哥林多前書 第 4 章

1

(THR) Lâng tio̍h lia̍h góan chòe Ki-tok ê chhe-ēng, chòe Siōng-tè chiah ê ò-biāu ê kóan-ke.

(BCL) 人著掠阮做基督的差用，做上帝諸個奧妙的管家。

2

(THR) Koh só͘ ǹg-bāng tī kóan-ke ê, sī ài tit i chīn-tiong.

(BCL) 閣所向望佇管家的，是愛得伊盡忠。

3

(THR) Nā-sī góa hō͘ lín á-sī pa̍t lâng phoe-phêng, góa lia̍h chòe ke̍k sió-khóa ê sū; góa iā bô ka-kī phoe-phêng.

(BCL) 若是我互恁抑是別人批評，我掠做極小可的事；我也無家己批評。

4

(THR) In-ūi góa m̄ chai ka-kī ū sím-mı̍h thang chek-pī, chóng-sī góa bô tùi chit-ê tit-tio̍h chheng-chòe-gī; to̍k-to̍k phoe-phêng góa ê chiū-sī Chú.

(BCL) 因為我呣知家己有甚麼通責備，總是我無對此個得著稱做義；獨獨批評我的就是主。

5

(THR) Só͘-í sî bē kàu, lín bo̍h-tit phoe-phêng sím-mı̍h; thèng-hāu Chú kàu, I beh ēng kng chiò tī o͘-àm chiah ê ún-ba̍t ê sū, hián-bêng chiah ê sim-lāi ê kè-bô͘; hit sî ta̍k lâng beh tùi Siōng-tè tit-tio̍h i ê o-ló.

(BCL) 所以，時未到，恁莫得批評甚麼，聽候主到，伊欲用光照佇黑暗諸個隱密的事，顯明諸個心內的計謀。彼時，逐人欲對上帝得著伊的謳咾。

6

(THR) Hiaⁿ-tī ah, góa ūi-tio̍h lín chiah-ê chioh pún-sin kap A-pho-lô lâi kóng-khí chiah ê tāi-chì, sī beh hō͘ lín tī khóan-thāi góan ê sū lâi ha̍k-sı̍p chit kù. Bo̍h-tit kè-thâu tī só͘ kì-chài; bián-tit lín chū-ko, chun-tiōng chit-ê, khòaⁿ-khin hit-ê.

(BCL) 兄弟啊，我為著恁諸個，借本身及亞波羅來講起諸個代誌，是欲互恁佇款待阮的事來學習此句，莫得過頭佇所記載，免得恁自高，尊重此個，看輕彼個。

7

(THR) In-ūi chī-chūi hō͘ lí koh-iūⁿ tī pa̍t lâng ah? lí só͘ ū ê, tá-lo̍h chı̍t hāng m̄ sī tùi siū ê? Nā-sī tùi siū ê, cháiⁿ-iūⁿ khoa-kháu, ná chhin-chhiūⁿ m̄ sī tùi siū ê ah?

(BCL) 因為是誰互你各樣佇別人啊？你所有的叨落一項呣是對受的？若是對受的，怎樣誇口，那親像呣是對受的啊？

8

(THR) Lín í-keng pá-chiok, í-keng pù-ū, lín í-keng chòe ông, góan bô hūn; góa chin-chiàⁿ ài lín chòe ông, hō͘ góan iā kap lín saⁿ-kap chòe ông.

(BCL) 恁已經飽足！已經富有！恁已經做王！阮無份。我真正愛恁做王，互阮也及恁相及做王。

9

(THR) In-ūi góa teh siūⁿ, Siōng-tè ū an-tì góan chiah ê sù-tô͘ tī bé-liu, chhin-chhiūⁿ gí-sí ê hōan-lâng; in-ūi góan chiâⁿ-chòe chı̍t pîⁿ hì, hō͘ sè-kan, kap thiⁿ-sài, kap lâng khòaⁿ.

(BCL) 因為我想上帝有安置阮諸個使徒佇尾溜，親像擬死的犯人；因為阮成做一棚戲，互世間及天使及人看。

10

(THR) Góan ūi-tio̍h Ki-tok chòe gōng, lín tiàm-tī Ki-tok chòe tì-hūi; góan lóan-jio̍k, lín ióng-chòng; lín chun-kùi, góan pi-chiān.

(BCL) 阮為著基督做戇，恁佇基督做智慧；阮軟弱，恁勇壯；恁尊貴，阮卑賤。

11

(THR) Kàu tī chit tia̍p góan iā iau, iā chhùi-ta, thǹg-pak-theh, hō͘ lâng cheng, bô tiāⁿ-tio̍h ê só͘-chāi;

(BCL) 到佇此霎，阮也枵也嘴乾，褪腹裼，互人掙，無定著的所在，

12

(THR) iā lô-khó͘ chhin-chhiūⁿ chòe kang; siū lóe-mē, chiū kā lâng chiok-hok; siū khún-tio̍k, chiū thun-lún;

(BCL) 也勞苦，親手做工。受詈罵，就給人祝福；受窘逐，就吞；

13

(THR) siū húi-pòng, chiū kap lâng hó-chhùi; kèng-jiân chiâⁿ-chòe sè-kan ê pùn-sò, bān mı̍h ê che-tái, kàu tī kin-á-jı̍t.

(BCL) 受誹謗，就及人好嘴。竟然成做世間的糞埽，萬物的渣滓，到佇今仔日。

14

(THR) Góa siá chiah-ê m̄ sī beh hō͘ lín kiàn-siàu, sī kéng-kài lín, chhin-chhiūⁿ góa só͘ thiàⁿ ê kiáⁿ.

(BCL) 我寫諸個，呣是欲互恁見誚，是警戒恁，親像我所疼的子。

15

(THR) In-ūi lín tiàm-tī Ki-tok, sian-siⁿ sui-jiân káng-bān, nā-sī lāu-pē chiū bô chōe ê; in-ūi tī Ki-tok Iâ-so͘, góa bat tùi hok-im lâi siⁿ lín.

(BCL) 因為恁佇基督，先生雖然講萬，若是老父就無多個，因為佇基督耶穌，我曾對福音來生恁。

16

(THR) Só͘-í góa khǹg lín tio̍h o̍h góa.

(BCL) 所以，我勸恁著學我。

17

(THR) In-ūi án-ni góa í-keng chhe Thê-mô͘-thài khì lín hia. i tiàm-tī Chú sī góa só͘ thiàⁿ koh chīn-tiong ê kiáⁿ; i beh hō͘ lín kì-tit góa tiām-tī Ki-tok ê kiâⁿ-ta̍h, chiū-sī chhin-chhiūⁿ góa ta̍k só͘-chāi, tī ta̍k ê kàu-hōe só͘ kà-sī ê.

(BCL) 因為按呢我已經差提摩太去恁遐。伊佇主，是我所疼閣盡忠的子。伊欲互恁記得我佇基督的行踏，就是親像我逐所在佇逐個教會所教示的。

18

(THR) Ū lâng chū-ko, lia̍h-chòe góa bô beh kàu lín hia.

(BCL) 有人自高，掠做我無欲到恁遐；

19

(THR) Chóng-sī Chú nā ún-chún, góa beh kín-kín khì chiū-kūn lín; koh góa só͘ beh chai ê, m̄ sī hiah ê chū-ko ê lâng ê ōe, chiū-sī in ê kôan-lêng.

(BCL) 總是，主若允准，我欲緊緊去就近恁，閣我所欲知的，呣是許個自高的人的話，就是的權能。

20

(THR) In-ūi Siōng-tè ê kok put-chāi kóng ōe, sī chāi-tī kôan-lêng.

(BCL) 因為上帝的國不在講話，是在佇權能。

21

(THR) Lín ài cháiⁿ-iūⁿ? góa chiū-kūn lín tio̍h kia̍h chhê-á khì? á-sī ēng jîn-ài kap un-jiû ê sim-sîn ah?

(BCL) 恁愛怎樣？我就近恁著抬箠仔去？抑是用仁愛及溫柔的心神啊？

Bible Color Mark

• 台語漢字羅馬本
• 巴克禮全羅