哥林多前書 第 12 章

1

(THR) Hiaⁿ-tī ah, lūn-kàu Sîn ê siúⁿ-sù, góa m̄ ài lín m̄ chai.

(BCL) 兄弟啊，論到神的賞賜，我呣愛恁呣知。

2

(THR) Lín chai lín chòe gōa-pang lâng ê sî, siū bê-he̍k khì chiū-kūn bōe kóng ōe ê ngó͘-siōng, chhut-chāi i ín-iú.

(BCL) 恁知恁做外邦人的時，受迷惑去就近講話的偶像，出在伊引誘。

3

(THR) Só͘-í góa hō͘ lín chai, hō͘ Siōng-tè ê Sîn kám-tōng lâi kóng ê, bô lâng kóng, Iâ-so͘ sī thang chiù-chó͘; nā m̄ sī hō͘ Sèng Sîn kám-tōng ê, iā bô lâng ōe kóng, Iâ-so͘ sī Chú.

(BCL) 所以我互恁知，互上帝的神感動來講的，無人講「耶穌是通咒詛」；若呣是互聖神感動的，也無人會講「耶穌是主」。

4

(THR) Taⁿ un-sù ū hun-piat, nā-sī Sîn sī siāng chı̍t ê.

(BCL) 今恩賜有分別，若是神是像一個。

5

(THR) Chit-hūn ū hun-piat,nā-sī Chú sī siāng chı̍t ê.

(BCL) 職份有分別，若是主是像一個。

6

(THR) Kong-iōng ū hun-piat, nā-sī Siōng-tè siāng chı̍t ê, si-hêng bān sū tī chèng lâng tiong ê.

(BCL) 功用有分別，若是上帝像一個，施行萬事佇眾人中的。

7

(THR) Nā-sī Sèng Sîn ê hián-bêng sī siúⁿ-sù ta̍k lâng beh lī-ek chèng lâng.

(BCL) 若是聖神的顯明是賞賜逐人，欲利益眾人。

8

(THR) In-ūi ū-ê tùi Sîn ēng tì-hūi ê ōe hō͘ i; ū-ê chiàu chit ê Sîn ēng chai-bat ê ōe hō͘ i;

(BCL) 因為有的對神用智慧的話互伊，有的照此個神用知識的話互伊，

9

(THR) koh ū lâng tī chit ê Sîn ēng sìn hō͘ i; ū-ê tī chit ê Sîn ēng i-pīⁿ ê un-sù hō͘ i;

(BCL) 閣有人佇此個神用信互伊，有的佇此個神用醫病的恩賜互伊，

10

(THR) ū-ê hō͘ i ōe kiâⁿ koh-iūⁿ ê kôan-lêng; ū-ê hō͘ i chòe sian-ti; ū-ê hō͘ i ōe hun-piat chiah ê sîn; koh ū-ê hō͘ i ōe kóng ta̍k iūⁿ ê im-gú; ū-ê hō͘ i ōe hoan-e̍k ta̍k iūⁿ ê im-gú.

(BCL) 有的互伊會行各樣的權能，有的互伊做先知，有的互伊會分別諸個神，閣有的互伊會講逐樣的音語，有的互伊會翻譯逐樣的音語。

11

(THR) Chiah-ê lóng sī siāng chı̍t ê Sîn só͘ si-hêng ê, chiàu I só͘ ài ê, sûi-iūⁿ pun hō͘ ta̍k lâng.

(BCL) 諸個攏是像一個神所施行的、照伊所愛的隨樣分互逐人。

12

(THR) In-ūi chhin-chhiūⁿ seng-khu sī chı̍t-ê, iā ū chōe-chōe thé, koh seng-khu ê thé sui-jiân chōe, lóng sī chı̍t ê seng-khu; Ki-tok iā sī án-ni.

(BCL) 因為親像身軀是一個，也有多多體；閣身軀的體雖然多，攏是一個身軀；基督也是按呢。

13

(THR) In-ūi lán chèng lâng, bô lūn sī Iû-thài á-sī Hi-lī-nî, chòe lô͘-châi ê á-sī chū-iû ê, lóng bat siū sóe-lé tī chı̍t ê Sîn, lâi sio̍k tī chı̍t ê seng-khu, iā lóng-chóng bat lim chı̍t ê Sîn.

(BCL) 因為咱眾人無論是猶太，抑是希利尼，做奴才的，抑是自由的，攏曾受洗禮佇一個神，來屬佇一個身軀，也攏總曾飲一個神。

14

(THR) In-ūi seng-khu m̄ sī chı̍t thé, sī chōe-chōe thé.

(BCL) 因為身軀呣是一體，是多多體。

15

(THR) Siat-sú kha nā kóng, Góa in-ūi m̄ sī chhiú, góa bô sio̍k seng-khu; i m̄ sī ūi-tio̍h án-ni chiū bô sio̍k tī seng-khu.

(BCL) 設使腳若講：「我因為呣是手，我無屬身軀；」伊呣是為著按呢就無屬佇身軀。

16

(THR) Siat-sú hī-á nā kóng, Góa in-ūi m̄ sī ba̍k-chiu, góa bô sio̍k tī seng-khu; i m̄ sī ūi-tio̍h án-ni chiū bô sio̍k tī seng-khu.

(BCL) 設使耳仔若講：「我因為呣是目睭，我無屬佇身軀；」伊呣是為著按呢就無屬佇身軀。

17

(THR) Siat-sú thong seng-khu sī ba̍k-chiu, tùi tá-lo̍h ōe thiaⁿ? Nā lóng sī hī-á, tùi tá-lo̍h ōe phīⁿ?

(BCL) 設使通身軀是目睭，對叨落會聽？若攏是耳仔，對叨落會鼻？

18

(THR) Nā-sī Siōng-tè chiàu I ê só͘ ài, chiong chiah ê thé sûi-ê an-pâi tī seng-khu.

(BCL) 若是上帝照伊的所愛，將諸個體隨個安排佇身軀。

19

(THR) Nā pah thé lóng siāng chı̍t khóan, chiū seng-khu tī tá-lo̍h?

(BCL) 若百體攏像一款，就身軀佇叨落？

20

(THR) Chóng-sī taⁿ thé sī chōe-chōe, iā seng-khu sī chı̍t ê.

(BCL) 總是今體是多多，也身軀是一個。

21

(THR) Ba̍k-chiu bōe-ōe tùi chhiú kóng, Góa bô khiàm-ēng lí; thâu-khak iā bōe-ōe tùi kha kóng, Góa bô khiàm-ēng lín.

(BCL) 目睭會對手講：「我無欠用你；」頭殼也會對腳講：「我無欠用恁。」

22

(THR) M̄ nā án-ni, seng-khu chiah ê thé, khòaⁿ chòe khah nńg-chiáⁿ ê koh khah bōe bô--tit.

(BCL) 呣若按呢，身軀諸個體看做卡軟茈的，閣卡無得。

23

(THR) Koh lán khòaⁿ chòe seng-khu khah bô kùi-khì ê thé, lán chiū chng-thāⁿ hō͘ in khah chun-kùi; iā khah bô bûn-ngá ê, lán hō͘ in koh khah bûn-ngá.

(BCL) 閣咱看做身軀卡無貴氣的體，咱就妝飾互卡尊貴；也卡無文雅的，咱互閣卡文雅。

24

(THR) In-ūi lán bûn-ngá ê thé bô só͘ khiàm-kheh. To̍k-to̍k Siōng-tè tiâu-hô seng-khu; tī ū khiàm-kheh ê, it-hoat hō͘ i chun-kùi;

(BCL) 因為咱文雅的體，無所欠缺；獨獨上帝調和身軀，佇有欠缺的益發互伊尊貴，

25

(THR) bián-tit seng-khu bô saⁿ-ha̍p sī beh hō͘ pah thé pîⁿ-pîⁿ saⁿ kòan-kò͘.

(BCL) 免得身軀無相合，是欲互百體平平相眷顧。

26

(THR) Nā chı̍t thé siū khó͘, pah thé tâng siū khó͘; chı̍t thé siū êng-kng, pah thé tâng khòai-lo̍k.

(BCL) 若一體受苦，百體同受苦；一體受榮光，百體同快樂。

27

(THR) Lín chiah-ê sī Ki-tok ê seng-khu, sûi-ê sī chòe thé.

(BCL) 恁諸個是基督的身軀，隨個是做體。

28

(THR) Siōng-tè só͘ siat tī kàu-hōe ê, it sī sù-tô͘, jī sī sian-ti, saⁿ sī kàu-su, koh ū kiâⁿ kôan-lêng ê, koh ū i-pīⁿ ê un-sù, pang-chān ê, tī-lí ê, kóng ta̍k iūⁿ ê im-gú ê.

(BCL) 上帝所設佇教會的：一是使徒，二是先知，三是教師，閣有行權能的，閣有醫病的恩賜，幫助的，治理的，講逐樣的音語的。

29

(THR) Chèng lâng kiám lóng sī sù-tô͘ mah? lóng sī sian-ti mah? lóng sī kàu-su mah? lóng kiâⁿ kôan-lêng mah?

(BCL) 眾人豈攏是使徒嗎？攏是先知嗎？攏是教師嗎？攏行權能嗎？

30

(THR) lóng ū i-pīⁿ ê un-sù mah? lóng ōe kóng ta̍k iūⁿ ê im-gú mah? lóng ōe hoan-e̍k mah?

(BCL) 攏有醫病的恩賜嗎？攏會講逐樣的音語嗎？攏會翻譯嗎？

31

(THR) Lín tio̍h chhiat-chhiat him-bō͘ hiah ê khah tōa ê un-sù. Góa ēng tē it hó ê lō͘ sòa chí-sī lín.

(BCL) 恁著切切欣慕許個卡大的恩賜。我用第一好的路續指示恁。

Bible Color Mark

• 台語漢字羅馬本
• 巴克禮全羅