哥林多前書 第 8 章

1

(THR) Lūn-kàu chè ngó͘-siōng ê mı̍h: Lán chai lán lóng ū tì-sek. Tì-sek ōe tì-kàu chū-ko; nā-sī jîn-ài ōe kiàn-lı̍p tek-hēng.

(BCL) 論到祭偶像的物，咱知咱攏有智識。智識會致到自高，若是仁愛會建立德行。

2

(THR) Lâng nā phah-sǹg i ū só͘ chai, chiū-sī i iáu-bē chai chiàu só͘ eng-kai chai.

(BCL) 人若拍算伊有所知，就是伊猶未知照所應該知。

3

(THR) Lâng nā thiàⁿ Siōng-tè, chit ê lâng chiū-sī hō͘ I só͘ bat.

(BCL) 人若疼上帝，此個人就是互伊所識。

4

(THR) Lūn-kàu chia̍h chè ngó͘-siōng ê mı̍h, lán chai ngó͘-siōng tī sè-kan sī bô iáⁿ ê, iā chai Siōng-tè to̍k-to̍k chı̍t-ê, bô pa̍t ê.

(BCL) 論到食祭偶像的物，咱知偶像佇世間是無影的，也知上帝獨獨一個，無別個。

5

(THR) In-ūi sui-jiân ū chheng chòe Siōng-tè ê, he̍k-sī tī thiⁿ-nı̍h he̍k-sī tī tōe-nı̍h, chhin-chhiūⁿ ū chōe-chōe siōng-tè, chōe-chōe chú;

(BCL) 因為雖然有稱做上帝的，或是佇天裡，或是佇地裡，親像有多多上帝，多多主；

6

(THR) nā-sī lán chí ū chı̍t ê Siōng-tè, chiū-sī Pē, bān mı̍h pún tùi I, lán iā kui tī I; koh ū chı̍t ê Chú Iâ-so͘ Ki-tok, bān mı̍h tùi I, lán iā tùi I.

(BCL) 若是咱只有一個上帝，就是父──萬物本對伊；咱也歸佇伊──閣有一個主，耶穌基督──萬物對伊；咱也對伊。

7

(THR) Chóng-sī lâng bô lóng ū chit hō tì-sek; ū-ê pài ngó͘-siōng kòaiⁿ-sì, kàu taⁿ lia̍h hit ê chè-sū chòe chè ngó͘-siōng ê mı̍h lâi chia̍h i, in ê liông-sim kì-jiân lóan-jio̍k, só͘-í chiū bak-tio̍h.

(BCL) 總是人無攏有此號智識。有的拜偶像慣勢，到今掠彼個祭祀做祭偶像的物來食伊。的良心既然軟弱，所以就染著。

8

(THR) Chóng-sī chia̍h-mı̍h bōe hō͘ Siōng-tè hoaⁿ-hí lán; bô chia̍h, lán bô khui-sún; chia̍h, lán iā bô lī-ek.

(BCL) 總是食物互上帝歡喜咱，無食，咱無虧損，食，咱也無利益。

9

(THR) To̍k-to̍k tio̍h kín-sīn, kiaⁿ-liáu lín chit ê kôan chòe nńg-chiáⁿ ê lâng ê that-gāi.

(BCL) 獨獨著謹慎，驚了恁此個權做軟茈的人的塞礙。

10

(THR) In-ūi nā ū lâng khòaⁿ-kìⁿ lí ū tì-sek ê chē toh tī ngó͘-siōng ê biō, hit ê lóan-jio̍k ê lâng ê liông-sim kiám bô tùi án-ni hòng-táⁿ, lâi chia̍h chè ngó͘-siōng ê mı̍h mah?

(BCL) 因為若有人看見你有智識的，坐桌佇偶像的廟，彼個軟弱的人的良心，豈無對按呢放膽來食祭偶像的物嗎？

11

(THR) in-ūi tùi lí ê tì-sek hit ê lóan-jio̍k ê lâng tîm-lûn, chiū-sī Ki-tok thòe i sí ê hiaⁿ-tī.

(BCL) 因為，對你的智識彼個軟弱的人沈淪，就是基督替伊死的兄弟。

12

(THR) Lín án-ni tek-chōe hiaⁿ-tī, siong-tio̍h in lóan-jio̍k ê liông-sim, chiū-sī tek-chōe Ki-tok.

(BCL) 恁按呢得罪兄弟，傷著軟弱的良心，就是得罪基督。

13

(THR) Só͘-í chia̍h-mı̍h nā hō͘ góa ê hiaⁿ-tī po̍ah-tó, góa chiū éng-éng m̄ chia̍h bah, bián-tit hō͘ góa ê hiaⁿ-tī po̍ah-tó.

(BCL) 所以，食物若互我的兄弟跋倒，我就永永呣食肉，免得互我的兄弟跋倒。

Bible Color Mark

• 台語漢字羅馬本
• 巴克禮全羅