哥林多前書 第 14 章

1

(THR) Tio̍h kiû jîn-ài; iā tio̍h chhiat-chhiat him-bō͘ sio̍k tī sîn ê un-sù; khah iàu-kín ê sī chòe sian-ti lâi thôan-tō.

(BCL) 著求仁愛，也著切切欣慕屬佇神的恩賜，卡要緊的，是做先知來傳道。

2

(THR) In-ūi kóng kok iūⁿ ê im-gú ê m̄ sī kap lâng kóng, sī kap Siōng-tè kóng, in-ūi bô lâng ōe hiáu thiaⁿ; chóng-sī i ū teh kóng sio̍k sîn ê ò-biāu.

(BCL) 因為講各樣的音語的，呣是及人講，是及上帝講，因為無人會曉聽。總是，伊有講屬神的奧妙。

3

(THR) To̍k-to̍k chòe sian-ti lâi thôan-tō ê sī kap lâng kóng, lâi kiàn-lı̍p, lâi khòan-bián, lâi an-ùi.

(BCL) 獨獨做先知來傳道的，是及人講，來建立、來勸勉、來安慰。

4

(THR) Kóng im-gú ê sī kiàn-lı̍p ka-kī; chòe sian-ti thôan-tō ê sī kiàn-lı̍p kàu-hōe.

(BCL) 講音語的，是建立家己；做先知傳道的，是建立教會。

5

(THR) Góa ài tit lín lóng ōe kóng im-gú, to̍k-to̍k koh khah ài, sī lín chòe sian-ti lâi thôan-tō. In-ūi kóng im-gú ê nā bô hoan-e̍k, hō͘ kàu-hōe tit-tio̍h kiàn-lı̍p, chiū chòe sian-ti lâi thôan-tō ê pí i khah tōa.

(BCL) 我愛得恁攏會講音語，獨獨閣卡愛是恁做先知來傳道；因為講音語的，若無翻譯，互教會得著建立，就做先知來傳道的，比伊卡大。

6

(THR) Taⁿ hiaⁿ-tī ah, góa kàu lín hia, nā chheng-chheng kóng im-gú, iā bô ēng khé-sī, á-sī chai-bat, á-sī chòe sian-ti lâi thôan-tō, á-sī ēng kà-sī ê ōe lâi kā lín kóng, ū sím-mı̍h lī-ek lín?

(BCL) 今兄弟啊，我到恁遐，若清清講音語，也無用啟示，抑是知識，抑是做先知來傳道，抑是用教示的話，來給恁講，有甚麼利益恁？

7

(THR) Hit hō bô o̍ah-khì ê mı̍h teh chhut siaⁿ, chhin-chhiūⁿ siau chhin-chhiūⁿ khîm, nā bô hun-piat i ê im, thái ōe chai só͘ pûn só͘ tôaⁿ ê sī sím-mı̍h ah?

(BCL) 彼號無活氣的物出聲，親像簫，親像琴，若無分別伊的音，豈會知所歕所彈的是甚麼啊？

8

(THR) Nā sī sàu-kak chhut bô tiāⁿ-tio̍h ê im, chī-chūi ōe pī-pān kau-chiàn ah?

(BCL) 若是哨角出無定著的音，是誰會備辦交戰啊？

9

(THR) Lín iā sī án-ni, nā bô ēng chı̍h kóng khòai bêng ê ōe, thái ōe chai só͘ kóng ê ah? lín só͘ kóng ê hō͘ hong pe-khì.

(BCL) 恁也是按呢。若無用舌講快明的話，豈會知所講的啊，恁所講的互風飛去。

10

(THR) Sè-chiūⁿ ê im-gú put-lūn jōa chōe iūⁿ, bô chı̍t ê bô ì-sù.

(BCL) 世上的音語，不論偌多樣，無一個無意思。

11

(THR) Góa nā m̄ bat hit ê siaⁿ ê ì-gī, chiū kóng ê lâng beh lia̍h góa chòe hoan, góa iā beh lia̍h i chòe hoan.

(BCL) 我若呣識彼個聲的意義，就講的人欲掠我做番，我也欲掠伊做番。

12

(THR) Án-ni lín kì-jiân chhiat-chhiat him-bō͘ sio̍k tī sîn ê un-sù, tio̍h kiû hō͘ lín chhiong-móa lâi kiàn-lı̍p kàu-hōe.

(BCL) 按呢恁既然切切欣慕屬佇神的恩賜，著求互恁充滿來建立教會。

13

(THR) Só͘-í kóng im-gú ê tio̍h kiû ōe hoan-e̍k.

(BCL) 所以講音語的，著求會翻譯。

14

(THR) Góa nā ēng im-gú kî-tó, góa ê sîn ū teh kî-tó, nā-sī góa ê sim-su bô só͘ lī-ek.

(BCL) 我若用音語祈禱，我的神有祈禱，若是我的心思無所利益。

15

(THR) Án-ni sī cháiⁿ-iūⁿ? Góa beh ēng sîn kî-tó, iā beh ēng sim-su kî-tó; góa beh ēng sîn gîm si, iā beh ēng sim-su gîm si.

(BCL) 按呢是怎樣？我欲用神祈禱，也欲用心思祈禱；我欲用神吟詩，也欲用心思吟詩。

16

(THR) Nā bô, chiū lín ēng sîn chiok-siā, hit hō pêng-siông lâng kì-jiân m̄ chai lí teh kóng sím-mı̍h, i thái ōe tng lí kám-siā ê sî lâi kóng, À-bēng?

(BCL) 若無，就恁用神祝謝，彼號平常人既然呣知你講甚麼，伊豈會當你感謝的時來講「阿們」？

17

(THR) Lí ê kám-siā sī hó, nā-sī pa̍t lâng bô tit-tio̍h kiàn-lı̍p.

(BCL) 你的感謝是好，若是別人無得著建立。

18

(THR) Góa kám-siā Siōng-tè, góa kóng im-gú pí lín chèng lâng khah chōe.

(BCL) 我感謝上帝，我講音語比恁眾人卡多。

19

(THR) Chóng-sī tī kàu-hōe tiong góa ài ēng sim-su kóng gō͘ kù thang kà-sī lâng ê ōe, iâⁿ-kè kóng bān kù ê im-gú.

(BCL) 總是佇教會中，我愛用心思講五句通教示人的話，贏過講萬句的音語。

20

(THR) Hiaⁿ-tī ah, lūn tì-hūi bo̍h-tit chòe gín-ná; lūn pháiⁿ tio̍h chòe eⁿ-á, lūn tì-hūi tio̍h chòe tōa lâng.

(BCL) 兄弟啊，論智慧莫得做囝仔。論歹著做嬰仔，論智慧著做大人。

21

(THR) Tī lu̍t-hoat ū kì-chài, Chú kóng, Góa beh ēng pa̍t iūⁿ im-gú ê lâng, kap pa̍t iūⁿ lâng ê chhùi-tûn, kā chit kok ê peh-sìⁿ kóng; án-ni in iû-gôan m̄ thiaⁿ góa.

(BCL) 佇律法有記載：主講：我欲用別樣音語的人及別樣人的嘴唇給此國的百姓講；按呢猶原呣聽我。

22

(THR) Só͘-í im-gú chòe tiāu-thâu, m̄ sī ūi-tio̍h sìn ê lâng, sī ūi-tio̍h m̄ sìn ê lâng; chòe sian-ti lâi thôan-tō, m̄ sī ūi-tio̍h m̄ sìn ê lâng, sī ūi-tio̍h sìn ê lâng.

(BCL) 所以，音語做兆頭呣是為著信的人，是為著呣信的人；做先知來傳道呣是為著呣信的人，是為著信的人。

23

(THR) Siat-sú chôan kàu-hōe chū-chı̍p tī chı̍t só͘-chāi, nā lóng kóng im-gú, ū pêng-siông lâng á-sī m̄ sìn ê jı̍p-lâi, kiám bô beh kóng lín teh siáu mah?

(BCL) 設使全教會聚集佇一所在，若攏講音語，有平常人，抑是呣信的入來，豈無欲講恁　嗎？

24

(THR) Siat-sú lóng chòe sian-ti lâi thôan-tō, ū chı̍t ê m̄ sìn ê á-sī pêng-siông lâng jı̍p-lâi, i chiū hō͘ chèng lâng kiò-chhíⁿ, hō͘ chèng lâng gí-tòan;

(BCL) 設使攏做先知來傳道，有一個呣信的，抑是平常人入來，伊就互眾人叫醒，互眾人擬斷，

25

(THR) i sim-lāi só͘ ún-ba̍t ê lō͘-hiān; chiū phak-lo̍h-khì pài Siōng-tè, kóng Siōng-tè chin-chiàⁿ tī lín tiong-kan.

(BCL) 伊心內所隱密的露現，就仆落去，拜上帝，講：「上帝真正佇恁中間。」

26

(THR) Hiaⁿ-tī ah, án-ni sī cháiⁿ-iūⁿ? Lín chū-chı̍p ê sî, ta̍k lâng ū si-koa ê, ū kà-sī ê, ū khé-sī ê, ū im-gú ê, ū hoan-e̍k ê. Ta̍k hāng sū tio̍h kiâⁿ lâi tì-kàu kiàn-lı̍p.

(BCL) 兄弟啊，按呢是怎樣？恁聚集的時，逐人有詩歌的，有教示的，有啟示的，有音語的，有翻譯的。逐項事著行來致到建立。

27

(THR) Nā ū kóng im-gú ê, chí kham-tit nn̄g ê, siōng chōe saⁿ ê, iā tio̍h chiàu chhù-sū, koh tio̍h chı̍t lâng hoan-e̍k.

(BCL) 若有講音語的，只堪得二個，上多三個，也著照次序，閣著一人翻譯。

28

(THR) Nā bô lâng thang hoan-e̍k, chiū tī kàu-hōe tiong i tio̍h chēng-chēng; to̍k-to̍k tùi pún-sin kap tùi Siōng-tè kóng.

(BCL) 若無人通翻譯，就佇教會中伊著靜靜，獨獨對本身及對上帝講。

29

(THR) Chòe sian-ti lâi thôan-tō ê, iā chí kham nn̄g ê á saⁿ ê lâi kóng, kî-û ê tio̍h hun-piat i.

(BCL) 做先知來傳道的，也只堪二個抑三個來講，其餘的著分別伊。

30

(THR) Nā piⁿ-thâu chē ê ū lâng tit-tio̍h khé-sī, hit ê tāi-seng kóng ê tio̍h chēng-chēng.

(BCL) 若邊頭坐的有人得著啟示，彼個代先講的著靜靜。

31

(THR) In-ūi lín chı̍t lâng chı̍t lâng lóng ōe thang chòe sian-ti lâi thôan-tō, hō͘ chèng lâng thang ha̍k-sı̍p, hō͘ chèng lâng thang siū khó͘-khǹg.

(BCL) 因為恁一人一人攏會通做先知來傳道，互眾人通學習，互眾人通受苦勸。

32

(THR) Koh sian-ti ê sîn sī sūn-ho̍k tī sian-ti.

(BCL) 閣先知的神是順服佇先知；

33

(THR) In-ūi Siōng-tè m̄ sī hun-lōan ê, sī hô-pêng ê; chhin-chhiūⁿ tī sèng-tô͘ lóng-chóng ê kàu-hōe chı̍t iūⁿ.

(BCL) 因為上帝呣是紛亂的，是和平的，親像佇聖徒攏總的教會一樣。

34

(THR) Hū-jîn-lâng tī kàu-hōe tiong, tio̍h chēng-chēng; in-ūi m̄ chún in kóng; chiū-sī tio̍h sūn-ho̍k, chhin-chhiūⁿ lu̍t-hoat iā sī án-ni kóng.

(BCL) 婦仁人佇教會中著靜靜，因為呣准講。就是著順服，親像律法也是按呢講。

35

(THR) In nā ài ha̍k-sı̍p sím-mı̍h, tio̍h tī ke-lāi mn̄g ka-kī ê tiōng-hu; in-ūi hū-jîn-lâng tī kàu-hōe tiong lâi kóng sī kiàn-siàu,

(BCL) 若愛學習甚麼，著佇家內問家己的丈夫，因為婦仁人佇教會中來講是見誚。

36

(THR) Siōng-tè ê tō-lí kiám sī tùi lín chhut? á-sī kan-ta thôan hō͘ lín ah?

(BCL) 上帝的道理豈是對恁出？抑是干單傳互恁啊？

37

(THR) Nā ū lâng ka-kī lia̍h chòe sian-ti, á-sī chòe sio̍k tī sîn ê lâng, chiū tio̍h chai góa só͘ siá hō͘ lín ê sī Chú ê bēng-lēng.

(BCL) 若有人家己掠做先知，抑是做屬佇神的人，就著知，我所寫互恁的是主的命令。

38

(THR) Nā ū lâng m̄ chai, chiū kù-chāi i m̄ chai.

(BCL) 若有人呣知，就據在伊呣知！

39

(THR) Só͘-í góa ê hiaⁿ-tī ah, tio̍h chhiat-chhiat him-bō͘ chòe sian-ti lâi thôan-tō, iā bo̍h-tit kìm-chí kóng im-gú.

(BCL) 所以，我的兄弟啊，著切切欣慕做先知來傳道，也莫得禁止講音語。

40

(THR) Hōan sū tio̍h bûn-ngá iā chiàu kui-kú lâi kiâⁿ.

(BCL) 凡事著文雅也照規矩來行。

Bible Color Mark

• 台語漢字羅馬本
• 巴克禮全羅