哥林多前書 第 10 章

1

(THR) Hiaⁿ-tī ah, góa m̄ ài lín m̄ chai lán ê lia̍t-chó͘ lóng tī hûn ē, iā lóng tùi hái-tiong keng-kè,

(BCL) 兄弟啊，我呣愛恁呣知咱的列祖攏佇雲下，也攏對海中經過，

2

(THR) iā lóng tī hûn-tiong hái-tiong siū sóe-lé kui tī Mô͘-se,

(BCL) 也攏佇雲中、海中受洗禮歸佇摩西；

3

(THR) iā lóng chia̍h tâng chı̍t iūⁿ lêng ê chia̍h, iā lóng lim tâng chı̍t iūⁿ lêng ê lim;

(BCL) 也攏食同一樣靈的食，也攏飲同一樣靈的飲。

4

(THR) in-ūi in só͘ lim ê sī tùi tè in lêng ê chio̍h-pôaⁿ chhut, hit ê chio̍h-pôaⁿ chiū-sī Ki-tok.

(BCL) 因為所飲的，是對隨靈的石磐出；彼個石磐就是基督。

5

(THR) Nā-sī in tiong-kan khah chōe lâng hō͘ Siōng-tè bô hoaⁿ-hí; in-ūi in ê sin-si hôaiⁿ-ke̍h tī khòng-iá.

(BCL) 若是中間卡多人互上帝無歡喜，因為的身屍橫逆佇曠野。

6

(THR) Taⁿ chiah ê sū sī chòe lán ê kàm-kài, hō͘ lán bo̍h-tit ài pháiⁿ, chhin-chhiūⁿ in ài pháiⁿ chı̍t iūⁿ.

(BCL) 今諸個事是做咱的鑑戒，互咱莫得愛歹，親像愛歹一樣；

7

(THR) Lín iā bo̍h-tit pài ngó͘-siōng, chhin-chhiūⁿ in tiong-kan ū lâng pài i; chiàu só͘ kì-chài kóng, Peh-sìⁿ chē-teh lim-chia̍h, khí-lâi thiàu-bú.

(BCL) 恁也莫得拜偶像，親像中間有人拜伊。照所記載講：「百姓坐飲食，起來跳舞。」

8

(THR) Lán iā bo̍h-tit kiâⁿ îm, chhin-chhiūⁿ in tiong-kan ū lâng kiâⁿ îm, chı̍t jı̍t sí nn̄g-bān saⁿ-chheng lâng.

(BCL) 咱也莫得行淫，親像中間有人行淫，一日死二萬三千人；

9

(THR) Lán iā bo̍h-tit chhì Chú, chhin-chhiūⁿ in tiong-kan ū lâng chhì I, chiū hō͘ chôa kā-sí.

(BCL) 咱也莫得試主，親像中間有人試伊，就互蛇咬死。

10

(THR) Lín iā bo̍h-tit nga̍uh-nga̍uh liām, chhin-chhiūⁿ in tiong-kan ū lâng nga̍uh-nga̍uh liām, chiū hō͘ châu-bia̍t-ê bia̍t in.

(BCL) 恁也莫得耦耦唸，親像中間有人耦耦唸，就互剿滅的滅。

11

(THR) Taⁿ in tú-tio̍h chiah ê sū sī chòe kàm-kài, sòa kì-chài lâi kéng-kài lán, chiū-sī chiah ê sè-tāi bé ê lâng.

(BCL) 今抵著諸個事是做鑑戒，續記載來警戒咱，就是諸個世代尾的人。

12

(THR) Só͘-í ka-kī lia̍h chòe khiā-chāi ê, tio̍h kín-sīn kiaⁿ-liáu po̍ah-tó.

(BCL) 所以，家己掠做徛在的，著謹慎，驚了跋倒。

13

(THR) Lín só͘ tú-tio̍h ê chhì bô m̄ sī lâng ê siông-sū; Siōng-tè sī sìn-sı̍t, bô beh hō͘ lín tú-tio̍h chhì kè-thâu tī lín só͘ ōe tng; chiū-sī tī siū chhì ê sî beh sòa khui thoat-chhut ê lō͘, hō͘ lín tng ōe khí.

(BCL) 恁所抵著的試，無呣是人的常事。上帝是信實，無欲互恁抵著試過頭佇恁所會當；就是佇受試的時，欲續開脫出的路，互恁當會起。

14

(THR) Só͘-í góa só͘ thiàⁿ ê hiaⁿ-tī ah, tio̍h siám-pī pài ngó͘-siōng ê sū.

(BCL) 所以我所疼的兄弟啊，著閃避拜偶像的事。

15

(THR) Góa só͘ kóng sī chhin-chhiūⁿ tùi tì-sek ê lâng kóng; lín tio̍h séng-chhat góa ê ōe.

(BCL) 我所講是親像對智識的人講，恁著省察我的話。

16

(THR) Chiok-siā ê poe, lán só͘ chiok-siā ê, kiám m̄ sī saⁿ-kap ū hūn tī Ki-tok ê huih mah? lán só͘ peh ê piáⁿ kiám m̄ sī saⁿ-kap ū hūn tī Ki-tok ê seng-khu mah?

(BCL) 祝謝的杯咱所祝謝的，豈呣是相及有份佇基督的血嗎？咱所擘的餅，豈呣是相及有份佇基督的身軀嗎？

17

(THR) in-ūi piáⁿ kì-jiân chı̍t-ê, lán sui-jiân chōe-chōe lâng iā sī chı̍t thé; in-ūi lóng ū hūn tī chı̍t ê piáⁿ.

(BCL) 因為餅既然一個，咱雖然多多人，也是一體，因為攏有份佇一個餅。

18

(THR) Chhì-khòaⁿ chiàu jio̍k-thé ê Í-sek-lia̍t lâng, hiah ê chia̍h chè-mı̍h ê kiám m̄ sī saⁿ-kap ū hūn tī chè-tôaⁿ mah?

(BCL) 試看照肉體的以色列人，許個食祭物的豈呣是相及有份佇祭壇嗎？

19

(THR) Án-ni góa sī teh kóng sím-mı̍h? kiám sī teh kóng chè ngó͘-siōng ê mı̍h sī sím-mı̍h?

(BCL) 按呢我是講甚麼？豈是講祭偶像的物是甚麼？

20

(THR) á-sī kóng ngó͘-siōng sī sím-mı̍h? sī teh kóng gōa-pang lâng só͘ chè ê sī chè kúi, m̄ sī chè Siōng-tè; góa m̄ ài lín ū hūn tī kúi.

(BCL) 抑是講偶像是甚麼？是講外邦人所祭的是祭鬼，呣是祭上帝。我呣愛恁有份佇鬼。

21

(THR) Lín bōe-ōe lim Chú ê poe, kiam lim kúi ê poe; bōe-ōe ū hūn tī Chú ê toh, kiam ū hūn tī kúi ê toh.

(BCL) 恁會飲主的杯兼飲鬼的杯，會有份佇主的桌兼有份佇鬼的桌。

22

(THR) Á-sī lán teh kek hō͘ Chú siū-khì mah? Lán kiám khah ióng-chòng I mah?

(BCL) 抑是咱激互主受氣嗎？咱豈卡勇壯伊嗎？

23

(THR) Hōan sū lóng thang, chóng-sī bô lóng ū lī-ek. Hōan sū lóng thang, chóng-sī bô lóng kiàn-lı̍p tek-hēng.

(BCL) 凡事攏通，總是無攏有利益。凡事攏通，總是無攏建立德行。

24

(THR) Bo̍h-tit kiû lī-ek ka-kī, tio̍h kiû lī-ek pa̍t lâng.

(BCL) 莫得求利益家己，著求利益別人。

25

(THR) Kìⁿ-nā koe-chhī só͘ bōe ê thang chia̍h, bo̍h-tit ūi-tio̍h liông-sim ê iân-kò͘ lâi chhâ-mn̄g;

(BCL) 見若街市所賣的，通食，莫得為著良心的緣故來查問，

26

(THR) in-ūi tōe kap thong tōe-nı̍h ê mı̍h lóng sī Chú ê.

(BCL) 因為地及通地裡的物攏是主的。

27

(THR) Nā ū chı̍t ê m̄ sìn ê lâng chhiáⁿ lín, iā lín ài beh khì, kìⁿ-nā pâi teh chhiáⁿ lín ê, thang chia̍h i; bo̍h-tit ūi-tio̍h liông-sim ê iân-kò͘ lâi chhâ-mn̄g.

(BCL) 若有一個呣信的人請恁，也恁愛欲去，見若排請恁的，通食伊；莫得為著良心的緣故來查問。

28

(THR) Siat-sú ū lâng kā lín kóng, Chit-ê sī chè-mı̍h, chiū bo̍h-tit chia̍h; che sī ūi-tio̍h hit ê kā lín kóng ê lâng, í-kı̍p liông-sim ê iân-kò͘.

(BCL) 設使有人給恁講：「此個是祭物」，就莫得食，這是為著彼個給恁講的人以及良心的緣故。

29

(THR) Só͘ kóng ê liông-sim m̄ sī ka-kī ê, sī hit lâng ê; in-ūi góa ê chū-iû siáⁿ-sū hō͘ pa̍t ê liông-sim gí-gī ah?

(BCL) 所講的良心呣是家己的，是彼人的。因為我的自由啥事互別個良心擬議啊？

30

(THR) Góa nā kám-un lâi chia̍h, siáⁿ-sū ūi-tio̍h góa só͘ kám-siā ê hō͘ lâng húi-pòng ah?

(BCL) 我若感恩來食，啥事為著我所感謝的互人誹謗啊？

31

(THR) Só͘-í lín he̍k-sī chia̍h, he̍k-sī lim, he̍k-sī chòe sím-mı̍h, lóng tio̍h in-ūi êng-kng Siōng-tè lâi chòe.

(BCL) 所以，恁或是食或是飲，或是做甚麼，攏著因為榮光上帝來做。

32

(THR) Bô lūn Iû-thài, á-sī Hi-lī-nî, á-sī Siōng-tè ê kàu-hōe, lín bo̍h-tit chòe in ê that-gāi.

(BCL) 無論猶太，抑是希利尼，抑是上帝的教會，恁莫得做的塞礙；

33

(THR) Chhin-chhiūⁿ góa hōan sū hō͘ chèng lâng hoaⁿ-hí, bô kiû ka-kī ê lī-ek, chiū-sī kiû chèng lâng ê lī-ek, ài beh hō͘ in tit-tio̍h kiù.

(BCL) 親像我凡事互眾人歡喜，無求家己的利益，就是求眾人的利益，愛欲互得著救。

Bible Color Mark

• 台語漢字羅馬本
• 巴克禮全羅