哥林多前書 第 13 章

1

(THR) Góa siat-sú ōe kóng lâng kap thiⁿ-sài ê im-gú, nā bô jîn-ài, góa chiū chiâⁿ chòe hiáng ê tâng-khì, tân ê lâ-po̍ah.

(BCL) 我設使會講人及天使的音語，若無仁愛，我就成做響的銅器，鳴的鐃鈸。

2

(THR) Góa siat-sú chòe sian-ti, bêng-pe̍k lóng-chóng ê ò-biāu kap lóng-chóng ê chai-bat; koh siat-sú ū chiâu-pī ê sìn, kàu-gia̍h lâi î soaⁿ, nā bô jîn-ài, góa chiū bōe sǹg chòe sī sím-mı̍h.

(BCL) 我設使做先知明白攏總的奧妙，及攏總的知識，閣設使有齊備的信，夠額來移山，若無仁愛，我就算做是甚麼。

3

(THR) Góa siat-sú chīn só͘ ū ê lâi chín-chè, koh hiàn góa ê seng-khu hō͘ hé sio, nā bô jîn-ài, chiū góa bô tit-tio̍h lī-ek.

(BCL) 我設使盡所有的來賑濟，閣獻我的身軀互火燒，若無仁愛，就我無得著利益。

4

(THR) Jîn-ài sī gâu khoan-iông chû-pi; jîn-ài sī bô òan-tò͘; jîn-ài bô khoa-kháu, bô phín-phóng,

(BCL) 仁愛是寬容、慈悲；仁愛是無怨妒；仁愛無誇口，無品嗙，

5

(THR) bô kiâⁿ kiàn-siàu ê sū, bô kiû ka-kī ê lī-ek, bô khòai siū-khì, bô kì-tit lâng ê pháiⁿ;

(BCL) 無行見誚的事，無求家己的利益，無快受氣，無記得人的歹，

6

(THR) bô hoaⁿ-hí put-gī, sī kap chin-lí saⁿ-kap hoaⁿ-hí;

(BCL) 無歡喜不義，是及真理相及歡喜；

7

(THR) hōan sū jím-siū, hōan sū siong-sìn, hōan sū ǹg-bāng, hōan sū thun-lún.

(BCL) 凡事忍受，凡事相信，凡事向望，凡事吞。

8

(THR) Jîn-ài éng-óan bōe bô--khì; nā-sī sian-ti ê chit beh hòe-bô, hiah ê im-gú beh soah, chai-bat beh hòe-bô.

(BCL) 仁愛永遠無去。若是先知的職欲廢無；許個音語欲息知識欲廢無。

9

(THR) In-ūi lán só͘ chai ê bô ôan-chôan, chòe sian-ti iā bô ôan-chôan;

(BCL) 因為咱所知的無完全，做先知也無完全，

10

(THR) ôan-chôan ê nā kàu, bô ôan-chôan ê chiū hòe-bô.

(BCL) 完全若到，無完全的就廢無。

11

(THR) Góa chòe gín-ná ê sî, kóng ōe chhin-chhiūⁿ gín-ná, sèng-chêng chhin-chhiūⁿ gín-ná, ì-kiàn chhin-chhiūⁿ gín-ná; í-keng sêng-jîn, chiū hòe-bô gín-ná ê sū.

(BCL) 我做囝仔的時，講話親像囝仔，性情親像囝仔，意見親像囝仔，已經成人，就廢無囝仔的事。

12

(THR) In-ūi lán taⁿ tùi kiàⁿ teh khòaⁿ, bū-bū bô bêng; nā-sī kàu hit sî chiū tng-thâu tùi-bīn. Góa taⁿ só͘ chai bô ôan-chôan; kàu hit sî chiū chai, chhin-chhiūⁿ góa hō͘ Chú chai chı̍t iūⁿ.

(BCL) 因為咱今對鏡看，霧霧無明，若是到彼時就當頭對面。我今所知無完全，到彼時就知，親像我互主知一樣。

13

(THR) Hiān-kim só͘ chûn ê, chiū-sī sìn, ǹg-bāng, jîn-ài; chí saⁿ hāng, kî-tiong tē it tōa ê sī jîn-ài.

(BCL) 現今所存的就是信、向望、仁愛此三項，其中第一大的是仁愛。

Bible Color Mark

• 台語漢字羅馬本
• 巴克禮全羅