，你著出來！」伊應講：「呣啊，我欲死佇遮。」比拿雅去回覆王，講約押按呢講按呢應我。

31

(THR) Ông kā i kóng, Lí thang chiàu i ê ōe kiâⁿ; phah-sí lâi bâi-chòng i; thang hō͘ Iok-ap bô in-toaⁿ lâu lâng ê huih hit ê chōe bô kui tī góa, kap góa lāu-pē ê ke.

(BCL) 王給伊講：「你通照伊的話行，拍死來埋葬伊，通互約押無因端流人的血彼個罪無歸佇我及我老父的家。

32

(THR) Iâ-hô-hoa beh ēng i ê huih kui tī i ka-kī ê thâu-khak; in-ūi i phah pí i khah gī, pí i khah hó ê nn̄g lâng, ēng to thâi-sí i; chiū-sī Í-sek-lia̍t ê kun-tiúⁿ Nî-jíⁿ ê kiáⁿ Ap-nî-jíⁿ, kap Iû-tāi ê kun-tiúⁿ Ek-thiap ê kiáⁿ A-má-sat; iā góa ê lāu-pē Tāi-pı̍t m̄-chai.

(BCL) 耶和華欲用伊的血歸佇伊家己的頭殼；因為伊拍比伊卡義比伊卡好的二人，用刀死伊，就是以色列的軍長尼珥的子押尼珥及猶大的軍長益帖的子亞瑪撒，也我的老父大衛呣知。

33

(THR) Tùi án-ni in ê huih beh kui tī Iok-ap ê thâu-khak, kap i ê hō͘-è ê thâu-khak, kàu éng-óan; to̍k-to̍k Tāi-pı̍t kap i ê hō͘-è, i ê ke, i ê ūi, beh tùi Iâ-hô-hoa tit-tio̍h pêng-an, kàu éng-óan.

(BCL) 對按呢，的血欲歸佇約押的頭殼及伊的後裔的頭殼，到永遠；獨獨大衛及伊的後裔，伊的家，伊的位，欲對耶和華得著平安，到永遠。」

34

(THR) Iâ-hô-iâ-tāi ê kiáⁿ Pí-ná-ngá chiū chiūⁿ--khì, phah-sí i, chiū bâi-chòng i tī khòng-iá, tī i ka-kī ê chhù.

(BCL) 耶何耶大的子比拿雅就上去，拍死伊，就埋葬伊佇曠野佇伊家己的厝。

35

(THR) Ông chiū siat-lı̍p Iâ-hô-iâ-tāi ê kiáⁿ Pí-ná-ngá thòe Iok-ap chòe kun-tiúⁿ; koh siat-lı̍p chè-si Sat-tok, lâi thòe A-pí-a-tha.

(BCL) 王就設立耶何耶大的子比拿雅，替約押做軍長，閣設立祭司撒督來替亞比亞他。

36

(THR) Ông chhe lâng kiò Sī-múi lâi, chiū kā i kóng, Lí tio̍h ūi ka-kī khí chhù tī Iâ-lō͘-sat-léng, khiā-khí tī-hia, m̄-thang chhut hia khì pa̍t-ūi.

(BCL) 王差人叫示每來，就給伊講：「你著為家己起厝佇耶路撒冷，徛起佇遐，呣通出遐去別位。

37

(THR) In-ūi lí tio̍h khak-sı̍t chai, lí chhut-khì kè Khip-lûn khoe, hit-jı̍t tio̍h sí, lí ê huih beh kui lí ka-kī ê thâu-khak.

(BCL) 因為你著確實知，你出去過汲淪溪，彼日著死！你的血欲歸你家己的頭殼。」

38

(THR) Sī-múi ìn ông kóng, Chit ê ōe chin-hó; góa ê chú góa ê ông só͘ kóng-ê, lí ê lô͘-po̍k beh án-ni kiâⁿ. Tùi án-ni Sī-múi tiàm tī Iâ-lō͘-sat-léng chōe-chōe jı̍t.

(BCL) 示每應王講：「此個話真好！我的主我的王所講的，你的奴僕欲按呢行。」對按呢示每踮佇耶路撒冷多多日。

39

(THR) Kè saⁿ-nî, Sī-múi nn̄g ê lô͘-po̍k cháu kàu Ka-te̍k ông Má-ka ê kiáⁿ A-kiat hia; ū lâng kā Sī-múi kóng, Lí khòaⁿ, lí ê lô͘-po̍k tī Ka-te̍k.

(BCL) 過三年，示每二個奴僕走到迦特王瑪迦的子亞吉遐。有人給示每講：「你看，你的奴僕佇迦特。」

40

(THR) Sī-múi khí-lâi, pī-pān lû khì Ka-te̍k, kàu A-kiat ông hia, chhē i ê lô͘-po̍k; Sī-múi chiū khì Ka-te̍k tòa i ê lô͘-po̍k tò-lâi.

(BCL) 示每起來，備辦驢，去迦特到亞吉王遐尋伊的奴僕，示每就去迦特帶伊的奴僕倒來。

41

(THR) Ū lâng kā Só͘-lô-bûn kóng, Sī-múi chhut Iâ-lō͘-sat-léng khì Ka-te̍k tò-lâi.

(BCL) 有人給所羅門講：「示每出耶路撒冷去迦特倒來。」

42

(THR) Ông chiū chhe lâng kiò Sī-múi lâi, tùi i kóng, Góa kiám-m̄-sī kiò lí kí Iâ-hô-hoa chiù-chōa, koh kéng-kài lí kóng, Lí tio̍h khak-sı̍t chai lí chhut-lâi khì gōa-bīn, bô-lūn khì toh-lo̍h, hit-jı̍t lí tio̍h sí mah? Lí ìn góa kóng, Góa thiaⁿ chit ê ōe chin hó.

(BCL) 王就差人叫示每來，對伊講：「我豈呣是叫你指耶和華咒誓，閣警戒你講『你著確實知，你出來去外面無論去叨落，彼日你著死』嗎？你應我講：『我聽此個話真好。』

43

(THR) Taⁿ lí siáⁿ-sū bô chip-siú kí Iâ-hô-hoa só͘ chiù-chōa-ê, kap góa só͘ kéng-kài lí ê bēng-lēng ah?

(BCL) 今你啥事無執守指耶和華所咒誓的及我所警戒你的命令啊？」

44

(THR) Ông koh kā Sī-múi kóng, Lí ê sim só͘ chûn ê pháiⁿ, chiū-sī lí tùi góan lāu-pē Tāi-pı̍t só͘ kiâⁿ-ê lí ka-kī lóng chai; só͘-í Iâ-hô-hoa beh chiong lí ê pháiⁿ kui lí ka-kī ê thâu-khak.

(BCL) 王閣給示每講：「你的心所存的歹就是你對阮老父大衛所行的，你家己攏知，所以耶和華欲將你的歹歸你家己的頭殼；

45

(THR) Chóng-sī Só͘-lô-bûn ông beh tit-tio̍h hok-khì; koh Tāi-pı̍t ê kok-ūi beh tī Iâ-hô-hoa ê bīn-chêng kian-kò͘, kàu éng-óan.

(BCL) 總是所羅門王欲得著福氣，閣大衛的國位欲佇耶和華的面前堅固，到永遠。」

46

(THR) Ông chiū bēng-lēng Iâ-hô-iâ-tāi ê kiáⁿ Pí-ná-ngá, i chiū chhut-khì, phah hō͘ i sí. Tùi án-ni kok-ūi kian-kò͘ tī Só͘-lô-bûn ê chhiú.

(BCL) 王就命令耶何耶大的子比拿雅。伊就出去拍互伊死。對按呢，國位堅固佇所羅門的手。

Bible Color Mark

• 台語漢字羅馬本
• 巴克禮全羅