哥林多前書 第 5 章

1

(THR) Khak-sı̍t thiaⁿ-kìⁿ lín tiong-kan ū îm-lōan, iā hit hō îm-lōan gōa-pang tiong só͘ bô ê, chiū-sī ū lâng ū i ê lāu-pē ê bó͘.

(BCL) 確實聽見恁中間有淫亂。也彼號淫亂外邦中所無的，就是有人有伊的老父的某。

2

(THR) Lín iáu teh chū-ko, iā kèng-jiân bô ai-siong, chiong kiâⁿ chit hō tāi-chì ê lâng tùi lín tiong-kan tû-khì.

(BCL) 恁猶自高，也竟然無哀傷，將行此號代誌的人對恁中間除去。

3

(THR) Góa seng-khu saⁿ lī-khui, sim-sîn kap lín saⁿ-kūn, chhin-chhiūⁿ chhin-sin tī-teh, í-keng ū gí-tiāⁿ kiâⁿ chit hō sū ê lâng,

(BCL) 我身軀相離開，心神及恁相近，親像親身佇，已經有擬定行此號事的人。

4

(THR) thok lán ê Chú Iâ-so͘ ê miâ, lín chiah-ê í-keng chū-chı̍p, góa ê sîn iā tī-teh, koh ū lán ê Chú Iâ-so͘ ê kôan-lêng,

(BCL) 託咱的主耶穌的名，恁諸個已經聚集，我的神也佇，閣有咱的主耶穌的權能，

5

(THR) chiong hit hō lâng kau hō͘ Sat-tàn, tì-kàu pāi-hōai i ê jio̍k-thé, beh hō͘ i ê sîn tī lán ê Chú Iâ-so͘ ê jı̍t tit kiù.

(BCL) 將彼號人交互撒但，致到敗壞伊的肉體，欲互伊的神佇咱的主耶穌的日得救。

6

(THR) Lín ê khoa-kháu m̄ sī hó. Kiám m̄ chai tām-po̍h kàⁿ ōe hoat kui-sn̂g mah?

(BCL) 恁的誇口呣是好。豈呣知淡薄酵會發歸甑嗎？

7

(THR) Kū ê kàⁿ tio̍h tû kàu chheng, hō͘ lín chiâⁿ-chòe sin ê sn̂g, chhin-chhiūⁿ lín sī bô kàⁿ ê. In-ūi lán pôaⁿ-kè-choeh ê iûⁿ-ko iā í-keng thâi, chiū-sī Ki-tok.

(BCL) 舊的酵著除到清，互恁成做新的甑，親像恁是無酵的；因為咱過節的羊羔也已經，就是基督。

8

(THR) Só͘-í lán tio̍h siú choeh, bô ēng kū ê kàⁿ, iā bô ēng pháiⁿ sim ok-to̍k ê kàⁿ, sī ēng sûn-chôan chin-sı̍t ê bô kàⁿ piáⁿ.

(BCL) 所以，咱著守節，無用舊的酵，也無用歹心、惡毒的酵，是用純全真實的無酵餅。

9

(THR) Chêng góa siá hit tiuⁿ phoe hō͘ lín, kah lín m̄ thang kap îm-lōan ê lâng chham-chhap,

(BCL) 前我寫彼張批互恁，教恁呣通及淫亂的人參插。

10

(THR) m̄ sī hòan-hòan chí chit sè-kan îm-lōan ê, á-sī tham-sim ê, kap le̍k-sek ê, á-sī pài ngó͘-siōng ê; nā beh án-ni, tio̍h lī-khui sè-kan chiah ōe.

(BCL) 呣是泛泛指此世間淫亂的，抑是貪心的，及勒索的，抑是拜偶像的；若欲按呢，著離開世間才會。

11

(THR) Chóng-sī taⁿ góa siá phoe hō͘ lín sī kóng, nā ū lâng chheng chòe hiaⁿ-tī iā ū îm-lōan, á-sī tham-sim, á-sī pài ngó͘-siōng, á-sī lóe-mē, á-sī hò͘ⁿ chiú, á-sī le̍k-sek ê, bo̍h-tit kap i chham-chhap; chit hō lâng liân kap i chia̍h iā m̄ thang.

(BCL) 總是今我寫批互恁是講，若有人稱做兄弟也有淫亂，抑是貪心，抑是拜偶像，抑是詈罵，抑是好酒，抑是勒索的，莫得及伊參插，此號人連及伊食也呣通。

12

(THR) In-ūi phòaⁿ-tòan gōa-bīn lâng kap góa ū sím-mı̍h kan-sia̍p?

(BCL) 因為判斷外面人及我有甚麼干涉？

13

(THR) Lāi-bīn ê lâng kiám m̄ sī lín phòaⁿ-tòan ê; iā gōa-bīn ê lâng Siōng-tè phòaⁿ-tòan i ah? Hit ê pháiⁿ lâng tio̍h tùi lín tiong-kan tû-khì.

(BCL) 內面的人豈呣是恁判斷的？也外面的人上帝判斷伊啊！彼個歹人著對恁中間除去。

Bible Color Mark

• 台語漢字羅馬本
• 巴克禮全羅