哥林多前書 第 1 章

1

(THR) Tùi Siōng-tè ê chí-ì siū tiàu chòe Iâ-so͘ Ki-tok ê sù-tô͘ Pó-lô, kap hiaⁿ-tī Só͘-thê-nî,

(BCL) 對上帝的旨意，受召做耶穌基督的使徒保羅，及兄弟所提尼，

2

(THR) phoe kià hō͘ Siōng-tè ê kàu-hōe tī Ko-lîm-to ê, chiū-sī tiàm-tī Ki-tok Iâ-so͘ chiâⁿ-sèng, siū tiàu chòe sèng-tô͘, í-kı̍p kìⁿ-nā ta̍k só͘-chāi kiû-kiò lán ê Chú Iâ-so͘ Ki-tok ê miâ ê, Chú sī in ê, iā sī lán ê;

(BCL) 批寄互上帝的教會佇哥林多的，就是佇基督耶穌成聖、受召做聖徒，以及見若逐所在求叫咱的主耶穌基督的名的。主是的，也是咱的。

3

(THR) gōan lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an.

(BCL) 願恁對咱的父上帝及主耶穌基督得著恩典、平安。

4

(THR) Góa siông-siông thòe lín kám-siā góa ê Siōng-tè, sī ūi-tio̍h Siōng-tè ê un-tián tī Iâ-so͘ Ki-tok bat siúⁿ-sù lín ê,

(BCL) 我常常替恁感謝我的上帝，是為著上帝的恩典佇耶穌基督曾賞賜恁的；

5

(THR) in-ūi lín tiàm-tī I ta̍k hāng tāi-chì hù-chiok, kháu-châi tì-sek bô m̄ chiâu-pī,

(BCL) 因為恁佇伊逐項代誌富足，口才、智識無呣齊備，

6

(THR) chhin-chhiūⁿ Ki-tok ê kan-chèng tit-tio̍h kian-kò͘ tī lín ê tiong-kan;

(BCL) 親像基督的干證，得著堅固佇恁的中間，

7

(THR) tì-kàu lín tī chiah ê un-sù bô chı̍t hāng bô kàu-gia̍h, lâi thèng-hāu lán ê Chú Iâ-so͘ Ki-tok ê hián-hiān;

(BCL) 致到恁佇諸個恩賜無一項無夠額，來聽候咱的主耶穌基督的顯現。

8

(THR) I iā beh kian-kò͘ lín kàu lō͘-bé, tī lán ê Chú Iâ-so͘ Ki-tok ê jı̍t bô thang hiâm.

(BCL) 伊也欲堅固恁到路尾，佇咱的主耶穌基督的日無通嫌。

9

(THR) Siōng-tè sī sìn-sı̍t, lín tùi I siū tiàu lâi kap I ê Kiáⁿ lán ê Chú Iâ-so͘ Ki-tok kiat-liân.

(BCL) 上帝是信實，恁對伊受召，來及伊的子──咱的主耶穌基督結聯。

10

(THR) Hiaⁿ-tī ah, taⁿ góa tùi lán ê Chú Iâ-so͘ Ki-tok ê miâ khǹg lín gī-lūn lóng tio̍h saⁿ-tâng, lín tiong-kan bo̍h-tit ū hun-tóng, chiū-sī tio̍h chı̍t sim chı̍t ì tāi-ke saⁿ khè-ha̍p.

(BCL) 兄弟啊，今我對咱的主耶穌基督的名勸恁議論攏著相同。恁中間莫得有分黨，就是著一心一意，大家相契合。

11

(THR) Góa ê hiaⁿ-tī ah, sī Kek-lâi--sī ke-lāi ê lâng bat kā góa kóng, lín tiong-kan ū saⁿ-chiⁿ.

(BCL) 我的兄弟啊，是革來氏家內的人曾給我講，恁中間有相爭。

12

(THR) Góa ê ì-sù sī lín ta̍k lâng ū teh kóng, Góa sio̍k Pó-lô, Góa sio̍k A-pho-lô, Góa sio̍k Ki-hoat, Góa sio̍k Ki-tok.

(BCL) 我的意思是恁逐人有講：「我屬保羅」；「我屬亞波羅」；「我屬磯法」；「我屬基督」。

13

(THR) Ki-tok kiám ū pun-khui mah? Pó-lô kiám thòe lín tèng sı̍p-jī-kè mah? Á-sī lín bat siū sóe-lé kui tī Pó-lô ê miâ mah?

(BCL) 基督豈有分開嗎？保羅豈替恁釘十字架嗎？抑是恁曾受洗禮歸佇保羅的名嗎？

14

(THR) Kám-siā Siōng-tè, tī Kek-lí-sū-pò͘, Ka-iû í-gōa, góa bē bat kā lín chı̍t lâng kiâⁿ sóe-lé

(BCL) 感謝上帝，佇基利司布、該猶以外，我未曾給恁一人行洗禮，

15

(THR) bián-tit lâng kóng lín siū sóe-lé kui tī góa ê miâ.

(BCL) 免得人講，恁受洗禮歸佇我的名。

16

(THR) Góa iā kā Sū-thê-hóan-à chı̍t ke ê lâng kiâⁿ sóe-lé, kî-û ū kā pa̍t lâng kiâⁿ sóe-lé á bô góa khiok bōe kì-tit.

(BCL) 我也給司提反阿一家的人行洗禮，其餘有給別人行洗禮抑無，我卻記得。

17

(THR) In-ūi Ki-tok chhe góa m̄ sī beh kiâⁿ sóe-lé sī beh thôan hok-im; put-chāi giân-gú ê tì-hūi, kiaⁿ-liáu Ki-tok ê sı̍p-jī-kè kui tī khang-khang.

(BCL) 因為基督差我，呣是欲行洗禮是欲傳福音，不在言語的智慧，驚了基督的十字架歸佇空空。

18

(THR) In-ūi sı̍p-jī-kè ê tō-lí, tîm-lûn ê lâng khòaⁿ chòe gōng, lán tit kiù ê lâng khòaⁿ chòe Siōng-tè ê kôan-lêng.

(BCL) 因為十字架的道理，沈淪的人看做戇；咱得救的人，看做上帝的權能。

19

(THR) In-ūi ū kì-chài kóng, Góa beh bia̍t-bô tì-hūi ê lâng ê tì-hūi, Iā beh khì-sak chhang-miâ ê lâng ê chhang-miâ.

(BCL) 因為有記載講：我欲滅無智慧的人的智慧，也欲棄拺聰明的人的聰明。

20

(THR) Tì-hūi ê lâng tī tá-lo̍h? Keng-ha̍k-sū tī tá-lo̍h? chit sè-kan hò͘ⁿ piān-lūn ê lâng tī tá-lo̍h? Siōng-tè kiám m̄ sī hō͘ sè-kan ê tì-hūi piàn-chiâⁿ gōng?

(BCL) 智慧的人佇叨落？經學士佇叨落？此世間好辯論的人佇叨落？上帝豈呣是互世間的智慧變成戇？

21

(THR) In-ūi sè-kan kì-jiân tùi in ê tì-hūi m̄ bat Siōng-tè, Siōng-tè chiū hoaⁿ-hí tùi só͘ soan-thôan ê gōng lâi kiù chiah ê sìn ê lâng; che lóng sī Siōng-tè ê tì-hūi.

(BCL) 因為世間既然對的智慧，呣識上帝，上帝就歡喜對所宣傳的戇來救諸個信的人，這攏是上帝的智慧。

22

(THR) In-ūi Iû-thài lâng kiû sîn-jiah, Hi-lī-nî lâng chhē tì-hūi.

(BCL) 因為猶太人求神蹟，希利尼人尋智慧，

23

(THR) Nā-sī góan thôan tèng sı̍p-jī-kè ê Ki-tok, tùi tī Iû-thài lâng sī that-gāi, tùi tī gōa-pang lâng sī gû-gōng;

(BCL) 若是阮傳釘十字架的基督，對佇猶太人是塞礙，對佇外邦人是愚戇；

24

(THR) nā-sī tùi tī siū tiàu ê, bô lūn Iû-thài Hi-lī-nî, Ki-tok chòe Siōng-tè ê kôan-lêng, Siōng-tè ê tì-hūi.

(BCL) 若是對佇受召的，無論猶太、希利尼，基督做上帝的權能，上帝的智慧。

25

(THR) In-ūi Siōng-tè ê gû-gōng pí lâng khah tì-hūi, Siōng-tè ê lóan-jio̍k pí lâng khah ióng-chòng.

(BCL) 因為上帝的愚戇比人卡智慧，上帝的軟弱比人卡勇壯。

26

(THR) Hiaⁿ-tī ah, chhì-khòaⁿ lín ê siū-tiàu, chiàu jio̍k-thé ū tì-hūi ê bô jōa chōe, ū kôan-le̍k ê bô jōa chōe, ū chun-kùi ê iā bô jōa chōe;

(BCL) 兄弟啊，試看恁的受召，照肉體有智慧的無偌多，有權力的無偌多，有尊貴的也無偌多。

27

(THR) nā-sī Siōng-tè kéng sè-kan ê gōng ê, lâi hō͘ tì-hūi ê lâng kiàn-siàu; Siōng-tè iā kéng sè-kan ê lóan-jio̍k ê lâi hō͘ ióng-chòng ê kiàn-siàu;

(BCL) 若是上帝揀世間的戇的，來互智慧的人見誚；上帝也揀世間的軟弱的，來互勇壯的見誚。

28

(THR) Siōng-tè iā kéng sè-kan pi-chiān ê, lâng khòaⁿ m̄ chiūⁿ ba̍k ê, í-kı̍p hiah ê bô ê, lâi hòe-bô hiah ê ū-ê;

(BCL) 上帝也揀世間卑賤的，人看呣上目的，以及許個無的，來廢無許個有的，

29

(THR) hō͘ kìⁿ-nā ū jio̍k-thé ê tī Siōng-tè ê bīn-chêng bô thang khoa-kháu.

(BCL) 互見若有肉體的，佇上帝的面前無通誇口。

30

(THR) Nā-sī lín tùi Siōng-tè tit-tio̍h tiàm-tī Ki-tok Iâ-so͘; I tùi Siōng-tè thòe lán chiâⁿ-chòe tì-hūi, koh chòe gī, chiâⁿ-sèng, í-kı̍p sio̍k-hôe;

(BCL) 若是恁對上帝得著佇基督耶穌，伊對上帝替咱成做智慧、閣做義、成聖，以及贖回。

31

(THR) tì-kàu chiàu só͘ kì-chài kóng, Khoa-kháu ê lâng tio̍h ēng Chú lâi khoa-kháu.

(BCL) 致到照所記載講：「誇口的人，著用主來誇口。」

Bible Color Mark

• 台語漢字羅馬本
• 巴克禮全羅